ޖަރުމަނުގެ ސަފީރު އީރާނުގެ ފޮރިން މިނިސްޓްރީ އަށް ހާޒިރުކޮށްފި
ޖަރުމަނުވިލާތުން އީރާނާ ދެކޮޅަށް ގެންގުޅޭ ހަރުކަށި ސިޔާސަތުތަކާއި ބައިނަލްއަގުވާމީ ގާނޫނުތަކާ ޚިލާފު ބަޔާންތަކާ ގުޅިގެން، ތެހެރާންގައި ހުންނަވާ ޖަރުމަނުގެ ސަފީރު އީރާނުގެ ފޮރިން މިނިސްޓްރީއަށް ހާޒިރުކޮށްފި. މި ބައްދަލުވުމުގައި، އީރާނާ ދެކޮޅަށް ހަރަކާތްތެރިވާ ޓެރަރިސްޓް ޖަމާއަތްތަކަށް ޖަރުމަނުން ހިމާޔަތްދޭ ކަމަށް ބުނެ އެ ގައުމުން ވަނީ ރަސްމީކޮށް އިހުތިޖާޖުކޮށްފައި. އަދި ޖަރުމަނުގެ މިފަދަ އަމަލުތަކަކީ އދ. ގެ ޗާޓަރާ ޚިލާފު ކަންތައްތަކެއް ކަމަށް ފާހަގަކޮށް، އީރާނުން ވަނީ އެކަން ހަރުކަށި އިބާރާތުން ކުށްވެރިކޮށްފައި.
އީރާނުގެ ވެރިރަށް ތެހެރާންގައި ހުންނަ އެ ގައުމުގެ ފޮރިން މިނިސްޓްރީ (ޚާރިޖީ ވުޒާރާ) ހިންގާ އިމާރާތުގެ މަންޒަރެއް. | ޕްރެސްޓީވީ
ޖަރުމަނުވިލާތުގެ ކަމާބެހޭ ފަރާތްތަކުން އީރާނާ ދެކޮޅަށް ވިދިވިދިގެން އަޅަމުންދާ ދަތިކުރުމުގެ ފިޔަވަޅުތަކާއި ގެންގުޅޭ ހަރުކަށި ސިޔާސަތުތަކާ ގުޅިގެން، ތެހެރާންގައި ހުންނަވާ ޖަރުމަނުގެ ސަފީރު އީރާނުގެ ފޮރިން މިނިސްޓްރީ އަށް ހާޒިރުކޮށްފި އެވެ.
އަންގާރަ ދުވަހު ޖަރުމަނުގެ ސަފީރު އެކްސެލް ޑިޓްމަން، ފޮރިން މިނިސްޓްރީއަށް ހާޒިރުކުރެއްވީ އެ މިނިސްޓްރީގެ ޑިރެކްޓަރ ޖެނެރަލް ފޯ ވެސްޓަން ޔޫރަޕް، އަލީރިޒާ ޔޫސުފީއެވެ. މި ބައްދަލުވުމުގައި، ޖަރުމަނުގެ އަމަލުތަކާ މެދު އިސްލާމީ ޖުމްހޫރިއްޔާ އިން ހަރުކަށި ހުތިޖާޖު ކުރާ ކަން ރަސްމީކޮށް އޭނާ އަށް ވަނީ އަންގާފަ އެވެ.
އީރާނުގެ ފޮރިން މިނިސްޓްރީން ހާމަކުރި ގޮތުގައި، ސަފީރު ހާޒިރުކުރަން ޖެހުނީ ޖަރުމަނުވިލާތުގައި އީރާނާ ދެކޮޅަށް ހިންގަމުންދާ ހަރަކާތްތަކާއި، ބައިނަލްއަގުވާމީ ގާނޫނުތަކާ ޚިލާފަށް ޖަރުމަނުގެ އޮފިޝަލުން އީރާނާ ދެކޮޅަށް ނެރެމުންދާ ފަނާކުރަނިވި ބަޔާންތަކާ ގުޅިގެންނެވެ.
