ތުއްތު ކުދީންނަށް ކާންދިނުމަށް ބޭނުންކުރާ ފޯމިއުލާއަކުން ވިހަ މާއްދާއެއް ފެނުމާއި ގުޅިގެން ބޭނުން ނުކުރުމަށް އަންގައިފި
މި ވިހަ މާއްދާގެ ސަބަބުން މޭނުބައިކުރުމާއި ހޮޑުލުން ފަދަ ސިއްހީ މައްސަލަތައް ދިމާވެދާނެތީ، ބޭބީ ބަޔޯ އޮޕްޓިމާ 1 އަދި ކެޕްރިއާ 1 ގެ ވަކި ބެޗްތަކެއް ބޭނުންނުކުރުމަށް އެމްއެފްޑީއޭއިން އެދިފައިވޭ. އަދި ރައްކާތެރިކަމުގެ ފިޔަވަޅެއްގެ ގޮތުން ބާޒާރުގައި ހުރި މި ބެޗްތަކުގެ އުފެއްދުންތައް ނައްތާލުމަށް ވެސް ވަނީ އަންގާފައި.
ތުއްތު ކުދީންނަށް ކާންދިނުމަށް ބޭނުން ކުރާ "ބޭބީ ބަޔޯ" | ވައި.ނޮޓްއޯގަނިކް.ކޮމް
ތުއްތު ކުދީންނަށް ކާންދިނުމަށް ތައްޔާރުކޮށްފައިވާ "ބޭބީ ބަޔޯ" ފޯމިއުލާގެ ބައެއް ބެޗްތަކުން ވިހަ މާއްދާއެއް ފެނިއްޖެ އެވެ.
އާދިއްތަ ދުވަހު މޯލްޑިވްސް ފުޑް އެންޑް ގްރަގް އޮތޯރިޓީ (އެމްއެފްޑީއޭ) އިން ބުނީ، ފަރަންސޭސިވިލާތުގައި އުފައްދާފައިވާ ބޭބީބައޯ މަރުކާގެ އިންފެންޓް ފޯމިއުލާގެ ބައެއް ބެޗްތަކުން ސެރެއުލައިޑް ކިޔާ ވިހަ މާއްދާއެއް ފެނިފައިވާ ކަމަށެވެ. މި އުފެއްދުން ބާޒާރުން ނެގުމަށާއި، ނުވިއްކުމަށް އަދި ނައްތާލުމަށް އެގައުމުގެ ކަމާބެހޭ އިދާރާއިން އަންގާފައިވާ ކަމުގެ މައުލޫމާތު ޔޫރަޕްގެ ރެޕިޑް އެލާޓް ސިސްޓަމް ފޮރ ފުޑް އެންޑް ފީޑް ގައި އާއްމު ކޮށްފައިވާ ކަމަށް އެ އޮތޯރިޓީން ބުންޏެވެ.
ސެރެއުލައިޑް އަކީ ބެސިލަސް ސިރިއަސް ޖަރާސީމުން އުފައްދާ ވިހަ މާއްދާ އެއްކަން ފާހަގަކޮށް އެމްއެފްޑީއޭއިން ބުނީ، މި މާއްދާއިން ތަޣައްޔަރުވެފައިވާ އެއްޗެއް ބޭނުން ކުރެވިއްޖެނަމަ މޭނުބައިކޮށް ހޮޑުލުން އަދި ބަނޑުގައި ރިިއްސުން ފަދަ އަލާމާތްތައް ފެނުމަކީ އެކަށީގެންވާ ކަމެއް ކަމަށެވެ.
އަދި ރައްކާތެރިވުމުގެ ފިޔަވަޅެއްގެ ގޮތުން ބޭސީ ބަޔޯ އޮޕްޓިމާ އެކެއްގެ ތިން ބެޗަކާއި ބޭބީ ބަޔާގެ ކެޕްރިއާ އެކެއްގެ އެއް ބެޗް ރާއްޖެއަށް އެތެރެ ނުކުރުމާއި ނުވިއްކުމަށް އަދި ބޭނުން ނުކުރުމަށް އެމްއެފްޑީއޭ އިން އަންގާފަ އެވެ.
މަނާ ކޮށްފައިވާ ބެޗްތަކަކީ
- ބޭބީ ބަޔޯ އޮޕްޓިމާ 1- ބެޗް 900932
- ބޭބީ ބަޔޯ އޮޕްޓިމާ 1- ބެޗް 894408
- ބޭބީ ބަޔޯ އޮޕްޓިމާ 1- ބެޗް 900035
- ބޭބީ ބަޔޯ ކެޕްރިއާ 1- ބެޗް 899014
ކުޑަކުދިންނަށް ދޭ ފޯމިއުލާއަކުން ވިހަ މާއްދާއެއް ފެނި އެ ނުވިއްކަން އަންގާފައިވާއިރު، ދޭތެރެ ދޭތެރެއިން މިފަދަ މައްސަލަތައް ފެންމަތިވެ އެވެ.
