ރަޝިޔާގައި ވަޓްސްއެޕް މުޅިން ބްލޮކްކުރަން އުޅޭ ކަމަށް އެ ކުންފުނިން ބުނެފި

ރަޝިޔާ ސަރުކާރުން މެސެޖިންގ އެޕްތަކަށް އަޅާފައިވާ ހުރަސްތައް އިތުރަށް ވަރުގަދަކުރަމުންދާ ދަނޑިވަޅެއްގައި، އެ ގައުމުގައި ވަޓްސްއެޕް "މުޅިން ބްލޮކްކޮށްލުމަށް" ރަޝިޔާއިން މަސައްކަތް ކުރަމުންދާ ކަމަށް އެ ކުންފުނިން ބުނެފި އެވެ.

މެޓާ ކުންފުނީގެ ދަށުން ހިންގާ ވަޓްސްއެޕުން ބުނި ގޮތުގައި، ރަޝިޔާ ސަރުކާރުގެ މި ނިންމުމުގެ ބޭނުމަކީ އެ ގައުމުގައި ވަޓްސްއެޕް ބޭނުންކުރާ 100 މިލިއަނަށްވުރެ ގިނަ މީހުން، ސަރުކާރުން ފާރަވެރިވާ "ސްޓޭޓް-އޯންޑް ސަވައިލަންސް އެޕް" އަކަށް ބަދަލުކުރުމެވެ.

މި ފިޔަވަޅު އަޅާފައިވަނީ ސަލާމަތީ ރައްކާތެރިކަން ކުޑަކަމަށް ބުނެ، ރަޝިޔާގެ ރެގިއުލޭޓަރުން ޓެލެގްރާމް ބޭނުންކުރުން އިތުރަށް ހަނިކޮށްފައިވާ ދަނޑިވަޅެއްގަ އެވެ. އަންދާޒާކުރެވޭ ގޮތުގައި ރަޝިޔާގައި ވަޓްސްއެޕާ އެއްވަރަށް ޓެލެގްރާމް ބޭނުންކުރާ މީހުން އުޅެ އެވެ.

ވަޓްސްއެޕުން ނެރުނު ބަޔާނެއްގައި ބުނެފައިވަނީ، 100 މިލިއަނަށްވުރެ ގިނަ މީހުން އަމިއްލަ އަދި ރައްކާތެރި މުއާމަލާތްތަކުން އެކަހެރިކުރުމަކީ ފަހަތަށް އެޅޭ ފިޔަވަޅެއް ކަމަށާއި، މީގެ ސަބަބުން ރަޝިޔާގެ ރައްޔިތުންގެ ސަލާމަތާއި ރައްކާތެރިކަން ކުޑަވެގެންދާނެ ކަމަށެވެ.

އަދި ބޭނުންކުރާ ފަރާތްތަކަށް މުއާމަލާތްކުރުމުގެ ފުރުސަތު ފަހިކޮށްދިނުމަށް ކުރެވެން ހުރި ހުރިހާ މަސައްކަތެއް ކުރަމުންދާނެ ކަމަށްވެސް އެ ކުންފުނިން ބުނެފައިވެ އެވެ.

ރަޝިޔާގެ މުވާސަލާތީ ރެގިއުލޭޓަރު "ރޮސްކޮމްނަޑްޒޯ" އިން ވަނީ އެ ގައުމުގެ ގާނޫނުތަކަށް ތަބާވުމަށް ވަޓްސްއެޕަށް ތަކުރާރުކޮށް އިންޒާރު ދީފަ އެވެ.

ރަޝިޔާ ސަރުކާރުގެ މީޑިއާ އެޖެންސީ "ޓާސް" އިން މިއަހަރުގެ ކުރީކޮޅު ރިޕޯޓްކޮށްފައިވާ ގޮތުގައި، 2026 ވަނަ އަހަރުގެ ތެރޭގައި ވަޓްސްއެޕް އެ ގައުމުގައި ދާއިމީކޮށް ބްލޮކްކުރާނެ ކަމަށް ބެލެވެ އެވެ.

ރަޝިޔާގެ އޮފިޝަލެއް ކަމަށްވާ އެންޑްރޫ ސްވިންޓްސޯވްއާ ހަވާލާދީ ރިޕޯޓްކޮށްފައިވާ ގޮތުގައި، މެޓާ އަކީ ހަރުކަށި ފިކުރުގެ ޖަމާއަތެއްގެ ގޮތުގައި ރަޝިޔާއިން ކަނޑައަޅާފައިވާތީ، މިފަދަ ހަރުކަށި ފިޔަވަޅުތައް އެޅުމަކީ "ބުއްދިވެރި" ކަމެކެވެ.

