ހަމާސް އަށް ލީޑަރަކު އިންތިޚާބު ކުރުމަށް ވޯޓު ލަނީ

ހަމާސް ޖަމާއަތުގެ އިސް އޮފިޝަލަކު ބީބީސީއަށް މައުލޫމާތު ދީފައިވާ ގޮތުގައި، އެ ޖަމާއަތުގެ އާ ވަގުތީ ލީޑަރަކު އިންތިޚާބު ކުރުމުގެ މަސައްކަތް މިހާރު ދަނީ ކުރިއަށެވެ.

މި އިންތިޚާބުގެ ވޯޓުލުން ކުރިއަށްދަނީ ޣައްޒާ އާއި އިޒްރޭލުން ހިފާފައިވާ ހުޅަނގު އައްސޭރީގެ އިތުރުން، އެހެން ގައުމުތަކުގައި ތިބި ހަމާސްގެ މެންބަރުންގެ މެދުގައެވެ.

މި އިންތިޚާބުގެ ނަތީޖާއިން އެ ޖަމާއަތުން ކުރިއަށްދާން ބޭނުންވާ މިސްރާބު ހާމަވެގެންދާނެއެވެ. ޚާއްސަކޮށް، ހަނގުރާމައަށްފަހު ޣައްޒާ ބަލަހައްޓާނެ ގޮތާއި، އެ ސިޓީ އަލުން އާރާސްތުކުރުމުގެ މަސައްކަތްތަކާއި، އެ ސަރަހައްދުގައި ހަރަކާތްތެރިވާ ހަތިޔާރު އެޅި ޖަމާއަތްތަކުގެ މުސްތަގުބަލާ ގުޅޭގޮތުން އެމެރިކާ އާއި މެދުވެރިން މަޝްވަރާ ކުރަމުންދާ ދަނޑިވަޅެއްގައި މި އިންތިޚާބު ވަރަށް މުހިންމު ކަމަށް ބީބީސީ އިން ބުނެފައިވެ އެވެ.

މި އިންތިޚާބު ބާއްވަން މި ނިންމީ، 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަމާސްއިން އިޒްރޭލަށް ދިން ހަމަލާތަކާ ގުޅިގެން، އިޒްރޭލުން ދިން ހަމަލާތަކުގައި ހަމާސްގެ އިސް ލީޑަރުންގެ ތެރެއިން ގިނަ ބަޔަކު ޝަހީދުވެފައި ވަނިކޮށެވެ. 

މައުލޫމާތު ދިން މަސްދަރުން ބުނި ގޮތުގައި، ޣައްޒާގައި ތިބި މީހުން މިހާރު ވަނީ ސިއްރުން ވޯޓުލާފައެވެ. ނަމަވެސް އެހެން ސަރަހައްދުތަކުގައި ވޯޓުލުން ނިމިފައިވާކަން އަދި ސާފެއް ނުވެއެވެ. އާ ލީޑަރު އިއުލާނު ކުރުމުން، އެ ބޭފުޅަކު އެ މަގާމުގައި އެއް އަހަރު ދުވަހު ދެމިހުންނަވާނެއެވެ.

ހަމާސްއަކީ ޣައްޒާގައި ވެރިކަން ކުރާ ޖަމާއަތެވެ. އަދި ފަހަކަށް އައިސް ހުޅަނގު އައްސޭރީގައި ވެސް އެ ޖަމާއަތަށް އޮތް ތާއީދު ވަނީ އިތުރުވެފައެވެ. ނަމަވެސް، އިޒްރޭލުގެ އަސްކަރިއްޔާ އާއި ފަލަސްތީން އޮތޯރިޓީގެ ސަލާމަތީ ބާރުތަކުގެ ސަބަބުން އެ ސަރަހައްދުގައި ހަމާސްގެ ހަރަކާތްތަކަށް ބޮޑެތި ހުރަސްތަކެއް ކުރިމަތިވެފައިވެއެވެ.

އެމެރިކާގެ ތާއީދާއެކު ޣައްޒާގައި ހަމަލާ ބަދަލުކުރުން ހުއްޓާލުމުގެ އެއްބަސްވުމެއް އޮކްޓޫބަރު މަހު އަމަލީ ގޮތުން ފެށިފައިވާއިރު، އެ އެއްބަސްވުމުގެ ފަހުގެ މަރުހަލާތަކާ ގުޅޭގޮތުން މަޝްވަރާތައް އަދިވެސް ދަނީ ކުރިއަށެވެ.

އެމެރިކާގެ ޕްލޭންގައި ހުށަހަޅާފައިވާ ގޮތުން، ކުރިމަގުގައި ޣައްޒާގެ ވެރިކަމުގެ އެއްވެސް ދައުރެއް ހަމާސްއަކަށް ނޯންނާނެއެވެ. އޭގެ ބަދަލުގައި، އިސްލާހީ ބަދަލުތަކަކަށްފަހު، މިހާރު ހުޅަނގު އައްސޭރީގެ ބައެއް ސަރަހައްދުތަކުގައި ވެރިކަން ކުރާ ފަލަސްތީން އޮތޯރިޓީއާ ޣައްޒާގެ ވެރިކަން ހަވާލުކުރުމަށް ވަނީ ހުށަހަޅާފައެވެ.

