މުސަޅު ކެއުމަށް ވެނުޒުއޭލާގެ ރައީސް ރައްޔިތުންނަށް އަންގަވައިފި

ދާޚިލީ ހަމަނުޖެހުން ބޮޑުވުމުގެ ސަބަބުން އިގްތިސާދީ ގޮންޖެހުންތައް ކުރިމަތިވެފައިވާ ވެނުޒުއޭލާގެ ކާބޯތަކެތީގެ ދަތިކަން ހައްލު ކުރުމަށް މުސަޅު ކެއުމަށް އެ ގައުމުގެ ރައްޔިތުންނަށް ރައީސް މަދޫރޯ ގޮވާލައްވައިފިއެވެ.

ކާބޯތަކެތީގެ ދަތިކަން އިންތިހާއަށް ފޯރާފައި ވުމުގެ ސަބަބުން ވެނުޒުއޭލާގައި ކާޑުބަލި އާއްމުވެފައިވާ ކަން ފާހަގަ ކުރެވިފައިވެއެވެ.

ވެނުޒުއޭލާގެ ރައީސް ވިދާޅުވީ، ހަށިގަނޑަށް ބޭނުންވާ ޕްރޮޓީން ހޯދުމަށް ކެއުމުގައި ބޭނުން ކުރުމަށް ރައްޔިތުން މުސަޅު ގެންގުޅެން ފަށަން ޖެހޭ ކަމަށެވެ.

ރައީސް މަދޫރޯގެ މި ގޮވާލެއްވުމާ ގުޅިގެން އިދިކޮޅު ޕާޓީތަކުން ބުނެފައިވަނީ އެއީ ބޮޑު ޖޯކެއް ކަމަށެވެ.

ރައީސް މަދޫރޯ މިކަން ހާމަކުރެއްވީ، އެ ގައުމުގެ ރަސްމީ ޓީވީ މެދުވެރިކުރައްވާ ރައްޔިތުންނާ ވާހަކަފުޅު ދައްކަވަމުންނެވެ. ރައީސް މަދޫރޯ ވިދާޅުވީ މުސަޅު އާލާކުރުމުގެ ޕްލޭނެއް ސަރުކާރުން އެކުލަވާލާ މިހާރު ފާސްކޮށްފައިވާ ކަމަށެވެ. މި ޕްލޭންގެ ތަފްސީލް ދެއްވަމުން މަދޫރޯ ވިދާޅުވީ، އަޖުމަ ބެލުމުގެ ގޮތުން ޅަ މުސަޅު 15 ކޮމިއުނިޓީއަކަށް މިނިސްޓްރީ އޮފް އާބަން އެގްރިކަލްޗަރ އިން މިހާރު ދީފައިވާ ކަމަށެވެ.

ނަމަވެސް، މުސަޅު މަހަކީ ވެނުޒުއޭލާގެ ރައްޔިތުންނަށް ކެއުމަށް ފަރިތަވެފައި ނުވާ ބާވަތެއް ކަމަށް ވުމުން، މަސްކެއުމުގެ ބޭނުމުގައި ގެންގުޅެން ދިން މުސަޅުތައް އިސާހިތަކު މީހުން ބޭނުން ކުރަން ފެށީ ލޯބިން ގެންގުޅޭ ޖަނަވާރުގެ ގޮތުގައި ކަމަށް ވެނުޒުއޭލާގެ ދަނޑުވެރިކަމާ ބެހޭ ވަޒީރު ވިދާޅުވިއެވެ. އަދި ހަވާލު ކުރި މުސަޅުތަކަށް އިސާހިތަކު މީހުން ނަންދީ އަދި ކައިރީގައި އެނދުގައި ނިންދަވަން ފެށިކަމަށްވެސް އެމަނިކުފާނު ވިދާޅުވިއެވެ. އަދި މިއީ ސަރުކާރުގެ ޕްލޭން ކާމިޔާބު ކުރުމަށް މަޝްރޫއުގެ ކުރީކޮޅު ކުރިމަތިވި ގޮންޖެހުމެއް ކަމަށްވެސް އޭނާ ދެކެވަޑައިގަންނަވައެވެ.

ދުނިޔޭގެ ތެލުގެ އެންމެ ބޮޑު ރިޒާވް ލިބިފައިވާ ވެނުޒުއޭލާއަކީ ގައުމަށް ބޭނުންވާ ހުރިހާ އެއްޗެއް އިމްޕޯޓް ކުރާ ގައުމެކެވެ. ނަމަވެސް ތެލުގެ އަގު ދަށަށް ދިއުމާ ގުޅިގެން ގައުމުގެ ރިޒާވް ދަށަށް ދިޔައެވެ. ވެނުޒުއޭލާގެ އިގްތިސާދީ ހާލާތު އިތުރަށް ގޯސްވުމުގެ ފަހަތުގައި ފައިސާގެ އަގު ވަރަށް ބޮޑަށް ދަށަށް ދިއުމާއި ސަރުކާރުން ޑޮލަރު ކޮންޓްރޯލް ކުރުން ހިމެނެއެވެ.

ވެނިޒުއޭލާގައި ޒަރޫރީ ބޭނުންތަކަށް ވިއްކާތަކެތީގެ އަގު ސަރުކާރުން ވަނީ ކޮންޓްރޯލް ކޮށްފައެވެ. އޭގެ ސަބަބުން ކުދި އެތައް ވިޔަފާރިއެއް ބަނގުރޫޓުވެ، ބަންދުކުރަން ވަނީ ޖެހިފައެވެ.