ސައޫދީ ޚާރިޖީ ވަޒީރު އަމީރު ފައިސަލް ވޮޝިންގޓަންގައި އެމެރިކާގެ އިސް މަސްއޫލުވެރިންނާ ބައްދަލުކުރައްވައިފި

ސައޫދީ އަރަބިއްޔާގެ ޚާރިޖީ ވަޒީރު އަމީރު ފައިސަލް ބިން ފަރްހާން، އެމެރިކާގެ ޚާރިޖީ ވަޒީރު މާކޯ ރޫބިއޯ ހިމެނޭ ގޮތަށް އެ ގައުމުގެ ސަރުކާރުގެ އިސް ބޭފުޅުންނާ ބުދަ ދުވަހު ބައްދަލުކުރައްވައިފި އެވެ.

މީގެ އިތުރުން، އެމެރިކާގެ ހައުސް ފޮރިން އެފެއާޒް ކޮމިޓީގެ މުގައްރިރު ބްރަޔަން މާސްޓް އާ އެކު ވެސް ސައޫދީ ޚާރިޖީ ވަޒީރު ވަނީ މަޝްވަރާ ބައްދަލުވުންތަކެއް ބާއްވަވާފަ އެވެ.

ސައޫދީ ޚާރިޖީ ވުޒާރާއިން ހާމަކުރި ގޮތުގައި، ރޫބިއޯ އަދި އަމީރު ފައިސަލްގެ ބައްދަލުވުމުގައި ވޮޝިންގޓަނާއި ރިޔާޟް އާ ދެމެދު އޮތް ތާރީޚީ އަދި އިސްތިރާޖީ ގުޅުންތަކުގެ މައްޗަށް އަލިއަޅުއްވާލައްވައި، މި ގުޅުންތައް އިތުރަށް ހަރުދަނާކޮށް ފުޅާކުރެވޭނެ ގޮތްތަކާ ބެހޭގޮތުން ދެ ބޭފުޅުން މަޝްވަރާ ކުރެއްވި އެވެ.

"ބަދަލުވަމުންދާ މަސްރަހާއި، ސަރަހައްދުގެ ސަލާމަތާއި ހަމަޖެހުން ގާއިމުކުރުމަށް ކުރެވެމުންދާ މަސައްކަތްތަކާ ގުޅޭގޮތުން ވެސް ދެ ބޭފުޅުން ޚިޔާލު ބަދަލުކުރެއްވި،" ކަމަށް ސައޫދީ ޚާރިޖީ ވުޒާރާ އިން ނެރުނު ބަޔާނުގައިވެ އެވެ.

އެމެރިކާގެ ސްޓޭޓް ޑިޕާޓްމަންޓުގެ ޕްރިންސިޕަލް ޑެޕިއުޓީ ސްޕޯކްސްޕާސަން ޓޮމީ ޕިގޮޓް ވިދާޅުވީ، މި ބައްދަލުވުމަކީ ނޮވެމްބަރު މަހު އެމެރިކާގެ ރައީސް ޓްރަމްޕާއި ސައޫދީ ވަލީއަހުދު މުހައްމަދު ބިން ސަލްމާން ބޭއްވެވި ބައްދަލުވުމަށް ފަހު، ދެ ގައުމުގެ ދެމެދުގައި އޮތް އެއްބާރުލުން އިތުރަށް ކުރިއެރުވުމަށް ބޭއްވުނު ބައްދަލުވުމެއް ކަމަށެވެ.

"މެދުއިރުމަތީގެ ސަލާމަތާއި ހަމަޖެހުން ދެމެހެއްޓުމަށްޓަކައި، ޚާއްސަކޮށް ޣައްޒާ، ޔަމަން، ސޫދާން އަދި ސީރިއާގެ މައްސަލަތަކުގައި ކުރެވެމުންދާ މަސައްކަތްތަކުގައި ދެ ގައުމުގެ ދެމެދުގައި އޮތް ގުޅުން ހަރުދަނާކުރުމާ ބެހޭގޮތުން ޚާރިޖީ ވަޒީރާއި ސައޫދީ ވަޒީރު މަޝްވަރާ ކުރެއްވި،" ޕިގޮޓް އިތުރަށް ވިދާޅުވިއެވެ.