ހަމާސްގެ އެންމެ އިސް ލީޑަރު ޔަހްޔާ ސިންވާރު 2024 ވަނަ އަހަރުގެ އޮކްޓޫބަރު މަހު އިޒްރޭލު ސިފައިން ޣައްޒާގައި ޝަހީދުކޮށްލާފައިވާއިރު، އެ ޖަމާއަތުގެ ސިޔާސީ ގޮފީގެ ލީޑަރު އިސްމާއިލް ހަނިއްޔާ އަވަހާރަކޮށްލާފައިވަނީ އެ އަހަރުގެ ޖުލައި މަހު އީރާނަށް ދިން ހަމަލާއެއްގައެވެ. މީގެ އިތުރުން، ހަމާސްގެ އަސްކަރީ ކޮމާންޑަރު މުހައްމަދު ދައިފް ވެސް ވަނީ އެ އަހަރުގެ ޖުލައި މަހު ޣައްޒާއަށް ދިން ވައިގެ ހަމަލާއެއްގައި ޝަހީދުކޮށްލާފައެވެ.

ހަނިއްޔާ އާއި ސިންވާރު ޝަހީދުވުމަށްފަހު، ހަމާސްގެ އެންމެ އިސް ލީޑަރުގެ މަގާމު އޮތީ ހުސްކޮށެވެ. ސިންވާރު ޝަހީދުވުމުން، ގަތަރުގައި ހުންނަވާ މުހައްމަދު ދަރުވީޝް އިސްކޮށް ހުންނަވައިގެން އެކުލަވާލި ވަގުތީ ކޮމިޓީއަކުން މިހާރު ދަނީ އެ ޖަމާއަތް ހިންގަމުންނެވެ.

ހަމާސްގެ ހިންގާ ގަވާއިދުތައް ބުނާގޮތުން، އެ ޖަމާއަތުގެ ލީޑަރު ހޮވަނީ ޣައްޒާ، ހުޅަނގު އައްސޭރި، އިޒްރޭލުގެ ޖަލުތަކުގައި ތިބި ފަލަސްތީނުގެ އަސީރުން އަދި ގައުމުން ބޭރުގައި ތިބި އޮފިޝަލުން ތަމްސީލުކުރާ "ޖެނެރަލް ޝޫރާ ކައުންސިލް" ގެ 86 މެންބަރުންގެ މައްޗަށް އެކުލެވޭ އިލެކްޓޯރަލް ކޮލެޖަކުންނެވެ.

އޮފިޝަލް މައުލޫމާތު ދެއްވި ގޮތުގައި، މި އިންތިޚާބުގައި މައިގަނޑު ގޮތެއްގައި ވާދަކުރައްވަނީ ދެ ބޭފުޅެކެވެ. އެއީ:

އޭގެ ތެރެއިން އެއް ބޭފުޅަކީ ޣައްޒާގައި ހުންނަވާ ހަމާސްގެ އިސްވެރިޔާ ޚަލީލް އަލް-ހައްޔާ އެވެ. އޭނާއަކީ ސިންވާރު އަދި ހަނިއްޔާގެ ފިކުރާ އެއްގޮތަށް މަސައްކަތް ކުރައްވާ ބޭފުޅެއްގެ ގޮތުގައި ބެލެވޭ ބޭފުޅެކެވެ. ދެން ވާދަކުރައްވަނީ ގައުމުން ބޭރުގައި ހުންނަވާ ހަމާސްގެ އިސްވެރިޔާ ޚާލިދު މަޝްއަލް އެވެ. އޭނާއަކީ ގާތްގަނޑަކަށް ވިހި އަހަރު ވަންދެން ހަމާސްގެ އެންމެ އިސް ލީޑަރުގެ މަގާމު ފުރުއްވާފައިވާ، އެ ޖަމާއަތުގެ ތަޖުރިބާކާރު ބޭފުޅެކެވެ.

މަޝްއަލް މިހާރު ދިރިއުޅުއްވަނީ ގަތަރުގެ ދޯހާގައެވެ.

އޮކްޓޫބަރު 7 ގެ ހަމަލާއަށްފަހު ފެށުނު ހަނގުރާމައިގެ ސަބަބުން ހަމާސްގެ އެތެރޭގެ ސިޔާސީ މަސްރަހަށް ބޮޑެތި ބަދަލުތަކެއް ވަނީ އައިސްފައެވެ. އިޒްރޭލުގެ ހަމަލާތަކުގައި ހަމާސްގެ އިސް ބޭފުޅުން އަވަހާރަވެ، އެ ޖަމާއަތުގެ އަސްކަރީ އަދި ސިޔާސީ އޮނިގަނޑަށް ބޮޑެތި ގެއްލުންތަކެއް ލިބިފައިވުމުން، ޣައްޒާގައި ތިބި ލީޑަރުންގެ ނުފޫޒު ވަނީ ކުޑަވެފައެވެ.

