މި ސަރުކާރު ގައި ގއ.އަތޮޅު ހޮސްޕިޓަލް ގެ ފެންވަރު ދަށަށް، ގިނަ ބައެއް ގެ ފުރާނަތަކެއް ގެއްލިފައިިވާ ކަމުގެ ތުހުމަތު
ސިއްހީ ޚިދުމަތުގެ ފެންވަރު ވަރަށް ބޮޑަށް ދަށްވެފައިވާއިރު، އެ ފެންވަރު ރަނގަޅު ކުރުމަށް އެއްވެސް ކަމެއް ކޮށްފައިނުވޭ
ގއ.އަތޮޅު ހޮސްޕިޓަލް
ރައީސް ޑރ.މުހައްމަދު މުއިއްޒު ގެ ސަރުކާރުގައި ގއ.އަތޮޅު ހޮސްޕިޓަލް ގެ ފެންވަރު ވަރަށް ބޮޑަށް ދަށްވެ، ހޮސްޕިޓަލް ގެ އިހުމާލުން ފުރާނަތަކެއް ގެއްލިފައިވާ ކަމަށް ތުހުމަތު ކޮށްފި އެވެ.
ރާއްޖެޓީވީ ގެ ވައުދުނާމާ ޕްރޮގްރާމްގައި އެމްޑީޕީ ގައުމީ މަޖިލީހުގެ ވިލިނގިލީ ދާއިރާގެ ރައީސް ހުސެއިން ހަސަން ވިދާޅުވީ މި ސަރުކާރާއެކު ސިއްހީ ޚިދުމަތު ގެ ފެންވަރު ވަރަށް ބޮޑަށް ދަށް ވެފައިވާ ކަމަށާއި، މިހާތަނަށް މި ޚިދުމަތު ގެ ފެންވަރު ރަނގަޅު ކުރުމަށް މިސަރުކާރުން އެއްވެސް ކަމެއް ކޮށްފައިނުވާ ކަމަށެވެ.
ގއ.އަތޮޅު ހޮސްޕިޓަލަށް އިޝާރާތް ކުރައްވައި ހުސެއިން ހަސަން ވިދާޅުވީ އެ ހޮސްޕިޓަލްގެ ޚިދުމަތު ގެ ފެންވަރު ވަރަށް ދަށް ކަމަށާއި، މިފަހުން ވެސް ހޮސްޕިޓަލްގެ އިހުމާލުން ދެ ކުޑަ ކުދިންނާއި، މާބަނޑު އަންހެނެއް ފުރާނަ ގެއްލުނު ކަމަށް ތުހުމަތު ކުރެވޭ ކަމަށް އޭނާ ވިދާޅުވި އެވެ.
މީގެ އިތުރުން ހުސެއިން ހަސަން ވިދާޅުވީ، ހޮސްޕިޓަލްގެ އައު އިމާރާތް އެޅުމަށް ބިން ހަމަޖެއްސި ނަމަވެސް މިއަދާ ހަމައަށް މި މަޝްރޫއުގެ އެއްވެސް އަމަލީ މަސައްކަތެއް ކުރިއަށް ގެންގޮސްފައިނުވާ ކަމަށެވެ.
އަޅުގަނޑަށް ފާހަގަކުރެވުނު ގޮތުގައި ވިލިނގިލީގައި މިސަރުކާރުގެ އިހުމާލުން ވަރަށް ހިތާމަވެރި ހާދިސާތައް ހހޮސްޕިޓަލްގައި ހިނގައިފި. ގާތްގަނޑަކަށް ދަންނަވާ ކަމަށްވާނަމަ ހަމަ ފުރާނަތަކެއް ވިލިނގިލީގެ ރައްޔިތުންތަކެއް އެތަނުގެ އިހުމާލުން އެތަނުގެ ފެންވަރު ދަށް ކަމުން އަޅުގަނޑުމެންނާ ވަކިވެގެން ހިނގައްޖެ. ދެ ކުޑަ ކުދިން މާބަނޑު އަންހެނެއް ވަކި ވެގެން ހިނގައްޖެ އެ ހޮސްޕިޓަލްގެ ފެންވަރު ދަށްވުމުގެ ސަބަބުން. ވިލިނގިލީ ރައްޔިތުން އެކަމަށް އިހުތިޖާޖަށް ވެސް ނުކުމެއްޖެ. އެހެން ނަމަވެސް މި ސަރުކާރުން އެކަމަށް އިޖާބަ ދޭތަނެއް ފެނިގެން ނުދޭ. އަޅުގަނޑުމެންނަށް ފެނިގެން ގޮސްފައިވާނެ ވިލިނގިލީގައި ހޮސްޕިޓަލް އެޅުމަށްޓަކައި ބިމެއް ކަނޑައެޅިފައި އެބައޮތް. އެއްވެސް މަސައްކަތެއް ކުރިއަށްދާތަނެއް ނުފެނޭ. އެއީ ސިއްހީ ދާއިރާއިން އެމަނިކުފާނު ވެވަޑައިގެން ވައުދުތަކުގެ ތެރެއިން މިދިޔަ އަހަރު ދުވަހުގެ ތެރޭގައި އެއްވެސް ކަމެއް ކޮށްދީފައިނުވޭ.އެމްޑީޕީ ގައުމީ މަޖިލީހުގެ ވިލިނގިލީ ދާއިރާގެ ރައީސް ހުސެއިން ހަސަން
ގއ.އަތޮޅު ހޮސްޕިޓަލްގެ އައު އިމާރާތުގެ މަސައްކަތް ފެށުމަށް ބިން ހަވާލުކޮށްފައިވަނީ 5 ޖުލައި 2025 ގަ އެވެ.
މި ހޮސްޕިޓަލްގެ އައު އިމާރާތުގެ މަސައްކަތު ގެ އަގަކީ، 185،571،402.42ރ އެވެ.
މި މަޝްރޫއުގެ މަސައްކަތް ކުރިއަށް ގެންދިއުމަށް އެމްޓީސީސީއާ ހަވާލުކޮށް، ސަރުކާރުން ބުނެފައިވަނީ މި އައު އިމާރާތުގެ މަޝްރޫއުކީ ގއ.އަތޮޅުގެ ސިއްހީ ޚިދުމަތުގެ ފެންވަރު މަތިކޮށް، ރައްޔިތުންނަށް ލިބޭ ޚިދުމަތްތައް ފުޅާކުރުމަށް އެޅޭ މުހިންމު ފިޔަވަޅެއް ކަމަށެވެ. މި އިމާރާތް ނިމުމުން، އިތުރު ޚިދުމަތްތަކާއި، ޒަމާނީ ވަސީލަތްތައް ރައްޔިތުންނަށް ފޯރުކޮށްދެވޭނެ ކަމަށެވެ.
ނަމަވެސް މި ސަރުކާރުގައި އެ ހޮސްޕިޓަލުގެ ޚިދުމަތުގެ ފެންވަރު ދަށްވެ، މީހުންގެ ފުރާނަ އަށް ނުރައްކާ ވަމުންދާތީ ގއ. ވިލިނގިލީ ރައްޔިތުން އިހުތިޖާޖު ވެސް ކޮށްފައިވެ އެވެ.
