ކެނދިކުޅުދޫ ކައުންސިލަށް 4 ބިމުން ލިބެންޖެހޭ ފައިސާ ރަޖިސްޓްރީގައި ހިމަނާފައި ނުވާތީ ކައުންސިލަށް ލިބެންޖެހޭ ފައިސާގެ ރިކޯޑުގެ ސައްހަކަން ކަށަވަރެއް ނުވި
ކެނދިކުޅުދޫ ކައުންސިލްގެ 2024 ވަނަ އަހަރުގެ އޮޑިޓް ރިޕޯޓުން ދައްކާގޮތުން ލިބެންޖެހޭ ފައިސާގެ ރަޖިސްޓްރީ ފުރިހަމަނުވާއިރު 258،690 ރުފިޔާ ހޯދުމަށް ގަވާއިދާ އެއްގޮތަށް މަސައްކަތް ކޮށްފައެއް ނުވޭ. ޗެކްކުރި 4 ބިމަކުން ލިބެންޖެހޭ 176،888 ރުފިޔާ ރަޖިސްޓްރީގައި ހިމަނާފައި ނުވާކަން ފާހަގަ ކޮށްފައިވޭ.
ރައީސް މުއިއްޒު ކެނދިކުޅުދޫ ކައުންސިލް މެންބަރުންނާ ބައްދަލުކުރެއްވުން. | ރައީސް އޮފީސް
ނ. ކެނދިކުޅުދޫ ކައުންސިލަށް ލިބެންޖެހޭ ފައިސާ ގެ ރަޖިސްޓްރީގައި ހިމަނާފައިވާ އަދަދު ސައްހަ ނޫން ކަމަށާ ލިބެންޖެހޭ ފައިސާ ހޯދުމަށް ގަވާއިދާ އެއްގޮތަށް މަސައްކަތް ކޮށްފައި ނުވާ ކަމަށް އޮޑިޓް ރިޕޯޓުން ހާމަވެއްޖެ އެވެ.
2024 ވަނަ އަހަރުގެ ނ. ކެނދިކުޅުދޫ ކައުންސިލް ގެ ކޮމްޕްލަޔަންސް އޮޑިޓް ރިޕޯޓުގައި ބުނީ ދައުލަތުގެ މާލިއްޔަތުގެ ގަވާއިދު ގައި ދައުލަތުގެ އިދާރާތަކަށް ލިބެންޖެހޭ އާމްދަނީ އާ އެނޫން ގޮތްގޮތުން ލިބެންޖެހޭ ފައިސާގެ ތެރެއިން ނުލިބި ހުރި ފައިސާގެ ތަފުސީލު ތައްޔާރު ކުރަންވާނެ ކަމަށް ބަޔާންކޮށްފައި ވާ ކަމަށެވެ.
މި ގަވާއިދުގައި ދައުލަތުގެ އޮފީހަކުން ކުރާ މަސައްކަތަކަށް ނުވަތަ ދޭ ޚިދުމަތަކަށް ނުވަތަ ކުއްޔަށް ދީފައިވާ ތަނެއްގެ ކުއްޔަށް ނުވަތަ ވިއްކި އެއްޗެއްގެ އަގަށް ލިބެންޖެހޭ ފައިސާ އެކަމެއް ނިމުނު ދުވަހުން ފެށިގެން ލަސްވެގެން 1 މަސް ދުވަހުގެ ތެރޭގައި ހޯދަން ވާނެ ކަމަށް ބަޔާން ކޮށްފައި ވާއިރު ލިބެންޖެހޭ ފައިސާ ހޯދުމަށުް އަޅަންޖެހޭ ފިޔަވަޅުތައް އެ ގަވާއިދުގައި ތަފްސީލު ކޮށްދީފައި ވެ އެވެ.
އޮޑިޓް އޮފީހުން އާންމު ކޮށްފައިވާ އެ ރިޕޯޓުގައި ބުނީ ކައުންސިލްގެ އިދާރާ އިން ތައްޔާރު ކޮށްފައިވާ ލިބެންޖެހޭ ފައިސާގެ ރިކޯޑުން ދައްކާ ގޮތުގައި 1 ޑިސެމްބަރު 2024 ގެ ނިޔަލަށް 258،690 ރުފިޔާ ހޯދުމަށް އެކަށީގެންވާ މަސައްކަތްތަކެއް ކޮށްފައި ނުވާ ކަމަށެވެ. އެގޮތުން ލިބެންޖެހޭ ފައިސާ ހޯދުމަށް 2024 ވަނަ އަހަރުގައި ފައިސާ ހޯދުމަށް ބައެއް ފަރާތްތަކަށް މެސެޖު އަދި ސިޓީ ފޮނުވާފައި ވީ ނަމަވެސް ގަވާއިދުގައި ބަޔާން ކުރާ އިތުރު ފިޔަވަޅެއް އަޅާފައި ނުވާކަން އެ ރިޕޯޓުގައި ފާހަގަކޮށްފައި ވެ އެވެ.
މީގެ އިތުރުން ކައުންސިލްގެ އިދާރާ އަށް ލިބެންޖެހޭ ފައިސާ ގެ ގޮތުގައި އިދާރާ އިން ތައްޔާރު ކޮށްފައިވާ ރިކޯޑުގައި ކުރީ އަހަރުތަކުގެ ތެރެއިން ނުލިބިވާ ފައިސާ ގެ މައުލޫމާތު ހިމަނާފައި ނުވާކަމާއި 2024 ވަނަ އަހަރުގެ ތެރޭގައި އިދާރާ އަށް ނުލިބިވާ ފައިސާގެ މައުލޫމާތު ހިމަނާފައި ނުވާކަން ފާހަގަ ކޮށްފައި ވެ އެވެ.
އެގޮތުން ޗެކް ކުރެވުނު 4 ބިމަކުން ލިބެންޖެހޭ 176،888 ރުފިޔާ ކައުންސިލްގެ އިދާރާ އަށް ނުލިބި ހުރި ނަމަވެސް އެ 4 ބިމުން ލިބެންޖެހޭ ފައިސާ ރަޖިސްޓްރީގައި ހިމަނާފައި ނުވާކަން އޮޑިޓް ރިޕޯޓުގައި ފާހަގަ ކޮށްފައި ވެ އެވެ. އޮޑިޓް ރިޕޯޓުގައި ބުނީ އެހެން ކަމުން އިދާރާ އިން ތައްޔާރު ކޮށްފައިވާ ލިބެންޖެހޭ ފައިސާގެ ރިކޯޑު ފުރިހަމަ ނުވުމުގެ ސަބަބުން އެ ރިކޯޑުގެ ސައްހަކަން ކަށަވަރު ނުވާ ކަމަށެވެ.
