އަސްކަރިއްޔާ ގެ އިތުރު 17 އިންސްޕެކްޓަރ ވެސަލް މިއަހަރު ހިދުމަތަށް ނެރެވޭނެ: ރައީސް

ސިފައިން ހިންގާ މެރިޓައިމް ސެކިއުރިޓީ އޮޕަރޭޝަންތަކަށް، ސާޗް އެންޑް ރެސްކިއު އޮޕަރޭޝަންތަކަށް ބޭނުންވާ އިތުރު 17 އިންސްޕެކްޓަރ ވެސަލް މިއަހަރު ތެރޭގައި ހިދުމަތައް ނެރެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. 

މިއަހަރަށް މަޖިލިސް ހުޅުވުމާއި ރިޔާސީ ބަޔާން އިއްވުމަށް ބޭއްވި ޖަލްސާގައި ރައީސް މުއިއްޒު ވިދާޅުވީ ގައުމުގެ ސިޔާދަތާއި އަމިއްލަ މިނިވަންކަމާއި ސިޔާދަތު ދަމަހައްޓާ ދިފާއީ ރައްކާތެރިކަން ކަށަވަރު ކުރުމަށްޓަކައި މުހިންމު ކުރިއެރުންތަކެއް ހޯދިފައިވާ ކަމަށެވެ. ރައީސް ވިދާޅުވީ ގައުމީ ދިފާއީ ބާރުގެ ހުރިހާ ދާއިރާއެއްގެ ފެންވަރު މަތިކުރުމަށް ވޭތުވެދިޔަ އަހަރު ގިނަ މަސައްކަތްތަކެއް ކުރެވުނު ކަމަށެވެ. އެގޮތުން ކޯސްޓްގާޑުގެ ހިދުމަތް ދެގުނަ ކުރުމުގެ މަސައްކަތުގެ ތެރެއިން ތުރުކީ ސަރުކާރުން ދެއްވި ހިލޭ އެހީއެއްގެ ގޮތުގައި، ސިފައިންގެ ހިދުމަތަށް މިހާތަނަށް ތާރާފް ކުރެވުނު އެންމެ ބޮޑު އަސްކަރީ މަނަވަރު މިދިޔަ އަހަރު ހިދުމަތަށް ނެރެފައިވާ ކަމަށް ރައީސް ވިދާޅުވި އެވެ. 

ރައީސް ވިދާޅުވީ ސިފައިން ހިންގާ މެރިޓައިމް އޮޕަރޭޝަންތަކާއި ސަރޗް އެންޑް ރެސްކިއު އޮޕަރޭޝަންތަކަށް ބޭނުންވާ އިންސްޕެކްޓަރ ކްރާފްޓް ހޯދުމުގެ މަސައްކަތް ފަށާ އޭގެ ތެރެއިން 3 އުޅަނދު ހިދުމަތަށް ނެރެފައިވާ ކަމަށެވެ. 

މިއަހަރު ތެރޭގައި އިރާދަކުރެއްވިއްޔާ އިތުރު 17 އުޅަނދު ހިދުމަތަށް ނެރެވޭނެ. އަދި 2 ހާބަރ ކްރާފްޓް ވެސެލް ހޯދުމަށް ޖަޕާނު ސަރުކާރުން އެހީ ދިނުމަށް ވަނީ ނިންމާފައި. ހަމަ އެއާއެކު ދިވެހިރާއްޖޭގެ ސަރަހައްދާއި ހާއްސަ އިގްތިސާދީ ސަރަހައްދު  ބެލެހެއްޓުމަށް އޮސްޓްރޭލިއާ ސަރުކާރުގެ އެހީގެ ހޯދާ މަނަވަރު އިރާދަކުރެއްވިއްޔާ މިއަހަރު ހިދުމަތަށް ނެރެވޭނެ. މީގެ އިތުރުން އެމްއެންޑީއެފް އެއަރކޯ ތަރައްގީ ކުރުމުގެ މަސައްކަތް ވެސް މިދިޔަ އަހަރު ކުރިއަށް ގެންދެވުނު. މިގޮތުން އެމްއެންޑީއެފްގެ ފުރަތަމަ އެއަރ ސްޓޭޝަން އައްޑޫ ސިޓީގައި ގާއިމްކޮށް ވަނީ ހުޅުވާފައި. އަދި އުތުރުގައި އެއަރ ސްޓޭޝަންއެއް ގާއިމް ކުރުމަށް ށ. ފުނަދޫގައި ހަދަމުންދާ އެއަރސްޓޭޝަންގެ މަސައްކަތް ނިންމާ އިރާދަ ކުރެއްވިއްޔާ މިއަހަރު ބޭނުން ކުރަން ފަށާނަން

ރައީސް ޑރ. މުހައްމަދު މުއިއްޒު

ރައީސް ވިދާޅުވީ މިދިޔަ އަހަރު އެމްއެންޑީއެފްގެ މެރިންކޯ އަށް އެންމެ ޒަމާނީ އާމްޑް ވެހިކަލްތައް ހޯދާފައިވާ ކަމަށެވެ. އަދި މިއަހަރު ތެރޭގައި ވެސް މެރިންކޯ ގެ ގާބިލުކަން އިތުރުކުރުމަށް ބޭނުންވާ އާލާތްތައް ހޯދާ ވަސީލަތްތައް ގާއިމްކުރުމުގެ މަސައްކަތް ކުރިއަށް ގެންދެވޭނެ ކަމަށް ރައީސް ވިދާޅުވި އެވެ. 

ރައީސް ވިދާޅުވީ ސިފައިންގެ ތައުލީމު ކުރިއަރުވަން ކުރަމުން އަންނަ މަސައްކަތްތަކުގެ ތެރެއިން ގިރިފުށި ބިން ހިއްކުމާއި އުމްރާނީ ވަސީލަތްތައް ގާއިމް ކުރުމުގެ މަސައްކަތާއި އެމްއެންޑީއެފް އައްޑޫ ސިޓީ ސެންޓަރު އިތުރަށް ތަރައްގީކުރުމުގެ މަސައްކަތް ފަށާފައިވާ ކަމަށެވެ. މީގެ އިތުރުން ކަޅުތުއްކަލާ ކޮށީގައި އުމްރާނީ ބިނާގެ މުހިންމު މަޝްރޫތަކެއް މިއަހަރުގެ ތެރޭގައި ފަށާނެ ކަމަށް ރައީސް ވިދާޅުވި އެވެ.