ޕީއެންސީ އިން އިހަވަންދޫ ރައްޔިތުންނަށް ދިނީ އަނިޔާ: އަދުނާން އަބްދުﷲ (ކުރީގެ ބޮޑު ކަތީބު)

ވެރިކަންކުރާ ޕީއެންސީ އިން އިހަވަންދޫ ރައްޔިތުންނަށް ދިނީ ހުސް އަނިޔާ ކަމަށް އިހަވަންދޫގެ ކުރީގެ ބޮޑު ކަތީބު އަދުނާން އަބްދުﷲ ވިދާޅުވެއްޖެ އެވެ.

ރާއްޖެ ޓީވީ އަށް ދެއްވި އިންޓަވިއުއެއްގައި އަދުނާން އަބްދުﷲ ވިދާޅުވީ، ރައްޔިތުންނަށް ހާމަކޮށްދޭން ބޭނުންވަނީ ޕީއެންސީ އިން އިހަވަންދޫ އަށް ހަދާލި ގޮތް ކަމަށެވެ. ރައީސް މުޢިއްޒު ވެރިކަމަށް އަންނަންވެގެން އިހަވަންދޫ ރައްޔިތުންގެ ލޮލުގައި ވަރަށް ގިނަ އަނދުންތަކެއް އަޅުވާ ބޮޑެތި ވައުދުތަކެއް ވެފައިވާކަން ފާހަގަކުރައްވާ އަދުނާނު ވިދާޅުވީ، އެވަރުން ނިންމަވާލެއްވީ ނޫންކަމަށާއި މަޖިލިސް އިންތިހާބު ގައި ވެސް އެތައް ވައުދުތަކެއް އިހަވަންދޫ ރައްޔިތުންނަށް ވެފައިވާ ކަމަށެވެ.

އަދުނާނު ވިދާޅުވީ މުޢިއްޒު ވީ ކޮންމެ ވައުދެއް އޮތީ ފެނަށް ގޮސް ނިމިފައި ކަމަށާއި، އެއާ ހިލާފަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ރައްޔިތުންނަށް ވަރަށް އޯގާތެރިކަމާއެކު ވަރަށް އިހުލާސްތެރިކަމާއެކު ވެރިކަން ކޮށްދެއްވި ކަމަށެވެ.

މިރަށަކީ މަސްވެރި ރަށަކަށް ވާތި މަސް ފެކްޓްރީއެއް އެޅުމަށްޓަކައި މި އުތުރު ފަރާތުން ބިމެއް ކަނޑައަޅާ އެތަނުގައި އެމަސައްކަތް ކުރަންވަނީ ނިންމަވާފަ. އެމަސައްކަތް ކުރަން ނިންމަވާފަ އެއަށް ބޭނުންވާ ފައިސާ ހޯދާފަވާކަން މަސްވެރިކަމުގެ ވަޒީރު މިރަށަށް ވަޑައިގެންފަ އަޅުގަނޑުމެންނަށް ޔަގީން ކޮށްދެއްވި. ކޮންމެއަކަށް އެފައިސާ ބޭނުންކުރައްވައިގެން އެތަނުގައި އެބޭފުޅުން މި ކުރެއްވި ކަމަކީ ގާ ކުނޑި ތަކެއް ގެނެސް އެތަނަށް އަޅާ މުޅި ރަށް މިހާރު މިއޮތީ ގިރައިގެން ގޮއްސަ

އިހަވަންދޫގެ ކުރީގެ ބޮޑު ކަތީބު އަދުނާން އަބްދުﷲ

އިބްރާހިމް މުހައްމަދު ސޯލިހުގެ ސަރުކާރުން އިހަވަންދޫގެ ރައްޔިތުންނަށްޓަކައި ހިއްކައިދެއްވި ބޮޑު ބިމުން ބޮޑު ބައެއް މިހާރުވަނީ އުނިވެފައިކަން ފާހަގަކުރައްވާ އަދުނާނު ވިދާޅުވީ ޕީއެންސީން އިހަވަންދޫގެ ރައްޔިތުންނަށް ދިނީ މިކަހަލަ ބޮޑެތި އަނިޔާތައް ކަމުގަ އެވެ. އަދުނާނު ވިދާޅުވީ ޕީއެންސީގައި އޮތީ މުޅިންވެސް މަކަރާ ހީލަތާއި ވައްކަންކުރުން ކަމަށާއި އެކަމުގެ ހެއްކަކަށް ޕީއެންސީން ރަށްރަށުގައި ފައްޓަވައިގެން އުޅޭ އެކަމަކު ކުރިއަށް ނުދާ ޕްރޮޖެކްޓު ތަކުން އެނގި ހާމަވާކަމަށް އަދުނާނު ވިދާޅުވި އެވެ.

އޭގެ އިތުރުން މިފަހަރު އިހަވަންދޫ އިން ޕީއެންސީ އަށް އެއްވެސް ގޮނޑިއެއް ނުލިބޭނެ ކަން ފާހަގަ ކުރައްވާ އަދުނާން ވިދާޅުވީ އިހަވަންދޫ އަށް އެންމެ ބޭނުންވަނީ ހޮސްޕިޓަލު ކަމަށާއި އެކަން ވެސް މިދިޔަ ސަރުކާރުން ފައްޓަވައިދެއްވާފައި ވަނިކޮށް މިސަރުކާރުން މުޅިން އައު މަޝްރޫއުއެއްގެ ގޮތުގައި ފައްޓަވައިދެއްވުމަށް ބޭއްވި ރަސްމިއްޔާތުގައި ސޮއި ކުރެއްވީ ހުސްގަނޑެއްގައި ކަމަށް އަދުނާން ވިދާޅުވި އެވެ. އަދުނާން ވިދާޅުވި ގޮތުގައި އެކަން ފަޅާއެރީ ވަޔާ ގަނޑު އެއްލައިގެންދިޔަ ވަގުތު ރައްޔިތުންނަށް ގަނޑުގެ ދެފަޅި ފެނުމުން ކަމަށެވެ.