އެމްޑީޕީގެ ކެންޑިޑޭޓުން މައްޗަންގޮޅި އުތުރު ދާއިރާގައި ކުރިޔަށް ގެންދިޔަ ދޮރުން ދޮރަށް ހަރަކާތަށް ހޫނު ތަރުހީބެއް
މާލޭގެ ތަރައްގީއަށްޓަކާ މާލެ ސިޓީ ކައުންސިލްގެ މެޖޯރިޓީ އެމްޑީޕީއަށް ދިނުމުގެ މުހިންމުކަން ފާހަގަކުރައްވާ އާޒިމް ވިދާޅުވީ، މިހާރުވެސް މުހިންމު ގިނަ މަސައްކަތް ތަކަކަށް، މާލެ ސިޓީ ކައުންސިލްގެ މެޖޯރިޓީ ހިއްސާކުރާ ރައީސް ޑރ. މުހައްމަދު މުއިއްޒުގެ ޕީއެންސީ މެމްބަރުން ހުރަސް އަޅަމުންދާކަމަށް.
އެމްޑިޕީގެ ފަރާތުން މައްޗަންގޮޅި އުތުރު ދާއިރާގައި ބުދަ ދުވަހު ބޭއްވި ދޮރުން ދޮރަށް ހަރަކާތުގެ ތެރެއިން | އަހުމަދު މައިމޫން މުހައްމަދު
ބުދަ ދުވަހު މައްޗަންގޮޅި އުތުރު ދާއިރާގައި އެމްޑީޕީގެ ކެންޑިޑޭޓުން ކުރިއަށް ގެންދިޔަ ދޮރުން ދޮރަށް ހަރަކާތަށް އެ ދާއިރާގެ ރައްޔިތުންގެ ވަރަށް ހޫނު ތަރުހީބެއް ލިބިފައިވާކަމަށް މާލެ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީގެ ފަރާތުން މާލެ ސިޓީ ކައުންސިލްގެ މޭޔަރުކަމަށް ވާދަކުރައްވާ އާޒިމް މިހެން ވިދާޅުވީ، މި ކެމްޕެއިން ހަރަކާތާ ގުޅިގެން ރާއްޖެ ޓީވީ އަށް މައުލޫމާތު ދެއްވަމުންނެވެ.
އެމްޑީޕީގެ ރައީސް އަބްދުﷲ ޝާހިދު ވެސް ބައިވެރިވެވަޑައިގެންނެވި މި ކެމްޕެއިން ހަރަކާތުގައި މޭޔަރު އާޒިމްގެ އިތުރުން ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓުން ވެސް ބައިވެރިވެވަޑައިގެންނެވި އެވެ.
މިގޮތުން އެމްޑީޕީގެ ފަރާތުން މައްޗަންގޮޅި އުތުރު ދާއިރާގެ ސިޓީ ކައުންސިލް މެމްބަރުކަމަށް ވާދަކުރައްވާ ޚަދީޖާ މުހައްމަދު އާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާކަމަށް ވާދަކުރައްވާ އައިޝަތު ރީޝާގެ އިތުރުން، އެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުކަމަށް ވާދަކުރައްވާ ހައްވާ ސޮހުވާ މި ހަރަކާތުގައި އަމަލީގޮތުން ބައިވެރިވެ، ރައްޔިތުންނާ ބައްދަލުކުރެއްވި އެވެ.
މޭޔަރު އާޒިމް ވިދާޅުވީ، ރައްޔިތުންގެ ފަރާތުން ލިބުނު ހޫނު ތަރުހީބުން ހާމަވީ، މާލެ ސިޓީ ކައުންސިލްގެ މޭޔަރުކަމުގައި ހުންނަވައިގެން އޭނާ މިހާތަނަށް ކުރައްވާފައިވާ މަސައްކަތްތައް ވެސް ރައްޔިތުން ހެޔޮހިތުން ބަލައިގަނެފައިވާކަން ކަމުގަ އެވެ.
