ފީފާ ވޯލްޑްކަޕްގެ ޓިކެޓް ވިއްކަން ފަށައިފި

އަންނަ އަހަރު ރަޝިއާގައި ބޭއްވުމަށް ހަމަޖެހިފައިވާ ފުޓުބޯޅައިގެ އެންމެ ބޮޑު މުބާރާތް ކަމަށްވާ ފީފާ ވޯލްޑްކަޕްގެ ޓިކެޓް ވިއްކަން ފަށައިފިއެވެ.

ފީފާއިން ނެރުނު ބަޔާނެއްގައި އެ އިދާރާއިން ހާމަކޮށްފައިވާ ގޮތުގައި ބުރާސްފަތި ދުވަހު ވިއްކަން ފަށާފައިވަނީ ޓިކެޓް ވިއްކުމުގެ ތިން ފިޔަވަހީގެ ތެރެއިން ފުރަތަމަ ފިޔަވަހީގެ ތެރޭގައި ހިމެނޭ ޓިކެޓުތަކެވެ. މި ފިޔަވަހީގައި ފީފާއިން ނިންމާފައިވަނީ އޮންލައިންކޮށް ސަޕޯޓަރުންނަށް ޓިކެޓް ވިއްކުމަށެވެ. އެގޮތުން ބުރާސްފަތި ދުވަހުން ފެށިގެން އޮކްޓޯބަރު މަހުގެ 12 ވަނަ ދުވަހާ ހަމަޔަށް ފީފާގެ ރަސްމީ ވެބްސައިޓް މެދުވެރިކޮށް ޓިކެޓް ރިޒާވް ކުރުމުގެ ފުރުސަތު ވަނީ ހުޅުވާލާފައެވެ. ސަޕޯޓަރުންނަށް ޓިކެޓް ގެރަންޓީވިކަން އިނގިގެން ދާނީ ނޮވެމްބަރު މަހުގެ 16 ވަނަ ދުވަހުއެވެ.

ވޯލްޑްކަޕް ޓިކެޓް ވިއްކުމުގެ ދެވަނަ ފިޔަވަހީގެ ދަށުން ޑިސެމްބަރު މަހުގެ ފުރަތަމަ ދުވަހު އޮންނަ ވޯލްޑްކަޕްގެ ގުރު ނެގުމުގެ ރަސްމިއްޔާތަށްފަހު ސަޕޯޓަރުންނަށް ޓިކެޓް ގަނެވޭނެއެވެ. އެ ޓިކެޓްތަށް ކުރިޔާލާ ރިޒާވް ކުރަން ނުޖެހޭނެކަމަށް ފީފާއިން ހާމަކުރެއެވެ. ފީފާއިން އެންމެ ފަހު ވަގުތުވެސް ޓިކެޓް ވިއްކުމަށް ނިންމާފައިވާ ކަމަށް އެ އިދާރާއިން ހާމަކުރެއެވެ. އެގޮތުން އަންނަ އަހަރުގެ އެޕްރީލް މަހުގެ 18 ވަނަ ދުވަހުން ފެށިގެން ވޯލްޑްކަޕް ހުޅުވުމުގެ ރަސްމިއްޔާތާ ހަމަޔަށް ޓިކެޓް ވިއްކާނެއެވެ.

ފުރަތަމަ ފިޔަވަހީގެ ދަށުން ފީފާއިން ފަސް ވައްތަރެއްގެ ޓިކެޓް ވިއްކުމަށް ވަނީ ނިންމާފައެވެ. އެއީ ވަކިވަކި މެޗުތަކަށް ހާއްސަ ޓިކެޓާ ވަކިވަކި ސްޓޭޑިއަމްތަކަށް ވިއްކާ ޓިކެޓާ މުބާރާތަށް ކޮލިފައިވާ ޓީމުތަކުގެ ވަކިވަކި މެޗުތަކަށް ވިއްކާ ޓިކެޓެވެ. މީގެ ތެރެއިން ވަކިވަކި ސްޓޭޑިއަމްތަކަށް ވިއްކާ ޓިކެޓްގައި ސެމީ ފައިނަލްގެ މެޗުތަކާ ތިންވަނަ ހޮވާ މެޗުގެ އިތުރުން ފައިނަލް މެޗުގެ ޓިކެޓް ނުހިމެނޭނެއެވެ. ހަމައެހެންމެ ފީފާއިން ރަޝިއާގެ ރައްޔިތުންނަށް ހާއްސަކޮށް ޓިކެޓް ވިއްކާނެއެވެ. މި ޓިކެޓްތަކުގެ އަގު އެހެން ޓިކެޓްތަކަށްވުރެ ކުޑަވާނެއެވެ. މީގެއިތުރުން ހާއްސަ އެހީއަށް ބޭނުންވާ މީހުންނަށް ހާއްސަކޮށްވެސް ފީފާއިން ޓިކެޓް ވިއްކާނެއެވެ.

އަންނަ އަހަރުގެ ޖޫން މަހުގެ 14 ވަނަ ދުވަހު ފަށާ ފީފާ ވޯލްޑްކަޕް ވެގެންދާނީ މި މުބާރާތް ބާއްވާ 21 ވަނަ ފަހަރަށެވެ. ދުނިޔޭގެ ހަ ބައްރުން ޖުމްލަ 32 ޓީމު ވާދަކުރާ މި މުބާރާތަށް މިހާތަނަށް ކޮލިފައިވެފައި ވަނީ ބްރެޒިލްއާ އިރާންއާ ޖަޕާންއާ ބެލްޖިއަމްއާ ސައުތް ކޮރެއާ އާ ސައުދީ އަރަބިއްޔާގެ އިތުރުން މުބާރާތް ބާއްވާ ގައުމުގެ ހައިސިއްޔަތުން އޮޓަމެޓިކްކޮށް ކޮލިފައިވި ރަޝއާއެވެ.