ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގައި އަލަށް ހުޅުވި ޓާމިނަލުގެ ސީލިންގ އިން ބައެއް ވެއްޓި، އާއްމުންގެ ފާޑުކިޔުން އަމާޒުވެއްޖެ
މި ހާދިސާގައި އެއްވެސް މީހަކަށް އަނިޔާވެފައި ނުވި ނަމަވެސް، އެއަރޕޯޓުގެ އިންތިޒާމްތަކުގެ ފެންވަރު ދަށްވުމުގެ ޝަކުވާތައް ވެސް ވަނީ އިތުރުވެފަ. މި ކަންކަމާ ގުޅޭގޮތުން އެއަރޕޯޓް ހިންގާ ކުންފުނީގެ ބަހެއް ހޯދުމަށް ކުރި މަސައްކަތް އަދި ވަނީ ކާމިޔާބުވާ ގޮތް ނުވެފަ.
ވެލާނާ އިންޓަރނޭޝަނަލް އެއާޕޯޓުގެ ސީލިން އިން ވެއްޓުނު ބައިގެ ބައެއް ފޮޓޯތައް. | ސޯޝަލް މީޑިއާ
ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގައި އަލަށް ހުޅުވި ޓާމިނަލުގެ ސީލިންގ އިން ބައެއް ވެއްޓި، އާއްމުންގެ ފާޑުކިޔުން އަމާޒުވެއްޖެ އެވެ.
ވީއައިއޭގެ އާ ޓާމިނަލް, ޓާމިނަލް 1 އަށް ހުރިހާ އެއާލައިނެއް ބަދަލުކޮށް ޚިދުމަތް ދޭން ފަށާފައި ވަނީ މިދިޔަ އަހަރުގެ ޑިސެމްބަރު މަހު ފަހުކޮޅެވެ. އެހެންކަމުން މިހާ އަވަހަށް މިފަދަ ކަމެއް ދިމާވުމުން އާއްމުން ދަނީ އެކަމާއި މެދު ވަރަށް ބޮޑަށް ފާޑުކިޔަމުންނެވެ. އަދި ބައެއް އާއްމުން ވަނީ އެފަދަ ކަމެއް ހިނގުމުން އެކަން ހައްލު ކުރެވުނުކަން ނުވަތަ ނޫންކަން، ސާފުކޮށް ހާމަކޮށްދިނުމަކީ އާއްމުންނާއި ފަތުރުވެރިންގެ ރައްކާތެރިކަމަށްޓަކާ ވީއައިއޭ އިން ކުރަން ޖެހޭނެ ކަމެއް ކަމަށް ބުނެފަ އެވެ.
މީސްމީޑިއާގައި ވަނީ އެ ތަނުގެ ސީލިން އިން ބައެއް ވެއްޓިފައިވާ މަންޒަރު ފެންނަ ވީޑިއޯ އެއް ވައިރަލް ވެފަ އެވެ. ރާއްޖެޓީވީ އަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި މި ހާދިސާ ހިނގާފައި ވަނީ ފެބްރުއަރީ މަހުގެ ކުރީކޮޅެވެ. ސީލިންގ އިން ވެއްޓުނު ބައިން ޖެހި ފަތުރުވެރިއަކަށް އަނިޔާވި ކަމަށް އަޑު ފެތުރުނު ނަމަވެސް، މި ހާދިސާގައި މީހާކަށް އަނިޔާވެފައި ނުވާ ކަމަށް ރާއްޖެ ޓީވީ އަށް މައުލޫމާތު ދިން މީހުން ވަނީ ބުނެފަ އެވެ.
އެހެންނަމަވެސް ސީލިންގ އިން ބައެއް ވެއްޓުނު އިރު އެތަނުގައި ފަތުރުވެރިން ތިބިކަމަށް މައުލޫމާތު ލިބިފައި ވެ އެވެ. ސީލިން އިން ބައެއް ވެއްޓުނު ސަރަހައްދަނީ ޓީއެމްއޭ ކައުންޓަރާއި ދިމާލުގައި ހުރި ތަނެކެވެ. އަދި މިހާރު އެތަން މަރާމާތު ކުރުމުގެ މަސައްކަތް ކޮށްފައިވާ ކަމަށް ވެސް މި ނޫހަށް ވަނީ އެނގިފަ އެވެ.
އެއާޕޯޓް އާ ޓަރމިނަލްގެ މަސައްކަތުގެ ފެންވަރާއި އިންތިޒާމްތަކާއި މެދު އެތައް ބައެއްގެ ފާޑުކިޔުން ދަނީ އަމާޒުވަމުންނެވެ. މީސްމީޑިއާގައި އެއާޕޯޓްގެ އިންތިޒާމްތަކާއި މެދު ވާހަކަ ދެއްކި އާއްމު މީހަކު ވަނީ އެތަނުގައި ބަހައްޓާފައިވާ ބޯފެން ޑިސްޕެންސަރތަކުގައި ފިލްޓަރ އެއްވެސް މިންވަރަކަށް ބަދަލު ނުކުރާ ކަމަށް ފާހަގަކޮށްފަ އެވެ. އާ ޓަރމިނަލް ހުޅުވީއްސުރެ ފިލްޓަރ ބަދަލު ނުކޮށް، އެ ތަނުން ލިބޭ ފެން ރީނދޫ ކުލައިގައި ހުންނަން ފެށި ފަހުން މިހާރު ފެން ކަނޑާލާފައިވާ ކަމަށް ވެސް އޭނާ ވަނީ ބުނެފަ އެވެ. އޭނާ ބުނީ މިހާރު އެއާޕޯޓުގައި ފެން ބޯނެ ގޮތެއް ނެތް ކަމަށެވެ.
މިކަމާއި ގުޅޭ ގޮތުން ވެލާނާ އިންޓަރނޭޝަނަލް އެއާޕޯޓުގެ ބަހެއް ހޯދުމަށް މި ނޫހުން ތަކުރާރުކޮށް މަސައްކަތް ކުރި ނަމަވެސް މިހާތަނަށް މިކަމާއި ގުޅޭގޮތުން އެ ކުންފުނީގެ ބަހެއް ވަނީ ލިބޭ ގޮތް ނުވެފަ އެވެ.
