ތޮއްޑޫ ކައުންސިލުން ޓޫރިޒަމް މިނިސްޓަރާއި ބައްދަލުކުރައްވައިފި
މިބައްދަލުވުމުގައި މަޝްވަރާކުރެއްވި ކަންކަމުގެ ތެރޭގައި ވިޔަފާރިތަކަށް އަމާޒުކޮށް ޓެކްސޭޝަން އަދި ފައިނޭންސް މެނޭޖް ކުރާނެގޮތުގެ ތަމްރީން ޕްރޮގްރާމެއް ކުރިޔަށް ގެންދިޔުމަށް ނިންމާފައިވޭ
ތޮއްޑޫ ކައުންސިލުން ޓޫރިޒަމް މިނިސްޓަރާއި ބައްދަލުކުރެއްވުން
އއ. ތޮއްޑޫ ކައުންސިލުން މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމް އާއި ބައްދަލުކޮށްފިއެވެ.
ތޮއްޑޫ ކައުންސިލުން މައުލޫމާތު ދިން ގޮތުގައި މިމަހުގެ 10 ވަނަ ދުވަހު ބޭއްވުނު މިބައްދަލުމުގައި ގިނަ ކަންތައްތަކާއި މެދުވަނީ މަޝްވަރާކުރެވިފައެވެ. އެގޮތުން ދިވެހިރާއްޖޭގެ ޓްއަރިޒަމަށް 50 އަހަރު ފުރުމުގެ މުނާސަބަތާއި، ތޮއްޑޫގައި ރަޖިސްޓްރީ ކުރެވޭ 50 ވަނަ ގެސްޓްހައުސް ހުޅުވުމުގެ އުފަލުގައި ބާއްވާ ރަސްމިއްޔާތުތަކުގައި ބައިވެރިވެވަޑައިގަތުމަށް ތޮއްޑޫ ކައުންސިލުން ވަނީ މިނިސްޓަރަށް ދައުވަތު އަރުވާފައެވެ. މީގެއިތުރުން މިބައްދަލުވުމުގައި ތޮއްޑޫގައި ލައިފްގާޑް ޓްރެއިންގ ޕްރޮގްރާމެއް ބޭއްވުމަށް ނިންމާފައިވާކަމަށް އެކައުންސިލުން މައުލޫމާތުދެއެވެ.
ތޮއްޑޫ ކައުންސިލުން މިނިސްޓަރ އޮފް ޓޫރިޒަމް ޑރ.އަބްދުﷲ މައުސޫމް އާއި މަޝްވަރާކުރެއްވި ކަންކަމުގެ ތެރޭގައި ވިޔަފާރިތަކަށް އަމާޒުކޮށް ޓެކްސޭޝަން އަދި ފައިނޭންސް މެނޭޖް ކުރާނެ ގޮތުގެ ތަމްރީން ޕްރޮގްރާމެއް މީރާއާއި ޓުއަރިޒަމް މިނިސްޓްރީ އަދި ތޮއްޑޫ ކައުންސިލް ގުޅިގެން ކުރިޔަށް ގެންދިޔުމަށް ނިންމާފައިވާކަމަށާއި، އަދި ޓްއަރިސްޓް ވިޒިޓް ސެންޓަރުގެ މަޝްރޫއު އާއި ގުޅޭ ގޮތުން ވެސް މިބައްދަލުވުމުގައި މަޝްވަރާކޮށްފައިވާކަމަށް ކައުންސިލުން މައުލޫމާތު ދީފައިވެއެވެ. އަދި ޓޫރިސްޓް ޤަވާއިދުގައި އިތުރަށް ހިމެނިދާނެ ބައެއް ކަންތައްތަކާ ގުޅޭ ގޮތުންވެސް ތޮއްޑޫ ކައުންސިލުން މިނިސްޓަރާއި އެކު ބޭއްވެވި މިބައްދަލުވުމުގައި ހިޔާލު ބަދަލު ކުރެވިފައިވާ ކަމަށްވެސް ކައުންސިލުން މައުލޫމާތުދެއެވެ.
