އުކާލާ ތެޔޮ ބޭނުން ކޮށްގެން ކާބޯތަކެތި ތައްޔާރު ކުރާ މައްސަލަ ވަނީ ސަމާލު ކަމަށް އައިސްފައި، ފިޔަވަޅު އަޅާނަން
ރިސޯޓުތަކުން އުކާލާ ތެޔޮ ކާބޯތަކެތި ތައްޔާރު ކުރުމަށް ބޭނުން ކުރުމަކީ މަނާ ކަމެއް
ޞިއްޙަތާ ބެހޭ ވުޒާރާ ހުންނަ އިމާރާތް
ރިސޯޓު ފަދަ ތަންތަނުން އުކާލާ ތެޔޮ ބޭނުން ކޮށްގެން ކާބޯތަކެތި ތައްޔާރު ކުރާ މައްސަލަ ސަމާލު ކަމަށް އައިސްފައިވާ ކަމަށާއި، ފިޔަވަޅު އަޅާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ އިން ބުނެފި އެވެ.
އެ އޮތޯރިޓީން ބުނީ، ބައެއް ފަރާތްތަކުން ކާބޯތަކެތި ތައްޔާރު ކުރުމަށް ރިސޯޓު ފަދަ ތަންތަނުން އުކާލާ ތެޔޮ ބޭނުން ކުރަމުންދާ ކަމާއި، ވިއްކާ ކަމުގެ ޝަކުވާ ލިބިފައިވާ ކަމަށެވެ. މިކަން މިގޮތަށް ކުރުމަކީ މަނާ ކަމެއް ކަަމަށާއި، އަދި އާއްމު ސިއްހަތަށް ނުރައްކާވެދާނެ ފަދަ ކަމަށް ބަޔާންކޮށް 14 ފެބުރުވަރީ 2018 ގައި ނޫސްބަޔާނަކުން އަންގާފައިވާ ކަމަށެވެ.
ކާބޯތަކެތީގެ ރައްކާތެރި ކަމުގެ ގާނޫނު ގައި ބަޔާން ކުރާ ''ކާބޯތަކެތީ ގައި ހުންނަން ޖެހޭ އާއްމު ޝަރުތުތައް'' މިފަދަ ތެލުގައި ފުރިހަމަ ނުވާނެކަން ފާހަގަކޮށް ފުޑް އެންޑް ޑްރަގް އޮތޯރިޓީ އިން ބުނީ ރިސޯޓު ފަދަ ތަންތަނުން އުކާލާ ތެލަކީ ހަލާލު ނޫން ކާބޯތަކެތިން ތަޣައްޔަރު ވެފައިވާ ތެޔޮ ކަމުގައި ވުމުގެ ފުރުސަތު ވެސް ބޮޑު ކަމަށެވެ.
އެހެންކަމުން މި ގޮތަށް ކާބޯތަކެތި ތައްޔާރު ކުރުމަށްފަހު އުކާލާ ކައްކާ ތެޔޮ ބޭނުން ނުކުރުމަށް ވަނީ އަންގާފަ އެވެ.
އެ އޮތޯރިޓީން ބުނީ މިފަދަ ތަކެތި ވިއްކާ އަދި ބޭނުން ކުރާ ފަރާތްކާއި މެދު ގާނޫނުގައިވާ ގޮތަށް ކާބޯތަކެތީގެ ރައްކާތެރި ކަމުގެ ގާނޫނުގެ ދަށުން ފިޔަވަޅު އަޅާނެ ކަމަށެވެ.
ރިސޯޓު ފަދަ ތަންތަނުން އުކާލާ ތެޔޮ ބޭނުން ކޮށްގެން ކާބޯތަކެތި ތައްޔާރު ކުރާ މައްސަލާގައި ފިޔަވަޅު އަޅާނެ ކަމުގެ އިންޒާރު ފުޑް އެންޑް ޑްރަގް އޮތޯރިޓީން ދިން ނަމަވެސް މިހާތަނަށް ފިޔަވަޅު އެޅުމުގެ ގޮތުން ކުރި މަސައްކަތެއް އިތުރު ތަފްސީލެއް އެ އޮތޯރިޓީން ދީފައި ނުވެ އެވެ. މި މައްސަލަ ކުރިމަތިވާތާ ގިނަ ދުވަސްތަކެއް ވެފައިވާ ކަމަށާއި، މި ވިޔަފާރީ ގައި ގިނަ އަދަދެއްގެ ބިދޭސީން ޝާމިލުވާ ކަމަށް މައުލޫމާތު ލިބެ އެވެ.
