ނޮޅިވަރަންފަރުން ކަރަންޓު ކެނޑުން: އަލުން ޚިދުމަތް ދެވުނީ ގާތްގަނޑަކަށް 19 ގަޑިއިރު ފަހުން!
25 ފެބުރުއަރީ 2026 | ބުދަ 08:59ފެނަކައިން މިހާރު ޓެސްޓު ބުރުތަކަކަށް ކަރަންޓު ދޫކުރި ނަމަވެސް، ރަށުގެ އާބާދީއާ ނުބައްދަލު އިންޖީނުތަކެއް ހުރުމާއި ބެކަޕް ޖަނަރޭޓަރެއް ނެތުމުން ދާއިމީ ހައްލެއް ނުލިބޭތީ ކައުންސިލުން ވަނީ ކަންބޮޑުވުން ފާޅުކޮށްފައި. އެރަށުގެ ކަރަންޓުގެ ހާލަތު ރަނގަޅު ކުރުމަށް 1 މެގަވޮޓްގެ ދެ ޖަނަރޭޓަރު ބޭނުންވާ ކަމަށް ކައުންސިލުން ބުނޭ.
ހދ.ނޮޅިވަރަންފަރު. އެރަށަށް މިހާރު ކަރަންޓު ދޫކޮށްފައިވަނީ ޓެސްޓަކަށް ކަމަށް ކައުންސިލުން ބުނޭ. | ސޯޝަލްމީޑިއާ
ހދ. ނޮޅިވަރަންފަރުން އަންގާރަ ދުވަހު ކަރަންޓުގެ ކެނޑުނުއިރު، އަލުން ޚިދުމަތް ދެވުނީ ގާތްގަނޑަކަށް 19 ގަޑިއިރު ފަހުން ކަމަށް އެރަށުގެ ކައުންސިލުން ބުނެފި އެވެ.
ނޮޅިވަރަންފަރުން ކަރަންޓު ކެނޑިގެން ދިޔައީ އަންގާރަ ދުވަހުގެ ހެނދުނު ގާތްގަނޑަކަށް 6:30 ހާއިރު އެވެ.
މި މައްސަލައާ ގުޅިގެން ބުދަ ދުވަހު، ރާއްޖެޓީވީގެ ފަށާއިރު ޕްރޮގްރާމްގެ ތެރެއިން ކައުންސިލަށް ގުޅުމުން ބުނީ، ކަރަންޓުގެ ޚިދުމަތް ލިބުނީ އަންގާރަ ދުވަހުގެ ރޭ މެންދަމު ގާތްގަނޑަކަށް 3:00 ހާއިރު ކަމަށެވެ.
ކަރަންޓު މިހާރު ޓެސްޓަށް ދޫކޮށްފައި އޮތީ. އިންޖީނެއް ނުގެނޭ. ދެން މިދިމާވި މައްސަލައަކީ ޕެނަލް ބޯޑެއްގައި ރޯވެފައި. 800 ކިލޯ ޖަނަރޭޓަރުގެ އެއްޗެއް އަނދައި ހަލާކުވެ ގޮސްފައި މިއޮތީ. ދެން އެއްޗެހި ގެނެސްގެން މީހުން ގެނެސްގެން މަސައްކަތް މިކުރީ.ނޮޅިވަރަންފަރު ކައުންސިލް
ކައުންސިލުން ބުނީ، އަންގާރަ ދުވަހު ކަރަންޓު ކެނޑުމުން ޚިދުމަތްތަކަށް ވަރަށް ބޮޑަށް ބުރޫ އެރި ކަމަށާއި، ރައްޔިތުން ދުވަސް ހޭދަ ކޮށްފައިވަނީ ވަރަށް ތަކުލީފުގައި ކަަމަށެވެ. އަދި މިހާރު ފެނަކައިން ކަރަންޓު ދޫކޮށްފައިވަނީ ޓެސްޓަކަށް ކަމަށާއި، ދާއިމީ ހެއްލެއް ހޯދުނުކަން އަދި ސާފުނުވާ ކަމަށް ކައުންސިލުން ބުނެ އެވެ.
ނޮޅިވަރަންފަރުގެ 800 ކިލޯ ވޮޓްގެ ޖަނަރޭޓަރުގެ ޑައިނަމޯ އަށް މައްސަލަ ދިމާވެ މުޅި ރަށުން ކަރަންޓު ކެނޑިފައިވާއިރު، މި ޖަނަރޭޓަރަކީ މިދިޔަ އަހަރުގެ އެޕްރީލް މަހު އެރަށަށް ފޮނުވި ޖަނަރޭޓަރެކެވެ.
ނޮޅިވަރަންފަރުގެ ފެނަކައިގައި 3 ޖަނަރޭޓަރެއް ހުރެ އެވެ. އެއީ މިހާރު މައްސަލަ ދިމާވެގެން އުޅޭ 800 ކިލޯ ވޮޓްގެ ޖަނަރޭޓަރުގެ އިތުރުން 600 އަދި 400 ގެ ޖަނަރޭޓަރެކެވެ. ނަމަވެސް 600 ކިލޯ ވޮޓްގެ ޖަނަރޭޓަރު ހަލާކުވެފައި ހުންނަތާ އެތައް ދުވަހެއް ވަނީ ވެފަ އެވެ.
އެރަށުގެ ކަރަންޓުގެ މައްސަލައާ ގުޅިގެން ކަންބޮޑުވުން ފާޅު ކުރައްވައި، ކައުންސިލްގެ ރައީސް އަބްދުﷲ ނަދީމް ވިދާޅުވީ، އާބާދީ އަށް އައިސްފައިވާ ބަދަލާއެކު ކަރަންޓް ބޭނުންކުރާ މިންވަރު އިތުރުވި ނަމަވެސް ނޮޅިވަރަންފަރު ފެނަކައިގައި ބެކަޕް ޖަނަރޭޓަރެއް ނެތް ކަމަށެވެ. އަދި މިހާރުގެ ހާލަތަށް ބަލާނަމަ ބޭނުންވަނީ 1 މެގަ ވޮޓްގެ 2 ޖަނަރޭޓަރު ކަމަށާއި، މިދިޔަ ސަރުކާރުގައި ވެސް އަދި މި ސަރުކާރުގައި ވެސް އެދިގެން އެކަމަށް އެދެވޭ ޖަވާބެއް ލިބިފައި ނުވާ ކަމަށެވެ.
މި މައްސަލައާ ގުޅިގެން ފެނަކާގެ ބަހެއް ވަނީ ލިބޭ ގޮތް ނުވެފަ އެވެ.
