އެއްފަހަރު ބޭނުން ކޮށްފައި އުކާލެވޭ ޕްލާސްޓިކް ފުޅި ބޭނުން ކުރުން ދެ އަހަރަށް ފަސްކޮށްފި

500 މިލިލީޓަރާއި 1 ލީޓަރާ ދެމެދުގެ ޕްލާސްޓިކް ފުޅިތަކުގައި ފެން ބަންދުކޮށް ދިވެހި ރާއްޖެއަށް އެތެރެކުރުމާއި، ރާއްޖޭގައި އުފެއްދުން މަނާ ކުރުމަށް ކުރިން ކަނޑައަޅާފައިވާ ތާރީޚު، 2027 ވަނަ އަހަރުގެ ޑިސެންބަރު މަހުގެ 1 ވަނަ ދުވަހަށް ފަސްކޮށްފި އެވެ.

މި ގޮތަށް ނިންމެވީ، ތިމާވެށްޓަށް ގެއްލުންދޭ ސިންގަލް-ޔޫސް ޕްލާސްޓިކުގެ ބާވަތްތަކުގެ ލިސްޓު ކަނޑައެޅުމާބެހޭ ޤަރާރަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިޞްލާޙުތަކެއް ގެންނެވުމާ ގުޅިގެންނެވެ.

Advertisement

މި ގޮތަށް ނިންމާފައި ވަނީ، ތިމާވެށްޓާއި ފަތުރުވެރިކަމާ ބެހޭ ވުޒާރާގެ ލަފަޔާ އެއްގޮތަށް، ރައީސުލްޖުމްހޫރިއްޔާގެ ޤަރާރު ނަންބަރު 17/2024 ގެ ދަށުންނެވެ.

މި ބަދަލުތައް ގެނެވިފައިވަނީ، ތިމާވެށްޓަށް ގެއްލުންދޭ އެއްފަހަރު ބޭނުންކުރާ ޕްލާސްޓިކްގެ ބާވަތްތަކުގެ ތެރެއިން 500 މިލިލީޓަރާއި 1 ލީޓަރާ ދެމެދުގެ ޕްލާސްޓިކް ފުޅީގައި ބަންދުކޮށްފައިވާ ފެން ދިވެހިރާއްޖެއަށް އެތެރެކުރުމާއި، ދިވެހިރާއްޖޭގައި އުފެއްދުން މަނާކުރުން ތަންފީޒުކުރުމަށް ކަނޑައަޅާފައިވާ ތާރީޚަށާއި، އަދި އެފަދަ ތަކެތި ބާޒާރަށް ނެރުން މަނާކުރުމަށް ކަނޑައަޅާފައިވާ ތާރީޚަށެވެ.

މި އިޞްލާޙު ގެނައުމުގެ ކުރިން، 500 މިލިލީޓަރާއި 1 ލީޓަރާ ދެމެދުގެ ޕްލާސްޓިކު ފުޅީގައި ބަންދުކޮށްފައިވާ ފެން ރާއްޖެއަށް އެތެރެކުރުމާއި އުފެއްދުން މަނާކުރަން ފެށުމަށް ކަނޑައަޅާފައި އޮތީ 1 ޑިސެންބަރު 2025 ގައެވެ. ނަމަވެސް މި އިޞްލާޙާއެކު، އެ ތާރީޚު މިހާރު ވަނީ 1 ޑިސެންބަރު 2027 އަށް ފަސްކޮށްފަ އެވެ. މީގެ އިތުރުން، މި ތަކެތި ބާޒާރަށް ނެރުން މަނާކުރަން ފެށުމަށް ކުރިން ކަނޑައަޅާފައި އޮތީ 1 މާރޗު 2026 ގައެވެ. އެހެންނަމަވެސް، އިޞްލާޙާއެކު މި ތާރީޚު ވަނީ 1 ޖޫން 2028 އަށް ބަދަލުކޮށްފަ އެވެ.

މި އިޞްލާޙުތަކުގެ ތަފްސީލު، ޤަރާރު ނަންބަރު 35/2025 (ތިމާވެށްޓަށް ގެއްލުންދޭ ސިންގަލް-ޔޫސް ޕްލާސްޓިކުގެ ބާވަތްތަކުގެ ލިސްޓު ކަނޑައެޅުން) ގައި ހިމަނައި، ދިވެހި ސަރުކާރުގެ ގެޒެޓުގައި މިހާރު ވަނީ ޝާއިޢުކުރައްވާފަ އެވެ.