މާލެއިން ނަޑެއްލާއަށް ގެންދިޔަ 26 ޓަނުގެ ފެނުގައި މައްސަލަތަކެއް، ރައްޔިތުން ކަންބޮޑުވުމެއްގެ ތެރޭގައި
މާލެއިން ގދ. ނަޑެއްލާއަށް ގެންދިޔަ 26 ޓަނުގެ ފެނުގައި ނުބައި ރަހައެއް ހުންނާތީ، އެކަން ތަހުގީގު ކުރުމަށް ފެނުގެ ސާމްޕަލްތައް މާލެ ފޮނުވުމުގެ މަސައްކަތް ދަނީ ކުރަމުން. މި މައްސަލައާ ގުޅިގެން ރަށު ކައުންސިލުން ބުނީ ފެނުގެ ރަހަ ބަދަލުވެފައިވާ ކަން އެނގުނީ އެ ފެން ތާންގީތަކަށް އަޅައި ފެން ބޭނުންކުރަން ފެށި ފަހުން ކަމަށާއި، ރޯދަމަހަށް ވުމާއެކު ސާފު ބޯފެން ނުލިބޭތީ ރައްޔިތުންގެ މެދުގައި ބޮޑު ކަންބޮޑުވުމެއް އެބައޮތް ކަމަށް. އެހެންކަމުން މި މައްސަލަ އަވަހަށް ހައްލުކޮށްދިނުމަށް ރަށުގެ ރައްޔިތުން ދަނީ އެދެމުން.
1121 އާބާދީއެއް އޮންނަ ގދ. ނަޑެއްލާ. | ގދ. ނަޑެއްލާ ކައުންސިލް
މާލެއިން ގދ. ނަޑެއްލާ އަށް ގެންދިޔަ ފެނުގައި ނުބައި ރަހެއް ލާ މައްސަލަ ބޮޑުވެ، ރައްޔިތުންގެ މެދުގައި ކަންބޮޑުވުންތަކެއް އުފެދިއްޖެ އެވެ.
ރާއްޖެއެމްވީ. އަށް މައުލޫމާތު ދިން އާއްމުގެ މީހަކު ބުނީ، މިހާރު ގޭބިސީތަކަށް ދޫކުރާ ފެނުގައި ރަހައެއް ހުންނަ ކަމަށާއި، އެކަން މިދިޔަ އާދިއްތަ ދުވަހު ފާހަގަކުރެވިފައިވާ ކަމަށެވެ. އަދި އެއީ ކިހިނެއް ދިމާވާ މައްސަލައެއްތޯ ބެލުމަށް ކަމާ ގުޅުންހުރި އިދާރާތަކަށް ޝަކުވާ ހުށަހަޅާފައިވާ ކަމަށް އޭނާ ބުންޏެވެ.
މި މައްސަލައާ ގުޅިގެން އެރަށުގެ ކައުންސިލްގެ ރައީސް މުޙައްމަދު އަންޝާއު ވިދާޅުވީ މާލެއިން 26 ޓަނުގެ ފެން ގެނެސްފައިވާ ކަމަށާއި، ފެން ތާންގިތަކަށް އަޅައި، ރެޕިއުޓް ކުރިފަހުން ފެނުގައި ރަހައެއް ހުންނަ ކަމުގެ ޝަކުވާ ލިބިފައިވާ ކަމަށެވެ. އޭނާ ވިދާޅުވީ މިހާރު ފެން ދޫކުރި ނަމަވެސް ސާމްޕަލްތައް ނަގާފައިވާ ކަމަށާއި، ބުރާސްފަތި ދުވަހު މާލެއަށް ފޮނުވާނެ ކަމަށެވެ. އަދި ވިދާޅުވީ އެމަސައްކަތް ފެނަކައިން ކުރަމުންދާ ކަމަށެވެ.
1121 އާބާދީއެއް އޮންނަ ނަޑެއްލާގައި ފެނުގެ މައްސަލަ ކުރިމަތިވެފައިވާތީ، ރަށުގެ ތެރޭގައި ވަނީ ކަންބޮޑުވުން އުފެދިފަ އެވެ. އަދި ރަމަޟާން މަހަށްވުމާއެކު، ރައްކާތެރި ސާފު ބޯފެން އަވަހަށް ބޭނުންވާ ކަމަށް އެރަށުގެ ރައްޔިތުން ދަނީ ބުނަމުންނެވެ.
