ބޭނުންކޮށްފައިވާ ޕްލާސްޓިކް ފުޅީގައި ކާބޯތަކެތި ބަންދު ކޮށްގެން ނުވިއްކަން އެދިފި.
ބޯފެނާއި ލުއިބުއިންތައް ބަންދުކުރާ، އެއްފަހަރު ބޭނުންކުރާ ޕްލާސްޓިކް ފުޅީގައި ކާބޯތަކެތި އަޅައިގެން ވިއްކުމަކީ ސިއްހީ ނުރައްކަލެއް އޮތް ކަމެއް ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވަނީ ބުނެފަ. މިފަދަ ފުޅިތައް ތަކުރާރުކޮށް ބޭނުންކުރުމުން އޭގެ އަސަރު ކާބޯތަކެއްޗަށް ކޮށް، އިންސާނުންގެ ހަށިގަނޑަށް ގެއްލުންވުމުގެ ފުރުސަތު އޮތުމާއެކު، އެ އަމަލު ހުއްޓާލުމަށް އެ އިދާރާއިން ވަނީ އިލްތިމާސްކޮށްފަ. އެހެންކަމުން ކުރުނބާ ފެނާއި އެކި ބާވަތުގެ ބުއިންތައް މިފަދަ ފުޅިތަކުގައި ބަންދުކޮށްގެން ވިޔަފާރި ނުކުރުމަށް އެ އޮތޯރިޓީން ވަނީ އަންގާފަ.
ސިންގަލް ޔޫޒް ޕްލާސްޓިކް ފުޅީގައި ކުރުނބާ ފެން ވިއްކަނީ | ސޯޝަލް މީޑިއާ
ސިންގަލް ޔޫޒް ނުވަތަ އެއްފަހަރު ބޭނުންކުރާ ޕްލާސްޓިކް ފުޅީގައި ކާބޯތަކެތި ބަންދުކޮށްގެން ނުވިއްކުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެމްޑީއޭ) އިން ބުނެފި އެވެ.
އެމްއެފްޑީއޭ އިން ބުނީ ކާބޯތަކެތީގެ ވިޔަފާރި ކުރާ ފަރާތްތަކުން ބޯ ފެނާއި، ލުއި ބުއިންތައް ހުސް ކޮށްފައިވާ ފުޅިތަކުގައި ކާބޯތަކެތި ބަންދުކޮށްގެން ވިއްކަމުންދާ ކަން ފާހަގަ ކުރެވިފައިވާ ކަމަށެވެ.
މި ފުޅިތަކަކީ އެއް ފަހަރު ބޭނުން ކުރުމަށްފަހު އުކާލާގޮތަށް ވަކިވައްތަރެއްގެ ޕްލާސްޓިކަކުން ތައްޔާރު ކޮށްފައި ހުންނަ ފުޅިތަކެއް ކަމަށް އެ އޮތޯރިޓީ އިން ވަނީ ބުނެފަ އެވެ. އަދި މިއީ ހަމައެކަނި ވަކިކަހަލަ އުފެއްދުންތަކަކަށް ބޭނުން ކުރެވޭ ޕްލާސްޓިކް ގެ ބާވަތެއް ކަމަށާއި ބާޒާރުގައި ތަފާތު އެކި ބާވަތްތަކުގެ ބުއިންތައް މި ފުޅީގައި ބަންދު ކުރާކަން ފާހަގަ ކުރެވިފައިވާ ކަމަށެވެ.
މިއީ މީގެ ސަބަބުން ފުޅިން ޕްލާސްޓިކްގެ އަސަރު ކާބޯތަކެއްޗަށް ކުރުވައި އޭގެ ޒަރީއާ އިން އިންސާނުންގެ ސިއްހަތަށް ނޭދެވޭ އަސަރުކުރުމުގެ ފުރުސަތު އޮތް ކަމެއް ކަމަށް ފުޑް އެންޑް ޑްރަގް އޮތޯރިޓީ އިން ވަނީ ބުނެފަ އެވެ.
އެހެން ކަމުން ބޯ ފެނާއި ލުއިބުއިން ހުސްކުރި މިދަފަ ފުޅިތައް، ކާބޯތަކެތި ބަންދުކުރުމަށް ބޭނުން ނުކުރުމަށް އެ އޮތޯރިޓީ އިން ވަނީ އެދިފަ އެވެ. އެމްއެފްޑީއޭ އިން ބުނީ އެކަމާ ގުޅޭ އިތުރު މައުލޫމާތު އެ އޮތޯރިޓީގެ ނަންބަރު 3034213 އާއި 7603204 އަށް ގުޅުމުން ލިބޭނެ ކަމަށެވެ.
އެމްއެފްޑީއޭ އިން މިހެން ބުނެފައިވާ އިރު، ބާޒާރުގެ އިތުރުން ފިހާރަތަކުގައި ކުރުނބާ ފެނާ، ފަނި ފަދަ ބުއިންތައް ބަންދުކޮށް، ވިއްކަމުން ދަނީ މިފަދަ ފުޅިތަކުގައި ކަން ފާހަގަ ކުރެވެ އެވެ. މީގެ އިތުރުން ވެސް ބައެއް ކަހަލަ އިތުރު ބުއިންތައް ވެސް މިފަދަ ފުޅިތަކުގައި ވިއްކުމަކީ އާންމު ކަމެކެވެ.
