ރަޝިޔާގެ ފޮރިން މިނިސްޓަރު ލަވްރޮވްގެ ފޯނު ކޯލެއް، ސައުދީގެ ފޮރިން މިނިސްޓަރު ފައިޞަލް އަށް

ރަޝިޔާގެ ފޮރިން މިނިސްޓަރު ސާގޭ ލަވްރޮވް، ސައުދީ އަރަބިއްޔާގެ ފޮރިން މިނިސްޓަރު ޕްރިންސް ފައިޞަލް ބިން ފަރުޙާން އަށް ފޯނުން ގުޅުއްވައި މަޝްވަރާ ކުރައްވައިފި އެވެ. 

މި މަޝްވަރާ ކުރައްވާފައި ވަނީ ހުކުރު ދުވަހުގެ ވަގުތެއްގަ އެވެ. ސައުދީގެ ފޮރިން މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އެ ފޯނު ކޯލުގައި ދެ ޤައުމުގެ ދެމެދުގައިވާ ގުޅުމާ ގުޅޭ ގޮތުން މަޝްވަރާ ކުރައްވާފައިވާ ކަމަށެވެ. އަދި ދެ ޤައުމުގެ ދެމެދުގައި، ފައިދާ ހުރި ދާއިރާ ތަކުން ގުޅުން ބަދަހި ކުރުމާ ގުޅޭ ގޮތުން ވެސް މަޝްވަރާ ކުރައްވާފައިވާ ކަމަށް ބަޔާނުގައި ވަނީ ބުނެފަ އެވެ. 

މީގެ އިތުރުން އެ ފޯނު ކޯލުގައި ވަނީ ދެ ޤައުމާ ހަމައަށް އައިސްފައިވާ މައްސަލަ ތަކާއި، ބައިނަލްއަޤުވާމީ މަސްރަހުގައި ހުރި މައްސަލަތަކާ ގުޅޭ ގޮތުން ވެސް މަޝްވަރާ ކުރައްވާފައި އެވެ. އޭގެ ތެރޭގައި ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގެ މަޝްވަރާ ހިމެނޭ ކަމަށް ރިޕޯޓު ތަކުގައި ބުނެފައިވެ އެވެ. 

ސައުދީ އަރަބިއްޔާ އާއި، ރަޝިޔާ އަކީ ބައިނަލްއަޤުވާމީ ދާއިރާގައި މުހިންމު ދައުރެއް އަދާ ކުރާ ދެ ޤައުމެވެ. އަދި ދެ ޤައުމަކީ ވެސް އޮޕެކް ޕްލަސް ޖަމާއަތުގެ މުހިންމު ބައިވެރިންނެވެ. ދެ ޤައުމުގެ ދެ މެދުގައި ތެލާއި، ގޭހުގެ ވިޔަފާރީ އާއި، އިޤްތީޞާދީ ގުޅުން ވަރުގަދަ ކުރުމުގައި ގިނަ މަޝްވަރާ ތަކެއް ކުރަމުން އަންނަ ކަމަށް މީޑިއާ ތަކުގައި ވަނީ ރިޕޯޓު ކޮށްފަ އެވެ. 

ހަމަ އެހެންމެ، ސައުދީ އަރަބިއްޔާ އާއި، ރަޝިޔާއާ ދެމެދު ގުޅުން ބަދަހި ކުރުމަށް ފަހަކަށް އައިސް ގިނަ މަސައްކަތް ތަކެއް ކުރެވެމުން އަންނައިރު، ދެ ޤައުމުގެ ވެރިންނާއި، އިސްވެރިން ވަރަށް ގިނައިން ބައްދަލު ވެސް ކުރައްވައި، މަޝްވަރާ ކުރެއްވުން ކުރިއަށް ގެންދެ އެވެ. 

މެދު އިރުމަތީގެ ސިޔާސީ ޙާލަތާއި، ބައިނަލްއަަޤުވާމީ ދާއިރާގައި ހިނގަމުންދާ ކަންކަމާ ގުޅޭ ގޮތުން ސައުދީ އަރަބިއްޔާ އާއި، ރަޝިޔާއާ ދެމެދު މަޝްވަރާ ކުރުމަކީ ދާއިމީ ގޮތެއްގައި ކުރެވެމުން  އަންނަ ކަމެކެވެ. މި ދެ ޤައުމުގެ ފޮރިން މިނިސްޓަރުން ވަނީ ވަކި ވަކި ބައިނަލްއަޤުވާމީ މައްްސަލަތަކާ ގުޅިގެން މީގެ ކުރިން ވެސް މަޝްވަރާ ކުރައްވައިފަ އެވެ.