މި ބައްދަލުވުމުގައި ޔޫސުފީ ވަނީ، ތެހެރާނާ ދެކޮޅަށް ހަރަކާތްތެރިވާ ހަރުކަށި އަދި ޓެރަރިސްޓް ޖަމާއަތްތަކަށް ޖަރުމަނުން ހިމާޔަތްދީ، އެފަދަ ފަރާތްތަކަށް އެހީތެރިކަން ފޯރުކޮށްދެމުންދާ ދިއުން ހަރުކަށި އިބާރާތުން ކުށްވެރިކުރައްވާފަ އެވެ.
އޭނާ އިތުރަށް ވިދާޅުވީ، ޖަރުމަނުގެ މިފަދަ ނިންމުންތަކާއި އަމަލުތަކަކީ ބައިނަލްއަގުވާމީ ގާނޫނުތަކުގެ އަސާސީ އުސޫލުތަކާއި އދ. ގެ ޗާޓަރާ ޚިލާފު ކަންތައްތަކެއް ކަމަށެވެ. އަދި މިކަމުގެ ސަބަބުން ބައިނަލްއަގުވާމީ މައިދާނުގައި ބާލިންއިން ޒިންމާ އުފުލަންޖެހޭނެ ކަމަށްވެސް އޭނާ ފާހަގަކުރެއްވި އެވެ.
ޖަރުމަނުގެ ސަފީރު ވަނީ ތެހެރާނުގެ މި އިހުތިޖާޖު ޖަރުމަނުގެ ކަމާބެހޭ ފަރާތްތަކަށް ރައްދުކޮށްދެއްވާނެ ކަމަށް ވިދާޅުވެފަ އެވެ.
އެމެރިކާ އިން އީރާނާ ދެކޮޅަށް ބަހުގެ ހަމަލާތަކާއި އަސްކަރީ ފިއްތުންތައް އިތުރުކުރަމުންދާ ދަނޑިވަޅެއްގައި، ޖަރުމަނުގެ ކަމާބެހޭ ފަރާތްތަކުން ވެސް ދަނީ އީރާނާ ދެކޮޅަށް ގެންގުޅޭ ސިޔާސަތުތައް ވަރުގަދަކުރަމުންނެވެ.
މީގެ ކުރިން ޖެނުއަރީ މަހުގެ ފަހުކޮޅުވެސް ސަފީރު ޑިޓްމަން ވަނީ ފޮރިން މިނިސްޓްރީއަށް ހާޒިރުކޮށްފަ އެވެ. އެފަހަރު އޭނާ ހާޒިރުކުރީ، އީރާނު ސަރުކާރުގެ "ދުވަސްތައް ގުނެމުންދާ" ކަމަށް ވިދާޅުވެ ޖަރުމަނުގެ ޗާންސެލަރ ފްރީޑްރިކް މާރޒް ދެއްކެވި ވާހަކަތަކާ ގުޅިގެންނެވެ. މާރޒް މިފަދަ މޭރުމަކުން ވާހަކަދެއްކެވީ، އެމެރިކާގެ ރައީސް ޑޮނަލްޑް ޓްރަމްޕް އީރާނަށް ދެމުންދާ ބަހުގެ ހަމަލާތައް ވަރުގަދަކޮށް، އީރާނު ވަށައިގެންވާ ސަރަހައްދުތަކަށް އަސްކަރީ ބާރުތައް ޖަމާކުރަމުންދިޔަ ދަނޑިވަޅެއްގަ އެވެ. އެއީ އީރާނުގެ އިގްތިސާދީ ހާލަތާ ގުޅިގެން ކުރި މުޒާހަރާތައް، ހަމަނުޖެހުމަކަށް ބަދަލުކޮށްލުމަށް އެމެރިކާ އާއި އިޒްރޭލުގެ އެހީތެރިކަމާއެކު މަސައްކަތްކުރި ފަރާތްތަކާ އީރާނު ސަރުކާރުން ކުރިމަތިލާން ޖެހުނު ދުވަސްވަރެވެ.
