މޭޔަރު އާޒިމް ހުޅުމާލެ ދެކުނުގައި ދޮރުން ދޮރަށް ކެމްޕެއިން ފަށައިފި
އަންގާރަ ދުވަހުގެ ހަވީރު ކުރިއަށް ގެންދިޔަ މި ކެމްޕެއިން ހަރަކާތުގައި މޭޔަރު އާޒިމްގެ އިތުރުން، އެމްޑީޕީގެ ފަރާތުން ހުޅުމާލެ ދެކުނު ދާއިރާއަށް ވާދަކުރައްވާ އަޙުމަދު ޣާލިބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާ ކަމަށް ވާދަކުރައްވާ އައިޝަތު ރީޝާގެ އިތުރުން، އެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުކަމަށް ވާދަކުރައްވާ މަރިޔަމް އަމީނާ ވެސް އަމަލީގޮތުން ބައިވެރިވެވަޑައިގެން ރައްޔިތުންނާ ބައްދަލުކުރެއްވި.
އެމްޑީޕީގެ ފަރާތުން މާލެ ސިޓީ ކައުންސިލް ގެ މޭޔަރުކަމަށް ވާދަކުރައްވާ، މާލެ ސިޓީގެ މިހާރުގެ ވެސް މޭޔަރ އާދަމް އާޒިމް، ހުޅުމާލެ ދެކުނު ދާއިރާގައި އަންގާރަ ދުވަހު ބޭއްވި ދޮރުން ދޮރަށް ހަރަކާތުގެ ތެރެއިން | ރާއްޖެ އެމްވީ
ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީގެ ފަރާތުން މާލެ ސިޓީ ކައުންސިލްގެ މޭޔަރުކަމަށް ވާދަކުރައްވާ، މާލެ ސިޓީގެ މިހާރުގެވެސް މޭޔަރު އާދަމް އާޒިމް ހުޅުމާލެ ދެކުނު ދާއިރާގެ ރައްޔިތުންނާ ބައްދަލުކުރައްވައި "ދޮރުން ދޮރަށް" ހަރަކާތެއް އަންގާރަ ދުވަހު ކުރިއަށް ގެންދަވައިފި އެވެ.
މި ހަރަކާތަކީ އިންތިޚާބުގެ ކެމްޕެއިންގެ ތެރެއިން ރައްޔިތުންގެ ހާލަތު ގާތުން ބެއްލެވުމަށް ކުރިއަށް ގެންދިޔަ ހަރަކާތެކެވެ.
އަންގާރަ ދުވަހުގެ ހަވީރު ކުރިއަށް ގެންދިޔަ މި ކެމްޕެއިން ހަރަކާތުގައި މޭޔަރު އާޒިމްގެ އިތުރުން ހުޅުމާލެ ދެކުނު ދާއިރާގެ ރައްޔިތުންގެ މަޖިލިސް މެމްބަރު ޑރ. އަޙްމަދު ޝަމްހީދު ބައިވެރިވެވަޑައިގެންނެވި އެވެ. މީގެ އިތުރުން ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓުން ވެސް މި ހަރަކާތުގައި ބައިވެރިވެވަޑައިގެންނެވި އެވެ.
މިގޮތުން އެމްޑީޕީގެ ފަރާތުން ހުޅުމާލެ ދެކުނު ދާއިރާއަށް ވާދަކުރައްވާ އަޙުމަދު ޣާލިބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާ ކަމަށް ވާދަކުރައްވާ އައިޝަތު ރީޝާގެ އިތުރުން، އެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުކަމަށް ވާދަކުރައްވާ މަރިޔަމް އަމީނާ ވެސް މި ހަރަކާތުގައި އަމަލީގޮތުން ބައިވެރިވެވަޑައިގެން ރައްޔިތުންނާ ބައްދަލުކުރެއްވި އެވެ.
މި ހަރަކާތާ ގުޅޭގޮތުން "ރާއްޖެ އެމްވީ" އަށް މައުލޫމާތު ދެއްވަމުން މޭޔަރު އާދަމް އާޒިމް ވިދާޅުވީ، މި ހަރަކާތުގެ މައިގަނޑު މަގްސަދަކީ ވީހާވެސް ގިނަ ރައްޔިތުންނާ ބައްދަލުކޮށް، އެބޭފުޅުންގެ ޚިޔާލުތައް ވަރަށް ގާތުން އަޑުއެހުން ކަމަށެވެ. އަދި އަމާޒަކީ ރައްޔިތުންނަށް ދޭންޖެހޭ ޚިދުމަތްތައް، އެ ރައްޔިތުން ބޭނުންވާ ގޮތަށް ފޯރުކޮށްދިނުން ކަމަށް އާޒިމް ވިދާޅުވި އެވެ.
އެމްޑީޕީ އަކީ އަބަދުވެސް ރައްޔިތުންނާ ގާތުން މަސައްކަތްކުރާ ޕާޓީ އަކަށް ވާތީ، އަޅުގަނޑުމެންގެ މަސައްކަތް މިކުރެވެނީ ކޮންމެ ދުވަހަކުވެސް އެކި އެކި ރައްޔިތުންނާ ބައްދަލުކޮށް ހިޔާލުތައް ހޯދައިގެން، ހުރި ދަތިތައް ބަލާ، އަޑުއަހާ، އެމީހުންނަށް އެކަން ހައްލުކޮށްދިނުން. އެއީ އަޅުގަނޑުމެންގެ ޒިންމާ އެއް.މާލެ ސިޓީގެ މޭޔަރު އާދަމް އާޒިމް
ހުޅުމާލޭގެ މުނިސިޕަލް ކަންކަމާ ގުޅޭގޮތުން ވާހަކަދައްކަވަމުން އާޒިމް ވިދާޅުވީ، ހުޅުމާލޭގެ މުނިސިޕަލް ޚިދުމަތްތައް ރަސްމީކޮށް ސިޓީ ކައުންސިލާ ހަވާލުނުކުރި ނަމަވެސް، މިހާރުވެސް މާލެ ސިޓީ ކައުންސިލުން ހުޅުމާލޭގައި ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން އެންމެ މުހިންމު މަސައްކަތެއްގެ ގޮތުގައި އާޒިމް ފާހަގަކުރެއްވީ ހުޅުމާލޭގައި ހުރި ހުރިހާ މިސްކިތްތަކެއްގެ އާބާތުރަ ފިލުވުމަށް ކައުންސިލުން ކުރެއްވި މަސައްކަތްތަކެވެ.
މި ކެމްޕެއިން ހަރަކާތުގެ ތެރެއިން މޭޔަރު އާޒިމާއި އެމްޑީޕީގެ ކެނޑިޑޭޓުން ވަނީ ހުޅުމާލެ ދެކުނު ދާއިރާގެ ގިނަ އަދަދެއްގެ ރައްޔިތުންނާ ބައްދަލުކޮށް، އެ ފަރާތްތަކުގެ ހުރި ކަންބޮޑުވުންތައް އޮޅުންފިލުވާފަ އެވެ. އެމްޑީޕީގެ ފަރާތުން ކުރިއަށް ގެންދިޔަ މި ހަރަކާތަށް އެ ދާއިރާގެ އާންމު ރައްޔިތުންގެ ފަރާތުން ބޮޑު ތަރުހީބެއް ލިބިފައިވާކަން ފާހަގަކުރެވެ އެވެ.
