ޗައިނާގެ ފަޓާސް ފިހާރަ އެއްގައި ބާރުގަދަ ގޮވުންތަކެއް ހިނގާ، 12 މީހުން މަރުވެއްޖެ

ޗައިނާގެ ހޫބޭ ޕްރޮވިންސްގައި ހުންނަ ފަޓާސް ވިއްކާ ފިހާރައެއްގައި ބުދަ ދުވަހު ބާރުގަދަ ގޮވުންތަކެއް ގޮވައި ހިނގި އަލިފާނުގެ ހާދިސާއެއްގައި 12 މީހުން މަރުވެއްޖެ ކަމަށް އެ ގައުމުގެ ދައުލަތުގެ މީޑިއާ، ސީސީޓީވީން ރިޕޯޓްކޮށްފި އެވެ. މި ހާދިސާގައި އެ ފިހާރައިގެ 50 އަކަ މީޓަރުގެ ސަރަހައްދެއް ވަނީ އަނދައި ހުލިވެފަ އެވެ.

ސީސީޓީވީގެ ރިޕޯޓުގައިވާ ގޮތުން، މި ހާދިސާ ހިނގާފައިވަނީ މެދުތެރޭ ޗައިނާގެ ޝިއަންޔަންގް ސިޓީގައި ހުންނަ، ނަން ހާމަކޮށްފައިނުވާ ފަޓާސް ވިއްކާ ފިހާރައެއްގަ އެވެ. މި ގޮވުން ގޮވަން މެދުވެރިވި ސަބަބު މިހާރު ތަހުގީގު ކުރަމުންދާ ކަމަށްވެސް އެ ރިޕޯޓުގައި ބުނެފައިވެ އެވެ.

ޗައިނާގައި ފަޓާހާއި ގުޅުންހުރި މިފަދަ ނުރައްކާތެރި ހާދިސާތައް ހިނގުމަކީ އާންމު ކަމެކެވެ. އެގޮތުން މިދިޔަ އަންގާރަ ދުވަހު ފެށުނު ޗައިނާގެ އައު އަހަރު ނުވަތަ ލޫނާ ނިއު އިޔާ ފަދަ މުނާސަބަތުތަކާ ގުޅިގެން އެ ގައުމުގައި ވަރަށް ގިނައިން އަދި އެއްވެސް އުސޫލެއް ނެތް ގޮތަކަށް ފަޓާސް ބޭނުންކުރެ އެވެ.

މިދިޔަ ޖޫން މަހުގެ ތެރޭގައި ވެސް، ހޫބޭ އާ އަވަށްޓެރި ހޫނާން ޕްރޮވިންސްގައި ހުންނަ ފަޓާސް އުފައްދާ ކާރުޚާނާއެއްގައި އެއްޗެއް ގޮވައި ހިނގި ހާދިސާއެއްގައި ނުވަ މީހުން މަރުވެ، 26 މީހަކަށް އެކިވަރުގެ އަނިޔާ ލިބިފައިވެ އެވެ.

ސަލާމަތީ ސަބަބުތަކަށާއި ވައި ނުސާފުވުމުގެ މައްސަލައަށް ހައްލެއް ހޯދުމުގެ ގޮތުން ޗައިނާގެ ބައެއް ސިޓީތަކުގައި ފަޓާސް ބޭނުންކުރުން މަނާކޮށްފައިވީ ނަމަވެސް، މިއީ އެ ގައުމުގައި ބޮޑު ބަހުސަކަށް ވެފައިވާ ކަމެކެވެ. ސަބަބަކީ ނުބައި ރޫހުތައް ފައްސާލުމުގެ ގޮތުން ޒަމާނުއްސުރެ ބޭނުންކުރަމުން އަންނަ ފަޓާހަކީ، ޗައިނާގެ އައު އަހަރުގެ ފާހަގަކުރުންތަކުގެ ވަރަށް މުހިންމު ބަޔަކަށް ވާތީއެވެ.