ތޮއްޑޫގައި ބަލި މީހުން އުފުލަން ޕިކަޕެއް ބޭނުން ކުރަން ފަށައިފި
ތޮއްޑޫ އިން ވާހަކަ ދެއްކި ބައެއް ރައްޔިތުން ބުނީ އެ ރަށުގައި ބޭނުން ކުރަމުން އަންނަ އެމްބިއުލާންސް ހަލާކުވެފައި އޮންނަތާ ދެ މަސް ދުވަހަށް ވުރެ ގިނަ ދުވަސް ވެފައިވާ ކަމަށް. އަަދި މިހާރު އެ ރަށުގައި ބަލި މީހުން އުފުލުމަށް ބޭނުން ކުރަނީ ޕިކަޕު ކަމަށް ވެސް މައުލޫމާތު ދިން ރައްޔިތުން ވަނީ ބުނެފައި.
ތޮއްޑޫގެ އެމްބިއުލާންސް ހަލާކުވެ، ބަލި މީހުން އުފުލުމުގައި ބޭނުން ކުރަނީ ޕިކަޕު. | ސޯޝަލް މީޑިއާ
އއ.ތޮއްޑޫގައި ބޭނުން ކުރަމުން އަންނަ އެމްބިއުލާންސް ހަލާކުވެ، ބަލި މީހުން އުފުލުމަށް ޕިކަޕު ބޭނުން ކުރަން ފަށައިފި އެވެ.
ތޮއްޑޫ އިން ވާހަކަ ދެއްކި ބައެއް ރައްޔިތުން ބުނީ އެ ރަށުގައި ބޭނުން ކުރަމުން އަންނަ އެމްބިއުލާންސް ހަލާކުވެފައި އޮންނަތާ ދެ މަސް ދުވަހަށް ވުރެ ގިނަ ދުވަސް ވެފައިވާ ކަމަށެވެ. އަަދި މިހާރު އެ ރަށުގައި ބަލި މީހުން އުފުލުމަށް ބޭނުން ކުރަނީ ޕިކަޕު ކަމަށް ވެސް މައުލޫމާތު ދިން ރައްޔިތުން ވަނީ ބުނެފަ އެވެ.
މިކަމާ ގުޅޭ ގޮތުން ސުވާލު ކުރުމުން ތޮއްޑޫ ޞިއްޙީ މަރުކަޒު ހިންގުމާ ހަވާލުވެ ހުންނެވި މައިޝާ މުޙައްމަދު ވިދާޅުވީ، އެމްބިއުލާންސް އޮތީ ހަލާކުވެފައި ކަމަަށެވެ. ނަމަވެސް، އޭނާ ވިދާޅުވީ އެމްބިއުލާންސް ހަލާކުވެފައި އޮންނަތާ ދެ މަސް ދުވަސް ނުވާ ކަމަށާއި، ހަލާކުވެފައި އޮންނަތާ ވީ މަސް ދުވަަސް ކަމަށެެވެ.
އޭނާ ވިދާޅުވީ އެމްބިއުލާންސް ހަލާކުވި ދުވަހުން ފެށިގެން ހެދުމުގެ މަސައްކަތް ކުރަމުން އަންނަ ކަމަށެވެ. އެހެން ނަމަވެސް، އެމްބިއުލާންސް އަށް ބޭނުންވާ ސްޕެއާ ޕާާޓްސް ތަކަކީ ރާއްޖެ އިން ލިބެން ހުންނަ ތަކެއްޗަަށް ނުވާތީ، އެ ތަކެތި ގެނައުމުގައި ދަތި ތަކެއް ދިމާވެގެން އުޅޭ ކަމަށް ވިދާޅުވި އެވެ. އެއާ އެކު އޭނާ ވިދާޅުވީ މިހާރު ތޮއްޑޫ އަށް އައު އެމްބިއުލާންސްއެއް ލިބިފައިވާ ކަމަށާއި، ވަރަށް އަވަހަށް ރަށަށް ގެންނާނެ ކަމަށެވެ.
މީގެ އިތުރުން ތޮއްޑޫ ޞިއްޙީ މަރުކަޒަށް ޙާލު ދެރެވެގެން ގެންދިޔަ އުމުރުން 65 އަހަރުގެ ބަލި މީހަކަށް އެ ރަށު ޞިއްޙީ މަރުކަޒުން އިހުމާލުވެފައިވާ ކަމަށް އާއިލާ އިން ތުހުމަތު ކޮށްފައިވެ އެވެ. އެގޮތުން ބަލި މީހާ އަކީ މީގެ ކުރިން ވެސް ސްޓްރޯކް ޖެހިފައިވާ މީހެއް ކަމަށާއި، ނަމަވެސް 45 މިނެޓު ވީއިރު ވެސް ޑޮކްޓަރަށް ދެއްކޭ ގޮތް ނުވި ކަމަށް އާއިލާ އިން ބުނެފައިވެ އެވެ.
ބަލި މީހާ ބެލުން ލަސްވެ، އަނބުރާ ގެޔަށް އަންނަން ޖެހުނުއިރު، ގެޔަށް އައި ފަހުން އިތުރަށް ޙާލު ގޯސްވެ ވެއްޓުނު ކަމަށް އާއިލާ އިން ބުންޏެވެ. އޭގެ ފަހުން އަނެއްކާ ދެ ވަނަ ފަހަރަށް ޞިއްޙީ މަރުކަޒަށް ދިޔުމުން، ބަލި މީހާ އެޑްމިޓް ކޮށްގެން ފަރުވާ ދިން ކަމަށް ބުނެފައިވެ އެވެ. އާއިލާގެ ކަންބޮޑުވުމަކީ އިމަޖެންސީ ވެގެން ގެންދިޔައިރު ވެސް، ބަލި މީހާ އަށް އަވަސް ފަރުވާ ދީފައި ނުވާ ކަމުގެ ކަންބޮޑުވުމެވެ.
އެކަމާ ގުޅޭ ގޮތުން މައިޝާ ވިދާޅުވީ އެ ހާދިސާ ހިނގިއިރު އޭނާ ހުންނެވީީ ޗުއްޓީގައި ކަމަށެވެ. ނަމަވެސް ޗުއްޓީ އިން އެނބުރި އައިސް އެ ކަން ހިނގައި ދިޔަ ގޮތް ބެލި ކަމަށާއި، ޞިއްޙީ މަރުކަޒުން އިހުމާލެއް ވެފައި ނެތް ކަމަށް އޭނާ ވިދާޅުވި އެވެ. އަދި އާއިލާ އިން ކުރަނީ ދޮގު ތުހުމަތެއް ކަަމަށާއި، ޞިއްޙީ މަރުކަޒުގެ މުވައްޒަފުން އެއްވެސް އިހުމާލެއް ވެފައި އޮތް ކަމަށް ފާހަގަ ވާން ނެތް ކަމަށް އޭނާ ވިދާޅުވެފައިވެ އެވެ.
