ރައީސް މުއިއްޒުގެ ސަރުކާރުން މިދިޔަ އަހަރު ފޮނުވި ޖަނަރޭޓަރު ހަލާކުވެ ނޮޅިވަރަންފަރު އަނދިރީގައި
ހދ. ނޮޅިވަރަންފަރުގެ މައި ޖަނަރޭޓަރަށް ދިމާވި މައްސަލައަކާ ގުޅިގެން މުޅި ރަށުން ކަރަންޓު ކެނޑި، ތިން ސަރަހައްދަކަށް ބަހާލައިގެން ކަރަންޓު ދޭން ފަށައިފި. ރަށުގެ ކައުންސިލުން ބުނި ގޮތުގައި މިހާރު ކަރަންޓު ދެމުންދަނީ 400 ކިލޯވޮޓްގެ ޖަނަރޭޓަރަކުން ކޮންމެ ސަރަހައްދަކަށް 30 މިނެޓަށް. މައްސަލަ ދިމާވެގެން އުޅެނީ ރައީސް މުއިއްޒުގެ ސަރުކާރުން އެރަށަށް ފޮނުވި 1 އަހަރު ދުވަސް ނުވާ ޖަނަރޭޓަރަށް.
ނޮޅިވަރަންފަރު ފެނަކައިގައި ކަރަންޓްދޭން ބޭނުންކުރާ މައި ޖަނަރޭޓަރު ހަލާކުވެ ރަށުން ވަނީ ކަރަންޓު ކެނޑިފައި. | ފެނަކަ
ރައީސް ޑރ. މުހައްމަދު މުއިއްޒުގެ ސަރުކާރުން ހދ. ނޮޅިވަރަންފަރަށް މިދިޔަ އަހަރު ފޮނުވި ޖަނަރޭޓަރު މައްސަލަ ޖެހި މުޅި ރަށުން ކަރަންޓް ކެނޑިއްޖެ އެވެ.
އެންމެ ފުރަތަމަ ނޮޅިވަރަންފަރުން ކަރަންޓު ކެނޑުނީ އަންގާރަ ދުވަހުގެ ހެނދުނު އެވެ. މިކަމާއި ގުޅޭ ގޮތުން ރާއްޖެ ޓީވީ އަށް މައުލޫމާތު ދެއްވަމުން ކައުންސިލްގެ ރައީސް އަބްދުﷲ ނަދީމް ވިދާޅުވީ ފުރަތަމަ ކަރަންޓް ކެނޑުނީ ޕެނަލްގައި ޑީސީ މޮޑިއުލްއެއް ހަލާކުވެގެން ކަމަށެވެ. އެއީ އަންގާރަ ދުވަހުގެ ހެނދުނު ކަމަށާއި، ނަމަވެސް ޕެނަލްގެ މަރާމާތެއް ކޮށްފައި މެންދުރެއް ހާއިރު މުޅި ރަށަށް ކަރަންޓު ދެވުނު ކަމަށެވެ.
ނަމަވެސް 800 ކިލޯ ވޮޓްގެ ޖަނަރޭޓަރުގެ ޑައިނަމޯ އަށް މައްސަލަ ދިމާވެ މުޅި ރަށުން ވަނީ ކަރަންޓު ކެނޑިފަ އެވެ. މި ޖަނަރޭޓަރަކީ މިދިޔަ އަހަރުގެ އެޕްރީލް މަހު އެރަށަށް ފޮނުވި ޖަނަރޭޓަރެކެވެ. ނަދީމް ވިދާޅުވީ 800 ކިލޯ ވޮޓްގެ ޖަނަރޭޓަރު ހަލާކު ވެގެން މިހާރު ކަރަންޓު ދެމުންދަނީ 400 ކިލޯ ވޮޓްގެ ޖަނަރޭޓަރުން ކަމަށެވެ. ނަދީމް ވިދާޅުވީ މުޅި ރަށަށް ކަރަންޓް ދެވޭނީ 800 ކިލޯ ވޮޓްގެ ޖަނަރޭޓަރު މަރާމާތުކޮށްގެން ކަމަށާއި، އެނޫން ގޮތަކަށް އެކަން ނުކުރެވޭނެ ކަމަށެވެ.
އަދި 400 ކިލޯ ވޮޓްގެ ޖަނަރޭޓުން ރަށުގެ 3 ސަރަހައްދަކަށް ބަހާލައިގެން ކަރަންޓު ދެމުންދާ ކަމަށާއި، ކޮންމެ ސަރަހައްދަކަށް ކަރަންޓު ދެމުންދަނީ 30 މިނުޓަށް ކަމަށެވެ. އަދި 30 މިނެޓް ފަހުން އެއް ސަރަހައްދުން ކަރަންޓު ކަނޑާފައި ޖެހިގެން ހުރި ސަރަހައްދަށް ކަރަންޓް ދެމުންދާ ކަމަށެވެ.
ނޮޅިވަރަންފަރު ފެނަކައިގައި 3 ޖަނަރޭޓަރެއް ހުރެ އެވެ. އެއީ މިހާރު މައްސަލަ ދިމާވެގެން އުޅޭ 800 ކިލޯ ވޮޓްގެ ޖަނަރޭޓަރުގެ އިތުރުން 600 އަދި 400 ގެ ޖަނަރޭޓަރެކެވެ. ނަމަވެސް 600 ކިލޯ ވޮޓްގެ ޖަނަރޭޓަރު ހަލާކުވެފައި ހުންނަތާ އެތައް ދުވަހެއް ވަނީ ވެފަ އެވެ. ނަދީމް ވިދާޅުވީ 400 ކިލޯ ވޮޓްގެ ޖަނަރޭޓަރު ހިންގާފައި ހުންނަ ހުރިހާ ވަގުތަކު ސިއްހީ މަރުކަޒަށް ކަރަންޓް ދީފައިވާނެ ކަމަށެވެ.
ނަދީމް ވިދާޅުވީ އާބާދީ އަށް އައިސްފައިވާ ބަދަލާއެކު ކަރަންޓް ބޭނުންކުރާ މިންވަރު އިތުރުވި ނަމަވެސް ނަޮޅިވަރަންފަރު ފެނަކައިގައި ބެކަޕް ޖަނަރޭޓަރެއް ނެތް ކަމަށެވެ. އަދި މިހާރުގެ ހާލަތަށް ބަލާނަމަ ބޭނުންވަނީ 1 މެގަ ވޮޓްގެ 2 ޖަނަރޭޓަރު ކަމަށާއި، މިދިޔަ ސަރުކާރުގައި ވެސް އަދި މި ސަރުކާރުގައި ވެސް އެދިގެން އެކަމަށް އެދެވޭ ޖަވާބެއް ލިބިފައި ނުވާ ކަމަށެވެ.
ނަދީމް ވަނީ މި ވަގުތު ރައްޔިތުންގެ އެއްބާރުލުން ބޭނުންވާ ކަމަށް ވިދާޅުވެފަ އެވެ. އަދި ކަރަންޓް ދީފައި ހުންނަ ވަގުތުގައި ވީހާވެސް ލޯޑް މަދުން ބޭނުން ކުރުމަށް ވަނީ އެދިފަ އެވެ. އަދި ފެނަކައާއީ ކައުންސިލްގެ ނަމުގައި ރައްޔިތުންގެ ކިބައިން ވަނީ މައާފަށް އެދިފަ އެވެ.
