މި އަހަރުގެ ނިޔަލަށް ވިޔަފާރި ބަނދަރު ތިލަފުއްޓަށް ބަދަލުކޮށް ނިމެނޭކަމަށް ބުނި ނަމަވެސް އެކަން ނުވެ އަންނަ އަހަރަށް އައު ތާރީހެއް މުއިއްޒު ދެއްވައިފި

މި އަހަރުގެ ނިޔަލަށް މާލޭގެ ވިޔަފާރި ބަނދަރު ތިލަފުއްޓަށް ބަދަލުކޮށް ނިމެނޭކަމަށް އެމްޕީއެލް އިން މީގެ ކުރިން ބުނި ނަމަވެސް އެކަން ނުވެ 2027 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހު އެ މަސައްކަތް ނިމޭނެކަމަށް ރައީސް ޑރ. މުހައްމަދު މުއިއްޒު އިއުލާން ކުރައްވައިފި އެވެ. 

މާލޭ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ މަސައްކަތް 2024 އެޕްރީލުގައި ފަށާނެ ކަމަށް އެމްޕީއެލްއިން ކުރިން ހާމަކޮށްފައި އޮއްވާ، އެ ބަނދަރު މި އަހަރު ވެސް ތިލަފުއްޓަށް ބަދަލު ކުރުމުގެ މަސައްކަތް ކުރިއަށް ގެންދަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

މިއަހަރަށް ރިޔާސީ ބަޔާން އިއްވަމުން ބުރާސްފަތި ދުވަހު ރައީސް މުއިއްޒު ވިދާޅުވީ މާލޭ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ ފުރަތަމަ ފިޔަވަހީގެ މަސައްކަތަކީ މުހިންމު މަސައްކަތެއް ކަމަށެވެ. ރައީސް ވިދާޅުވީ ފުރަތަމަ ފިޔަވަހީގައި ހިމެނޭ އެންމެ މުހިންމު މަސައްކަތް ކަމުގައިވާ 125 މީޓަރުގެ އިންޓަރނޭޝަނަލް ކީ ވޯލްގެ މަސައްކަތް ބުރާސްފަތި ދުވަހު އެމްޕީއެލް އިން ބަޔަކާއި ހަވާލު ކުރާނެ ކަމަށެވެ. 

ރައީސް ވިދާޅުވީ ޑޮމެސްޓިކް ޕޯޓް ތިލަފުއްޓަށް ބަދަލުކުރުމަށް ބޭނުންވާ 2 ކިލޯ މީޓަރު ކީ ވޯލް އާއި ޕޭވް ކުރުމާއި އިމާރާތްތައް އެޅުމުގެ މަސައްކަތް އަދި އިކްވިޕްމަންޓް ހޯދުމުގެ މަސައްކަތް މިއަހަރުގެ މެދުތެރޭގައި އެކި ފަރާތްތަކާއި ހަވާލު ކުރެވޭނެ ކަމަށެވެ. 

މި ހުރިހާ މަސައްކަތެއް ނިންމާނެ އިރާދަ ކުރެއްވިއްޔާ. 11 ނޮވެމްބަރު 2027 ވަނަ ދުވަހު މާލޭގެ ވިޔަފާރި ބަނދަރު ތިލަފުއްޓަށް ބަދަލު ކުރާނެ. މި ބަދަލާއެކު، ބަނދަރުގެ ހިދުމަތްތައް ފެށުމާއެކު މިހާރު 7 ދުވަހުން ހުސްކުރެވޭ ބޯޓު 48 ގަޑި އިރު ތެރޭގައި ހުސްކުރެވި، ބަނދަރުގައި މުދާ ބެހެއްޓޭނެ މުއްދަތު އިތުރުކުރެވި މުދާ ރާއްޖެ ގެނައުމަށް ހިނގާ ހަރަދު ކުޑަވާނެ. މި ހުރިހާ ބަދަލަކާ އެކު މުދަލުގެ އަގު ކުޑަކުރެވި އޭގެ ފައިދާ ރައްޔިތުންނަށް ލިބޭނެ. އަދި މިހާރު މާލޭގައި ގުދަން ކުރެވޭ މުދާ ތިލަފުށީގައި ގުދަން ކުރުމުގެ މަގު ފަހިވެ މާލޭގެ މާރުކޭޓް ސަރަހައްދުގައި ކުރަމުންދާ ހޯލްސޭލް ވިޔަފާރި އެކީގައި ތިލަފުއްޓަށް ބަދަލުކުރެވިގެންދާނެ. 

ރައީސް ޑރ. މުހައްމަދު މުއިއްޒު

ރައީސް މިފަދައިން ވިދާޅުވި ނަމަވެސް، އެމްޕީއެލްގެ ކުރީގެ ސީއީއޯ މުހައްމަދު ވަޖީހު އިބްރާހީމް މީގެ ކުރިން ވިދާޅުވެފައިވަނީ މިމަސައްކަތް 2025/2026 ގެ ތެރޭ ނިންމުމަކީ އަމާޒެއް ކަމަށެވެ. ކުރީ ސަރުކާރުގައި ގުޅީފަޅުގައި ތަރައްގީ ކުރަން ފެށި ވިޔަފާރި ބަނދަރު ތިލަފުއްޓަށް ބަދަލުކުރާކަން ރައީސް އިއުލާން ކުރެއްވީ ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ ދެވަނަ ފިޔަވަހި އިފްތިތާހުކުރުމަށް 4 ޖެނުއަރީ 2024 ގައި ބޭއްވި ހަފްލާގަ އެވެ. 

މި ޕްރޮޖެކްޓަރީ ރައީސް އިބްރާހިމް މުހައްމަދު ޞާލިހުގެ ސަރުކާރުގައި އިންޑިއާގެ ލައިން އޮފް ކްރެޑިޓް ފެސިލިޓީގެ ދަށުން 75 އިންސައްތަ ހަރަދުކުރާ ގޮތަށް ގުޅީފަޅުގައި ތަރައްގީ ކުރަން ނިންމި މަޝްރޫއެކެވެ.  މި ޕްރޮޖެކްޓަށް 400 މިލިއަން ޑޮލަރު ނުވަތަ 6.1 ބިލިއަން ރުފިޔާ ހޭދަކުރަން ހަމަޖެހިފައިވެ އެވެ.