ކަނޑުގެ މައްސަލަ ބަލަން އޮފީހެއް އުފައްދާ ޒިންމާވާންޖެހޭ ފަރާތްތަކަށް ގާނޫނީ ގޮތުން ފިޔަވަޅުއަޅާނެ ކަމަށް ރައީސް ވިދާޅުވެއްޖެ
ރާއްޖޭގެ ކަނޑުގެ ސަރަހައްދުތަކާ ބެހޭ ކަންކަން ބެލެހެއްޓުމަށް ޚާއްސަ އޮފީހެއް އުފައްދަވައި، ޗާގޯސް މައްސަލައިގައި ދައުލަތަށް ގެއްލުންވާ ގޮތަށް އަމަލުކުރި ފަރާތްތަކުގެ މައްސަލަ ބަލަން "ކޮމިޝަން އޮފް އިންކުއަރީ" އެއް އުފައްދަވާނެ ކަމަށް ރައީސުލްޖުމްހޫރިއްޔާ އިއުލާންކުރައްވައިފި. ރިޔާސީ ބަޔާން އިއްވަވަމުން ރައީސް ވިދާޅުވީ، ކަނޑުގެ ސަރަހައްދު ކަނޑައެޅުމުގައި ކުރީ ސަރުކާރުން ނިންމި ނިންމުންތަކާ ގުޅިގެން ގާނޫނީ ފިޔަވަޅު އަޅުއްވާނެ ކަމަށް. ނަމަވެސް، ކުރީގެ ބަންޑާރަނައިބު ބޭރުގެ ފަރާތްތަކަށް ލިޔެކިޔުންތަކެއް ދިން ކަމަށް ބުނާ ވާހަކަ މި ސަރުކާރުގެ ބަންޑާރަނައިބު ވަނީ ދޮގުކުރައްވާފައި.
ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހުގައި ރިޔާސީ ބަޔާން އިއްވަނީ | ރައްޔިތުންގެ މަޖިލިސް
ޗާގޯސް އަދި ރާއްޖެ ކަނޑުން ފުށު އަރާ މައްސަލައިގައި އިޓްލޮސް އިން ނިންމާފައި އޮތް ނިންމުމަކާއި ގުޅިގެން، ކަނޑުގެ މައްސަލަ ބަލަން އޮފީހެއް އުފައްދާ ޒިންމާވާންޖެހޭ ފަރާތްތަކަށް ގާނޫނީ ގޮތުން ފިޔަވަޅުއަޅާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަހަރަށް ރައްޔިތުންގެ މަޖިލީހަށް ރިޔާސީ ބަޔާން އިއްވަމުން ރައީސް މުއިއްޒު ވިދާޅުވީ ދިވެހިރާއްޖޭގެ ކަނޑުގެ ސަރަހައްދުތަކާއި ބެހޭ ގާނޫނުގައި ބަޔާންކޮށްފައިވާ ދިވެހިރާއްޖޭގެ އާކިޕެލެޖިކް ބޭސް ޕޮއިންޓްތަކަށް ހަވާލާދީ ދިވެހިރާއްޖޭގެ ހާއްސަ އިގްތިސާދީ ސަރަހައްދަކީ ދޫކޮށްލި ކަނޑުގެ ސަރަހައްދު ހިމެނޭ ގޮތަށް، ގާނޫނުގައި މިހާރުވެސް ކަނޑައަޅާފައިވާ ސަރަހައްދު ކަމަށް ނިންމާ އިއުލާން ކުރައްވާ ކަމަށެވެ.
ރައީސް ވިދާޅުވީ ގާނޫނު އަސާސީއަށް ގެނެވެނު 6 ވަނަ އިސްލާހަށް ރިއާޔަތްކޮށް ދިވެހިރާއްޖޭގެ ކަނޑުތަކުގެ ގާނޫނަށް އިސްލާހު ގެނައުމަށް މަޖިލީހަށް ފޮނުވާނެ ކަމަށެވެ. މީގެ އިތުރުން ދިވެހިރާއްޖޭގެ ސަރަހައްދުތައް ކަނޑައެޅުމާ ބެހޭ ކަނޑައެޅުމަށް، ސަރަހައްދުތަކުގެ ކޯޑިނޭޓްތަކާއި ބޭސް ލައިންތައް ކަނޑައެޅުމަށް ދިވެހިރާއްޖޭގެ ސަރަހައްދުތަކާ ބެހޭ އެންމެހާ ކަންކަމާއި، މައްސަލަތައް ބެލުމަށް ދެމެހެއްޓެނެވި ގޮތެއްގައި މަސައްކަތް ކުރާނެ އޮފީހެއް ގާއިމް ކުރުމަށް މާހިރުންގެ ފަރާތުން ލަފާ ދެއްވާފައިވާ ކަމަށެވެ.
