ފިލްމީ ތަރި ނިމާލް ނިޔާވެއްޖެ

ރާއްޖޭގެ މަޝްހޫރު ފިލްމީ ތަރި އަދި ޑައިރެކްޓަރު އަޙުމަދު ނިމާލް ނިޔާވެއްޖެ އެވެ. 

އުމުރުން 62 އަހަރުގެ ނިމާލް ނިޔާވެފައި ވަނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި ފަރުވާ ދެމުން ގެންދަނިކޮށެވެ. ނިމާލް އަށް އައިޖީއެމްއެޗްގައި ފަރުވާ ދެމުން ގެންދިޔައީ މިދިޔަ ޑިސެމްބަރު މަހުގެ ފަހު ކޮޅު ސްޓްރޯކެއް ޖެހިގެންނެވެ. 

އެންމެ ފުރަތަމަ ނިމާލް ފިލްމީ ދާއިރާ އަށް ނިކުމެފައި ވަނީ 1984 ވަނަ އަހަރު އެވެ. އާންމުންނަށް އެންމެ ފުރަތަމަ ނިމާލް ފެނިގެން ގޮސްފައި ވަނީ ދިވެހި ފިލްމު "ނުފޫޒު" އިންނެވެ. އޭގެ ފަހުން 1993 ވަނަ އަހަރުގެ ތެރޭގައި ނިމާލް ވަނީ ފިލްމެއް ޑައިރެކްޓު ކޮށްފަ އެވެ. އެއީ ދިވެހި ފިލްމު "ސިޓީ" އެވެ. 

ނިމާލް ޑައިރެކްޓްކުރި ބައެއް އެހެން ފިލްމުތަކުގެ ތެރޭގައި ޝައްކު، ސަބަބު، އުދާސް، ޒަލްޒަލާ 1، ޒަލްޒަލާ 2، ހިލިހިލާ، ހުޅެވި ހަނދު، ދަރިންނަށްޓަކައި، ހަނދުކޭތަ، ހަމަހިމޭން، ހިޔަނި، ވާލޯބި އެގޭނަމަ، އިރު އޮއްސުމުން ފަދަ ފިލްމުތައް ހިމެނެ އެވެ. 

ނިމާލް އެކްޓް ކޮށްފައިވާ ފިލްމުތަކުގެ ތެރެއިން ޔޫސުފް، ކަނބުލޮ، ސިޓީ،  ވީރާނާ، ނިއުމާ، އަދި ނުފޫޒް ފަދަ ފިލްމުތަަކަކީ ބެލުންތެރިންގެ މެދުގައި ބޮޑު މަގުބޫލުކަމެއް ހޯދާފައިވާ ފާހަގަކޮށްލެވޭ ފިލްމުތަކެވެ.

ދިވެހިންގެ ތެރޭގައި ނިމާލް އެންމެ ބޮޑަށް މަޝްހޫރުވެގެން ގޮސްފައިވަނީ ސަޅިބައިސަ ފަދަ ޑްރާމާތަކުންނެވެ. އެ ޑްރާމާތަކުގައި ނިމާލް ކުޅުނު ރޯލްތަށް ބެލުންތެރިންގެ މެދުގައި މަގްބޫލުވެގެން ދިއަ އެވެ. ހާއްސަކޮށް ބިރުކުޑަ އަލީ، މުއްސަނދި އަލީ ނާޒުކު އަލީ އިޝްގީ އަލީ އަކީ ވެސް ނިމާލް ތަމްސީލުކުރި ކެރެކްޓާތަކެވެ.

ފިލްމީ ދާއިރާ އަށް ގިނަ ޚިދުމަތް ތަކެއް ކޮށްދެއްވާފައިވާ ނިމާލް އަކީ، އެ ދާއިރާގައި ވަރަށް މަޤުބޫލު ބޭފުޅެކެވެ. 1991 ވަނަ އަހަރު ނިމާލް އަށް ވަނީ ހިތްވަރު ދިނުމުގެ ޤައުމީ އިނާމު ވެސް ދެއްވައިފަ އެވެ. ނިމާލް ނިޔާވުމާ ގުޅިގެން ފިލްމީ ދާއިރާގެ ގިނަ ފަރާތް ތަކުން އަންނަނީ އާއިލާ އަށް ތައުޒިޔާ ފޮނުވަމުންނެވެ.