ރާއްޖޭގައި ތަރައްގީކުރާ "ޓްރަމްޕް ރިސޯޓް" މަޝްރޫއުގެ އިންވެސްޓަރުންނަށް ބްލޮކްޗެއިން މެދުވެރިކޮށް ޓޯކަން ގަތުމުގެ ފުރުސަތު ހުޅުވާލައިފި
ދާރުލްގްލޯބަލް އާއި ޓްރަމްޕް އޯގަނައިޒޭޝަން ގުޅިގެން 2030 ވަނަ އަހަރަށް ނިންމާ މި ރިސޯޓުން އިންވެސްޓަރުންނަށް ކަނޑައެޅިފައިވާ ވަކި މިންވަރެއްގެ ފައިދާއެއް ލިބޭނެ ކަމަށް ބުނޭ.
ދާރްގްލޯބަލް އާއި ޓްރަމްޕް އޯގަނައިޒޭޝަން ގުޅިގެން ދިވެހިރާއްޖޭގައި ތަރައްގީކުރާ "ޓްރަމްޕް އިންޓަރނޭޝަނަލް ހޮޓެލް އެންޑް ރިސޯޓް، މޯލްޑިވްސް" އަކީ އެ ކުންފުނީގެ އެންމެ ފާހަގަކޮށްލެވޭ އެއް ލަގްޒަރީ މަޝްރޫއު. | ދާރުގްލޯބަލް
ވޯލްޑް ލިބަޓީ ފައިނޭންޝަލް (ޑަބްލިއު.އެލް.އެފް.އައި) އިން، ރާއްޖޭގައި ތަރައްގީކުރާ "ޓްރަމްޕް އިންޓަރނޭޝަނަލް ހޮޓެލް އެންޑް ރިސޯޓް" އިން ލިބޭ ލޯނު އާމްދަނީގެ ހިއްސާ ޓޯކަނައިޒް ކުރުމުގެ މަޝްރޫއެއް ބުރާސްފަތި ދުވަހު އިއުލާނުކޮށްފިއެވެ. މި މަޝްރޫއު ކުރިއަށް ގެންދަނީ ރިއަލް-ވޯލްޑް އެސެޓްސް ޓޯކަނައިޒްކުރާ ޕްލެޓްފޯމެއް ކަމަށްވާ ސެކިއުރިޓައިޒް އިންކް އާއި، ބައިނަލްއަގުވާމީ ރިއަލް އެސްޓޭޓް ޑިވެލޮޕަރެއް ކަމަށްވާ ދާރުލްގްލޯބަލް ޕީ.އެލް.ސީ އާ ގުޅިގެންނެވެ.
ޓްރަމްޕް އިންޓަރނޭޝަނަލް ހޮޓެލް އެންޑް ރިސޯޓް، މޯލްޑިވްސް އަކީ ދާރުލްގްލޯބަލް އާއި ދަ ޓްރަމްޕް އޯގަނައިޒޭޝަން ގުޅިގެން ކުރިއަށްގެންދާ ފާހަގަކޮށްލެވޭ ފަތުރުވެރިކަމުގެ ބޮޑު މަޝްރޫއެކެވެ. 2030 ވަނަ އަހަރަށް ނިންމުމަށް ތާވަލުކޮށްފައިވާ މި ރިސޯޓުގައި ގާތްގަނޑަކަށް 100 އެއްހާ މަތީ ފަންތީގެ ބީޗް ވިލާ އާއި އޯވަަރވޯޓަރ ވިލާ ހިމެނޭނެއެވެ.
މި މަޝްރޫއުގެ ދަށުން ފުރަތަމަ ފަހަރަށް ހުޅުވާލާ ޓޯކަނައިޒްޑް އިންވެސްޓްމަންޓް ފުރުސަތުގެ ސަބަބުން، ޝަރުތުހަމަވާ އިންވެސްޓަރުންނަށް މި ރިސޯޓު ތަރައްގީކޮށްގެން ލިބޭ ލޯނު އާމްދަނީން މަންފާ ލިބުމުގެ ފުރުސަތު ލިބިގެންދާނެއެވެ. އަދި ކަނޑައެޅިފައިވާ ގަވާއިދުތަކުގެ ތެރެއިން މި އިންވެސްޓްމަންޓުން ވަކި މިންވަރެއްގެ ފައިދާއެއް (ފިކްސްޑް ޔީލްޑް) ލިބޭނެ ކަމަށް ބެލެވެއެވެ.
