ށ.ފުނަދޫ ފެނަކަ އޮފީސް ހިންގަން ދީފައިވާ އިމާރާތަށް ކުލި ނުދައްކާތާ 15 މަސް، ނޯޓިސް ދީގެން ވެސް ތަން ހުސް ނުކުރޭ!
ށ. ފުނަދޫގައި ފެނަކަ އޮފީސް ހިންގުމަށް 2022 ވަނަ އަހަރު ކުއްޔަށް ހިފި 4000 އަކަފޫޓުގެ އިމާރާތުގެ އެގްރީމެންޓް އާނުކުރުމުންނާއި ކުލި ނުދައްކާތީ ، ތަން ހުސްކުރުމަށް މިއަހަރުގެ ކުރީކޮޅު ވަނީ ނޯޓިސް ދީފަ. ނަމަވެސް، މި މައްސަލައިގައި ކަމާބެހޭ ފަރާތްތަކާ ވާހަކަދައްކައިގެން ކުލި ހޯދުމަށް މަސައްކަތް ކުރަމުންދާއިރު، ރޯދަ މަހުގެ ކުރިން ފައިސާ ލިބޭނެ ކަމުގެ އިޝާރާތެއް ކުރިން ލިބުނު ނަމަވެސް އެކަން އެހެން ހިނގާފަ އެއް ނުވޭ.
ށ.ފުނަދޫ ފެނަކަ އިމާރާތް | ސޯޝަލް މީޑިއާ
ށ.ފުނަދޫ ފެނަކަ އޮފީސް ހިންގަން ދީފައިވާ އިމާރާތަށް ކުލި ނުދައްކާތާ 15 މަސް ދުވަސް ވެފައިވާ ކަމާއި، ތަން ހުސްކުރުމުގެ ނޯޓިސް ދީގެން ވެސް އެ އިމާރާތް ހުސްކޮށްފައި ނުވާކަން ހާމަވެއްޖެ އެވެ.
ށ.ފުނަދޫ ރަސްފަން ގައި ފެނަކަ އިމާރާތް ޤާއިމްކޮށްފައިވާ އިރު އެ ތަނަށް މަހު ކުލީގެ ގޮތުގައި 15،000 ރުފިޔާ އެވެ. އެހެން ކަމުން މިހާތަނަށް އައި އިރު އެތަނަށް ފެނަކައިން ދައްކަން ޖެހޭ ކުލީގެ ތެރެއިން، ނުދައްކާ 225،000 އަށް ވުރެ ގިނަ ރުފިޔާ އެބަ ވެ އެވެ.
އެ އިމާރާތުގެ ވެރިފަރާތް އަބްދުއްރައޫފް އަލީ ރާއްޖެ އެމްވީ އަށް މައުލޫމާތު ދެމުން ބުނީ އެ ތަނުން ލިބެން ޖެހޭ ކުލީގެ ފައިސާ ހޯދުމަށް އޭނާ ތަކުރާރުކޮށް މަސައްކަތް ކޮށްފައިވާނެ ކަމަށެވެ. އަދި ތަކުރާރުކޮށް މަސައްކަތް ކޮށްގެން ވެސް ފައިސާ ނުލިބުމުން އެ ޝަކުވާ އާއި ކަންބޮޑުވުންތައް މީސްމިޑީއާގައި ވެސް ހިއްސާކޮށްފައިވާނެ ކަމަށް އޭނާ ވަނީ ބުނެފަ އެވެ. ރޯދައިގެ ކުރިން ކުލީގެ ފައިސާ ދައްކާ ޚަލާސް ކުރާނެ ކަމަށް މި ހިނގާ ފެބްރުއަރީ މަހު ފެނަކައިން ބުނި ނަމަވެސް ފަހުން ރައޫފް ގުޅުމުން ފޯނުވެސް ނުނަގާ ކަމަށް އޭނާ ވަނީ ބުނެފަ އެވެ.
"15 މަސް ދުވަސް ވީ މި ތަނަށް ލިބެން ޖެހޭ އެއްވެސް ފައިސާ އެއް ނުލިބޭ. މިއީ ވަރަށް ބޮޑު ކަންބޮޑުވުމެއް." ރައުފް ވަނީ ބުނެފަ އެވެ.
އޭނާ އިތުރަށް ބުނި ގޮތުގައި ކުލި ނުދެއްކުމުގެ އިތުރުން އެ ތަނުގެ އެގްރީމެންޓް ގެ މުއްދަތު ވެސް ވަނީ މިހާރު ހަމަވެފަ އެވެ. 2024 ވަނަ އަހަރު އެ ތަނުގެ ކުލީގެ އެއްބަސްވުން ހަމަވެފައިވާ ކަމަށާއި އެގްރީމެންޓް އާ ނުކުރެވި ވަނީ ށ.ފުނަދޫ ފެނަކަ އޮފީހުގެ އިހުމާލުން ކަމަށް ވެސް ރައުފް ވަނީ ބުނެފަ އެވެ.
ރައުފް ބުނި ގޮތުގައި އެގްރިމެންޓް ހަމަވެފައި ވަނީ 2024 ޑިސެމްބަރ 31ގަ އެވެ. އޭގެ ފަހުން އެގްރީމެންޓް އާ ނުކޮށްގެން އެކަމުގެ ކަންބޮޑުވުން ހިއްސާކުރި ނަމަވެސް އެދެވޭ ޖަވާބެއް ލިބިފައި ނުވާ ކަމަށް އޭނާ ވަނީ ބުނެފަ އެވެ.
" ފެނަކައިގެ އެކި ފަންތީގެ މީހުންނާއި މި ވާހަކަ ވެސް ހިއްސާ ކުރިން. މި ކޮޅުން އެގްރީމެންޓް ހެދުމުގެ މަސައްކަތް ކުރާ މީހުންނާއި ވެސް ވާހަކަ ދެއްކިން. މި ކޮޅުން ބުނި ބަލަނީ އޭ. " ރައޫފް ބުނެފަ ވަނީ އެވެ.
ކުލި ނުދައްކާތީ ތަން ބޭނުން ނުވާ ނަމަ އެ ތަން ހުސްކުރުމަށް ދެ ފަހަރެއްގެ މަތިން އަންގާފައިވާނެ ކަމަށް ވެސް ރައޫފު ބުނެފަ އެވެ. އެގޮތުން މި އަހަރު ކުރީކޮޅު ވެސް އެ ތަން ހުސްކުރުމަށް ނޯޓިސް ދީފައިވާނެ ކަމަށާއި އެ ކަމަށް ވެސް ފެނަކައިން އިޖާބަ ދީފައި ނުވާ ކަމަށް އޭނާ ވަނީ ބުނެފަ އެވެ. ރއުފް ވަނީ މިއީ އޭނާ އަށް ލިބޭ ވަރަށް ބޮޑު ގެއްލުމެއްކަން ފާހަގަކޮށްފަ އެވެ.
ފެނަކަ ހިންގުމަށް މި ގެ ކުއްޔަށް ދީފައި ވަނީ 2022 ވަނަ އަހަރު އެވެ. އެ ތަނަކީ 4000 އަކަފޫޓުގެ ތަނެކެވެ.