2022 ވަނަ އަހަރު މެޓާ އަކީ ހަރުކަށި ފިކުރުގެ ޖަމާއަތެއްގެ ގޮތުގައި ކަނޑައެޅި ފަހުން، އެ ކުންފުނީގެ އިންސްޓަގްރާމް އަދި ފޭސްބުކް ވަނީ ރަޝިޔާގައި ބްލޮކްކޮށްފަ އެވެ. މިހާރު އެ ގައުމުގައި މި އެޕްތައް ބޭނުންކުރެވެނީ ވާޗުއަލް ޕްރައިވެޓް ނެޓްވޯކް (ވީޕީއެން) މެދުވެރިކޮށް އެކަންޏެވެ.

ރަޝިޔާގެ ރައްޔިތުން، ސަރުކާރުން އުފައްދާފައިވާ "މެކްސް" ކިޔާ މުވާސަލާތީ ޕްލެޓްފޯމަކަށް ބަދަލުކުރުމަށް މޮސްކޯ އިން ދަނީ ބޮޑެތި މަސައްކަތްތަކެއް ކުރަމުންނެވެ.

މި އެޕްލިކޭޝަނަކީ ޗައިނާގެ "ވީޗެޓް" އާ އެއްފަދަ އެޕެކެވެ. މިއީ މެސެޖުކުރުމާއި ސަރުކާރުގެ ޚިދުމަތްތައް އެއްކޮށްލާފައިވާ "ސުޕަރ އެޕް" އެއް ނަމަވެސް، މީގައި އެންކްރިޕްޝަން ނުވަތަ މުއާމަލާތްތައް ސިއްރުކޮށްދޭ ނިޒާމެއް ނުހުރެއެވެ.

ރަޝިޔާއިން ބުނަމުންދަނީ ވަޓްސްއެޕާއި ޓެލެގްރާމުންވެސް، ގާނޫނުގައި ލާޒިމްކުރާ ގޮތަށް ރަޝިޔާގެ ބޭނުންކުރާ ފަރާތްތަކުގެ މައުލޫމާތު އެ ގައުމުގައި ރައްކާކުރުމަށް އިންކާރުކުރަމުންދާ ކަމަށެވެ.

2025 ވަނަ އަހަރުން ފެށިގެން، އެ ގައުމުގައި ވިއްކާ ހުރިހާ އާ ޑިވައިސްތަކެއްގައި "މެކްސް" އެޕްލިކޭޝަން އަޅާފައި ހުރުން ސަރުކާރުން ވަނީ މަޖުބޫރުކޮށްފަ އެވެ. އަދި ސަރުކާރު މުވައްޒަފުންނާއި، މުދައްރިސުންނާއި ދަރިވަރުން މި ޕްލެޓްފޯމް ބޭނުންކުރުން ވަނީ ލާޒިމްކޮށްފަ އެވެ.

ޓެލެގްރާމްގެ ޗީފް އެގްޒެކެޓިވް، ރަޝިޔާއަށް އުފަން ވިޔަފާވެރިޔާ ޕަވެލް ޑޫރޯވް ވިދާޅުވީ، ސަރުކާރުން ޓެލެގްރާމަށް ހުރަސްއަޅަނީ ރައްޔިތުންނަށް ފާރަވެރިވުމަށާއި ސިޔާސީ ގޮތުން މައުލޫމާތު ސެންސަރުކުރުމަށްޓަކައި، ސަރުކާރުގެ އަމިއްލަ އެޕްލިކޭޝަން ބޭނުންކުރުމަށް މަޖުބޫރުކުރުމުގެ ގޮތުން ކަމަށެވެ.

އީރާނުންވެސް ޓެލެގްރާމް މަނާކޮށް، ސަރުކާރުން ހިންގާ އެޕަކަށް ރައްޔިތުން ބަދަލުކުރުމަށް މިފަދަ އުކުޅެއް ބޭނުންކުރި ނަމަވެސް، އެ ގައުމުގެ ރައްޔިތުން އެކަމުން ރެކިގަންނާނެ ގޮތްތައް ހޯދާފައިވާ ކަމަށް އޭނާ އިންޓަނެޓްގައި ލިޔުއްވާފައިވެ އެވެ.

"ރައްޔިތުންގެ މިނިވަންކަން ހަނިކުރުމަކީ ދުވަހަކުވެސް އޭގެ ރަނގަޅު ހައްލެއް ނޫން،" ޑޫރޯވް ވިދާޅުވިއެވެ.