"އަޅުގަނޑުމެން ވޯލްޑް ލިބަޓީ ފައިނޭންޝަލް އުފެއްދީ ޑީސެންޓްރަލައިޒްޑް ފައިނޭންސް މުޅި ދުނިޔެއަށް ހުޅުވާލުމަށް. މިއަދުގެ މި އިއުލާނާއެކު، ޓޯކަނައިޒްޑް ރިއަލް އެސްޓޭޓްގެ ދާއިރާއަށް އެ ފުރުސަތު މިވަނީ ފުޅާކުރެވިފައި،" ވޯލްޑް ލިބަޓީ ފައިނޭންޝަލްގެ ކޯ-ފައުންޑަރ އެރިކް ޓްރަމްޕް ވިދާޅުވިއެވެ. މިއީ ރާއްޖޭގެ ޓްރަމްޕް އިންޓަރނޭޝަނަލް ހޮޓެލް އެންޑް ރިސޯޓް ފަދަ މަޝްހޫރު ތަނެއްގެ ހިއްސާދާރަކަށް ވުމަށް ޝަރުތުހަމަވާ ފަރާތްތަކަށް ލިބޭ ފުރަތަމަ ފުރުސަތެއް ކަމަށް ވެސް އޭނާ ވިދާޅުވި އެވެ.
ސެކިއުރިޓައިޒްގެ ކޯ-ފައުންޑަރ އަދި ސީ.އީ.އޯ ކާލޯސް ޑޮމިންގޯ ވިދާޅުވީ، ރިއަލް އެސްޓޭޓަކީ އެންމެ އެދެވޭ ގޮތެއްގައި ޓޯކަނައިޒް ކުރަން އެންމެ އުނދަގޫ އެއް ދާއިރާ ކަމަށެވެ. ނަމަވެސް، ގަވާއިދުތަކާއި ހިންގުމުގެ ނިޒާމުތަކަށް ފެތޭގޮތަށް އުފައްދާ އޮން-ޗެއިން ރިއަލް އެސްޓޭޓް އުފެއްދުންތަކަށް ދުނިޔޭގެ ބާޒާރުގައި ބޮޑު ތަރުހީބެއް ލިބޭނެ ކަމަށް ގަބޫލުކުރައްވާ ކަމަށާއި، ޑަބްލިއު.އެލް.އެފް.އައި އާއެކު ވެވުނު މި އެއްބަސްވުމުގެ މަގްސަދަކީ އެއީ ކަމަށް އޭނާ ފާހަގަކުރެއްވިއެވެ.
"މިއީ ރިއަލް އެސްޓޭޓް އިންވެސްޓްމަންޓްގެ ދާއިރާއަށް ލިބުނު ބޮޑު ކުރިއެރުމެއް،" ދާރުލްގްލޯބަލްގެ ސީ.އީ.އޯ ޒިއާދު އަލް ޗާރް ވިދާޅުވިއެވެ. "އަޅުގަނޑުމެން މި މަސައްކަތް ކުރަނީ، ފެންވަރު ރަނގަޅު ރިއަލް އެސްޓޭޓް މަޝްރޫއުތައް ކުރިއަށްދާއިރު، އޭގެ ލޯނު އާމްދަނީން ހިއްސާ ހޯދުމާއި ވިޔަފާރިކުރުމުގައި އިންވެސްޓަރުންނަށް ފަސޭހަ ގޮތްތަކެއް ހޯދައިދިނުމަށް."
މި ޓޯކަންތަކަކީ އެމެރިކާގެ ފެޑަރަލް ނުވަތަ ސްޓޭޓް ސެކިއުރިޓީޒް ގާނޫނުތަކުގެ ދަށުން ރަޖިސްޓްރީ ކުރެވިފައިވާ އެއްޗެއް ނޫން ކަމުން، މިއީ ބަދަލުކުރުމުގައި ހުރަސްތަކެއް ހުންނާނެ އެއްޗެއް ކަމަށް ރިޕޯޓުކޮށްފައިވެ އެވެ.