ހަމާސްއިން ހިންގާ ހެލްތު މިނިސްޓްރީން ބުނާ ގޮތުގައި، ޣައްޒާގައި މިހާތަނަށް 72،000 އަށްވުރެ ގިނަ މީހުން ވަނީ ޝަހީދުވެފަ އެވެ. 

ވޭތުވެދިޔަ އަހަރުތަކުގައި ހަމާސްގެ އެތެރޭގައި ދެ ފިކުރެއްގެ މެދުގައި ވާދަވެރިކަން އޮވެއެވެ.

އެއް ފިކުރަކީ މުސްލިމް ބްރަދަހުޑާ ގުޅުން އޮންނަ، މަޝްއަލް އާއި ގައުމުން ބޭރުގައި ތިބި ލީޑަރުން ތަމްސީލުކުރާ ފިކުރެވެ. މުހައްލިލުން ދެކޭ ގޮތުގައި މިއީ ކަންކަމުގައި ދޫދޭ، މާ ބޮޑަށް ހަރުކަށި ނޫން ފިކުރެކެވެ.

އަނެއް ފިކުރަކީ ހަމާސްއަށް މާލީ އަދި ހަތިޔާރުގެ އެހީތެރިކަން ފޯރުކޮށްދޭ އީރާނާ ގާތް ގުޅުމެއް ބާއްވާ ފިކުރެވެ. މި ފިކުރު އެންމެ ބޮޑަށް ތަމްސީލުކުރީ ސިންވާރު އާއި ޣައްޒާގެ އެތެރޭގައި ތިބި ލީޑަރުންނެވެ.

2017 ވަނަ އަހަރު ހަނިއްޔާ ސިޔާސީ ގޮފީގެ ވެރިޔަކަށްވެ، ސިންވާރު ޣައްޒާގެ ލީޑަރުކަމާ ހަވާލުވުމުން، ހަމާސްގެ ނިންމުންތައް ނިންމުމުގެ ބާރު ބޮޑަށް ބަދަލުވެގެންދިޔައީ ޣައްޒާގެ އެތެރެއަށެވެ.

ނަމަވެސް، މިހާރު ކުރިއަށްދާ ހަނގުރާމައިގެ ސަބަބުން، މަޝްއަލްއާ ގުޅުން އޮންނަ "ކުރީގެ ލީޑަރުންނަށް" އަލުން ފުރުސަތުތަކެއް ހުޅުވިފައިވާ ކަމަށް ފެނެއެވެ.

ހަމާސްގެ އެތެރޭގެ ގަވާއިދުތައް ބުނާގޮތުން، އެ ޖަމާއަތުގެ ސިޔާސީ ލީޑަޝިޕް އެކުލެވިގެންވަނީ 18 މެންބަރުންގެ މައްޗަށެވެ. އެއީ ޣައްޒާ ތަމްސީލުކުރާ 6 މެންބަރުންނާއި، ހުޅަނގު އައްސޭރި އާއި އަސީރުން ތަމްސީލުކުރާ 6 މެންބަރުންގެ އިތުރުން، ގައުމުން ބޭރުގައި ތިބި ހަމާސްގެ މެންބަރުން ތަމްސީލުކުރާ 6 މެންބަރުންނެވެ.

މަޝްވަރާތަކުގެ މައުލޫމާތު އެނގޭ އޮފިޝަލުން ބުނާ ގޮތުގައި، ގިނަ އަހަރުތަކެއް ވަންދެން ޣައްޒާގެ ލީޑަރުންގެ ކޮންޓްރޯލްގެ ދަށުގައި ނިންމުންތައް ނިންމުމަށްފަހު، މިހާރު އަލުން "ކުރީގެ ލީޑަރުންގެ" ނުފޫޒު ގަދަވަމުންދާ ކަމަށް ފެނެއެވެ.

ހަނގުރާމައިގެ ސަބަބުން ޣައްޒާ ސުންނާފަތިވެ، ސިޔާސީ މަސްރަހު ބަދަލުވަމުންދާ މި ދަނޑިވަޅުގައި، އާ ލީޑަރަކު ހޮވުމަކީ ކުރިއަށް އޮތް އަހަރުގެ ތެރޭގައި އެތެރެ އާއި ބޭރުން ކުރިމަތިވާ ފިއްތުންތަކާ ހަމާސްއިން ކުރިމަތިލާނެ ގޮތް ކަނޑައެޅުމުގައި އެޅޭ ވަރަށް މުހިންމު ފިޔަވަޅެއް ކަމަށް ރިޕޯޓުތައް ބުނެ އެވެ.