ފެންނަ ނުފެން ވޯޓަކީ ބޮޑު ސްކޭމެއް ކަމަށް ދީދީ ވިދާޅުވެއްޖެ

ރައްޔިތުން އެތައްފަހަރަަކު ސްކޭމްތަކުގައި މިސަރުކާރުން ޖައްސައިފި ކަމަށާއި ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓަކީ ބޮޑު ސްކޭމެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދު ދީދީ ވިދާޅުވެއްޖެއެވެ.

ރާއްޖެ އެމްވީ އަށް ދެއްވި ހާއްސަ ބަސްދީގަތުމެއްގައި މެންބަރު ދީދީ ވިދާޅުވީ، ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓަކީ ބޮޑު ސްކޭމެއް ކަމަށާއި މި ސްކޭމުގައި ރައްޔިތުން އެއްގޮތަކަށްވެސް ޖެހިގެން ނުވާނެ ކަމަށެވެ. 

ދީދީ ވިދާޅުވީ ގިނަ ރައްޔިތުންވެސް އެދޭ ގޮތަށް ރައީސް މުޢިއްޒު އަށް ނޫނެކޭ ބުނަންޖެހޭ ކަމަށެވެ. އަދި ރައީސުލްޖުމްހޫރިއްޔާ ފަސް އަހަރުން އެއްއަހަރު ރައްޔިތުންގާތަށް އަންނަގޮތަށް މުޅި ސިސްޓަމް ބަދަލުކޮށްލަން މިކުރާ މަސައްކަތަކީ ރައްޔިތުންގެ ވަރަށް ބޮޑު ކަންބޮޑުވުއް ކަމަށް ދީދީ ވިދާޅުވި އެވެ. 

އަޅުގަނޑުމެން ރާއްޖޭގެ ރަށްރަށަށް މިހާރު ކުރަމުންގެންދާ ދަތުރުތަކުގައި ވަރަށް ގިނަ ރައްޔިތުން އެބަ ސުވާލުކުރޭ ރައީސް މުޢިއްޒު ސުވާލެއް ތިމަންނަމެންނަށް އެބަ ކުރިމަތިކުރުވައޭ، މިއީ ކީއްކުރަން ކުރާ ކަމެއްހޭ. އަޅުގަނޑަށް ފެންނަމުންމިދަނީ ރައީސް މުއިއްޒު ރައްޔިތުން ގާތަށްގޮސް މިބުނަނީ ދެން ތިމަންނަ ދާކަށް ބޭނުމެއް ނޫނެ. އެގޮތަށް ވިދާޅުވާ ސުވާލެއް ރައްޔިތުންނާ ކުރިމަތިކުރުވާފަ މިއޮތީ.

ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދު ދީދީ

މީގެ އިތުރުން މެންބަރު ދީދީ ވިދާޅުވީ ހއ އަތޮޅަށް މިހާރު ކުރަމުންދާ ދަތުރުތަކުގައިދާ ރަށްރަށުން ފެންނަ މަންޒަރަކީ ރައްޔިތުން މި ވޯޓަށް "ނޯ" ބުނަށް ތައްޔާރުވެފައި އޮތް މިންވަރު ކަމަށެވެ. އަދި އޭގެ އިތުރުން ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ގައުމީ މަޖިލީހުން ވެސް ވަނީ ފާސްކޮށްފަ އެވެ.

 ރާއްޖެ ފަދަ ޑިމޮކްރެޓިކް އުސޫލުން ހިންގާ ދައުލަތެއްގައި ރައްޔިތުންނާއި ގުޅުން ހުރި މިފަދަ މުހިންމު ކަންކަމުގައި ރައްޔިތުންގެ ޚިޔާލު ދެނެގަތުމަށް ނުވަތަ ރައްޔިތުންގެ ބަސް ހޯދުމަށް މަޝްވަރާ ކުރުމަކީ މުހިންމު ކަމެއް ކަމަށް ވެސް ދީދީ ވިދާޅުވި އެވެ.