އަޅުގަނޑުމެންނަށް ފެނިގެން ދިޔައީ ވަރަށް ބޮޑު ތަރުހީބެއް އެމްޑީޕީ އަށް އޮތްކަން މާލޭގަ. އަޅުގަނޑުމެން ފުދޭވަރަކަށް ބޮޑު އޭރިއާ އެއް ކަވާކޮށްފިން، ހާއްސަކޮށް މައްޗަންގޮޅި އުތުރު ދާއިރާ އިން ވަރަށް ބޮޑު ތަރުހީބެއް ލިބޭކަން ފާހަގަކުރެވޭ. އަދި ރައްޔިތުން ފާހަގަކުރަމުންދޭ މިހާރުވެސް އެމްޑީޕީގެ މޭޔަރަކު ހުރެގެން މިވީ ކުރު މުއްދަތުގެ ތެރޭގައި ގިނަ ހިދުމަތްތަކެއް ކޮށްދީފަ އޮތްކަމަށް، އެހެންވީމަ ފުރިހަމަ ދައުރެއް ދިނުމަކީ ރަނގަޅުކަމެއް ކަމަށް އެމީހުން ބުނަމުންދޭ. އެހެން ވީމަ އަޅުގަނޑަށް ފާހަގަވެގެން މި ދިޔައީ އެމްޑީޕީގެ ޓީމަކާ އެއްކޮށް އަޅުގަނޑަށް މި ފުރުސަތު ލިބުނިއްޔާ މާލޭގެ ރައްޔިތުން ވަރަށް ބޮޑަށް އެބަ ގަބޫލު ކުރޭ މާލެ އަށް ބޮޑެތި ބަދަލުތަކެއް ގެނެވި، މިހާރު ގެންނަމުންދާ ބަދަލުތައްވެސް އިތުރަށް ހަރުދަނާ ކުރެވިގެންދާނެ ކަންމާލެ ސިޓީ ކައުންސިލްގެ މޭޔަރު އާދަމް އާޒިމް
މާލޭގެ ތަރައްގީއަށްޓަކާ މާލެ ސިޓީ ކައުންސިލްގެ މެޖޯރިޓީ އެމްޑީޕީއަށް ދިނުމުގެ މުހިންމުކަން ފާހަގަކުރައްވާ އާޒިމް ވިދާޅުވީ، މިހާރުވެސް މުހިންމު ގިނަ މަސައްކަތް ތަކަކަށް، މާލެ ސިޓީ ކައުންސިލްގެ މެޖޯރިޓީ ހިއްސާކުރާ ރައީސް ޑރ. މުހައްމަދު މުއިއްޒުގެ ޕީއެންސީ މެމްބަރުން ހުރަސް އަޅަމުންދާކަމަށެވެ. ހާއްސަކޮށް ހައުސިން އަދި ބިންތަކުގެ ވާހަކަ މަޝްވަރާކުރުމަށް ބާއްވާ މާލެ ސިޓީ ކައުންސިލްގެ ބައްދަލުވުންތަކުގެ ކޯރަމް ޕީއެންސީގެ މެމްބަރުން ގެއްލުވާލާކަމަށް އާޒިމް ވިދާޅުވި އެވެ.
މައްޗަންގޮޅި އުތުރު ދާއިރާގައި އެމްޑީޕީ އިން ބޭއްވި މި ކެމްޕެއިން ހަރަކާތުގައި މޭޔަރު އާޒިމް އާއި އެމްޑީޕީ ގެ ކެންޑިޑޭޓުން ވަނީ އެ ދާއިރާގެ ގިނަ އަދަދެއްގެ ރައްޔިތުންނާ ބައްދަލުކޮށް، އެ ފަރާތްތަކުގެ ހުރި ކަންބޮޑުވުންތައް އޮޅުންފިލުވާފަ އެވެ. ދާއިރާގެ އާންމު ރައްޔިތުންގެ ބޮޑު ތަރުހީބެއް ލިބިގެން ދިޔަ މި ހަރަކާތުގައި، އެމްޑީޕީގެ ގިނަ އަދަދެއްގެ އާންމު މެމްބަރުން ވެސް ވަނީ ބައިވެރިވެފަ އެވެ.
