ކަރަންޓުގެ މައްސަލަ ހައްލު ނުވެ ރޯދަ މަހުގެ ފުރަތަމަ ހުކުރުގައި ވެސް މުޅި އައްޑޫ ސިޓީ ކަރަންޓަށް ޖެހިފައި
20 ފެބުރުއަރީ 2026 | ހުކުރު 08:20މި މައްސަލަ ހައްލުކުރުމަށް ފެނަކައިން މަސައްކަތް ކުރަމުންދާއިރު، އައްޑޫގެ ކަރަންޓުގެ މައްސަލައަށް ދާއިމީ ހައްލެއް ނުލިބި ދިގުލައިގެންދާތީ ގިނަ އާއްމު ރައްޔިތުންނާއި، މޭޔަރު ނިޒާރު ކަންބޮޑުވުންފާޅު ކޮށްފައިވޭ. އަދި ކަރަންޓުގެ މައްސަލައަށް ދާއިމީ ހައްލެއް ހޯދައިދިނުމަށް މިސަރުކާރުން މަސައްކަތް ނުކުރާ ކަމަށް އެސިޓީގެ ގިނަ ރައްޔިތުން ދަނީ ބުނަމުން.
އައްޑޫ ސިޓީ، ފޭދޫ. ގުޅިފައިވާ ހުރިހާ ރަށަކުން ވަނީ ކަރަންޓު ކެނޑިފައި | ގޫގުލް
ކަރަންޓުގެ މައްސަލަ ހައްލު ނުވެ ރޯދަ މަހުގެ ފުރަތަމަ ހުކުރުގައި ވެސް މުޅި އައްޑޫ ސިޓީން ކަރަންޓު ކެނޑިއްޖެ އެވެ.
އައްޑޫއިން ކަރަންޓު ކެނޑިފައިވަނީ ހުކުރު ދުވަހުގެ ހެނދުނު 11:30 ހާއިރު އެވެ.
އައްޑޫ ފެނަކައިން ބުނީ، އިންޖީނަކަށް މައްސަލައެއް ދިމާވެ ޕަވަރ ހައުސް ޑައުންވެފައިވާ ކަމަށެވެ. އަދި އައްޑޫގެ ގުޅިފައިވާ ރަށްތަކުން މިވަގުތު ކަރަންޓުގެ ޚިދުމަތް މެދުކެނޑިފައިވާ ކަމަށެވެ.
މި މައްސަލަ ހައްލު ކުރުމުގެ މަސައްކަތް ކުރަމުންދާ ކަމަށް ފެނަކައިން ބުނެފައިވާއިރު، ކަރަންޓު ލިބޭނެ ކަމަށް ލަފާ ކުރެވޭ ވަގުތެއް ބުނެފައިނުވެ އެވެ.
ހުކުރު ދުވަހު މުޅި އައްޑޫ ސިޓީން ކަރަންޓު ކެނޑިފާއިވާއިރު، މިމަހުގެ 11 ވަނަ ދުވަހު ވެސް އެސިޓީން ވަނީ ކަރަންޓު ކެނޑިފަ އެވެ.
އައްޑޫ ސިޓީއަށް ދިމާވެފައިވާ ކަރަންޓު ކެނޑުމުގެ މައްސަލައަށް ދާއިމީ ހައްލެއް ބޭނުންވާ ކަމަށް މީގެ ކުރިން އެސިޓީގެ މޭޔަރު އަލީ ނިޒާރު ވިދާޅުވެފައިވެ އެވެ. އަދި ރަމަޟާން މަހު ކަރަންޓު ބޭނުން ކުރާ މިންވަރު އިތުރުވާނެ ކަމަށާއި، ކެޕޭސިޓީ ނުހިފަހައްޓާނެ ކަަމުގެ އިންޒާރު ދީފައިވެ އެވެ.
ނަމަވެސް އައްޑޫ ސިޓީގެ ކަރަންޓުގެ މައްސަލައަށް ދާއިމީ ހައްލެއް ހޯދައިދިނުމަށް މިސަރުކާރުން މަސައްކަތް ނުކުރާ ކަމަށް އެސިޓީގެ ގިނަ ރައްޔިތުން ދަނީ ބުނަމުންނެވެ. އަދި ކަރަންޓުގެ ޚިދުމަތަށް މައްސަލައެއް ދިމާވާ ކޮންމެ ފަހަރަކު އެހެން ތަނަކުން ބޭނުންކޮށްފައިވާ ޖަނަރޭޓަރެއް ގެނެސް ވަގުތީ ހައްލެއް ހޯދުމަށް މަސައްކަތް ކުރާތީ އެ ސިޓީގެ ރައްޔިތުން ކަންބޮޑުވުންފާޅު ކޮށްފައިވެ އެވެ.