އެހެންކަމުން މިކަމުގައި ސަރުކާރުގެ ވަކި އިދާރާއެއް ގާއިމްކުރުން މުހިންމު ކަމަށް ފެންނާތީ ދިވެހިރާއްޖޭގެ ސަރަހައްދުތަކާ ބެހޭ އޮފީސް އަޅުގަނޑު އިރާދަކުރެއްވިއްޔާ ގާއިމް ކުރާނަން. ހަމަ އެހެންމެ މި މައްސަލައާއި ގުޅޭގޮތުން ނިމިދިޔަ ސަރުކާރުން ނިންމާފައިވާ ބައެއް ނިންމުންތަކުގެ ސަބަބުން ދިވެހި ދައުލަތަށް އިއާދަ ނުކުރެވޭފަދަ ބޮޑެތި ގެއްލުންތަކެއް ލިބިފައިވާ ކަމަށް، މައްސަލައިގައި އައްޔަން ކުރެވުނު ބައިނަލްއަގުވާމީ މާހިރުންގެ ލަފާ ލިބިފައިވާތީ އެ ނިންމެވުންތައް ނިންމި ފަރާތްތަކާއި ސުވާލުކޮށް، އެ ނިންމުންތައް ނިންމި ސަބަބުތައް ދެނެގަތުމަށާއި، އެކަންކަމާއި ގުޅޭގޮތުން ގާނޫނީ ގޮތުން ފިޔަވަޅުއަޅަންޖެހޭނަމަ އެކަން ކުރުމަށާއި، އެފަދަ ކަންކަން ތަކުރާރު ނުވާނެ ގޮތަށް ކަންކަން އެކަށައެޅުމަށް ގާނޫނު އަސާސީގެ 115 ވަނަ މާއްދާގެ (ގ) ގެ ދަށުން ކޮމިޝަން އޮފް އިންކުއަރީއެއް އުފައްދަން އަޅުގަނޑު ނިންމިކަން ވެސް އަޅުގަނޑު އިއުލާނު ކުރަން.ރައީސް ޑރ. މުހައްމަދު މުއިއްޒު
ކަނޑުގެ މައްސަލައިގައި ތަހުގީގުކޮށް ދައުވާ އުފުލާނެ މޭރުމަކުން ރައީސް ރިޔާސީ ބަޔާނުގައި ވިދާޅުވި އިރު، ޗާގޯސްގެ މައްސަލާގައި ދިވެހި ދައުލަތަށް ގެއްލުންވާނެ ފަދަ ލިޔެކިޔުންތަކެއް އޭރުގެ ބަންޑާރަނައިބު އިބްރާހިމް ރިފްއަތު ބޭރުގެ ބަޔަކަށް ދިން ކަމަށް ބުނާ ވާހަކަ ރައީސް މުއިއްޒުގެ ބަންޑާރަނައިބު އަހުމަދު އުޝާމް އޮތީ ދޮގު ކުރައްވާފަ އެވެ.
މަޖިލީހުގެ ޖަލްސާއެއްގައި 15 އޮކްޓޯބަރު 2025 ގައި ބަންޑާރަނައިބު އުޝާމް ވިދާޅުވީ މި މައްސަލައާ ގުޅޭ އެއްވެސް ލިޔެކިއުމެއް ބޭރުގެ ފަރާތްތަކަށް ދީފައިވާ ކަމަށް ގަބޫލު ނުކުރެވޭ ކަމަށާއި، އެއީ މި ސަރުކާރުން ވަރަށް ތަފްސީލުކޮށް ބަލަމުން ގެންގޮސްފައިވާ މައްސަލަ އެއް ކަމުގައެވެ.
އަޅުގަނޑަކަށް ގަބޫލެއް ނުކުރެވޭ އެއްވެސް ލިޔެކިއުމެއް ބޭރުގެ ފަރާތްތަކަށް ދީފައި ހުރި ކަމަކަށް އެނގޭތޯ. އަޅުގަނޑުމެން މި މައްސަލަ ހަމަ އަޅުގަނޑު މިމަގާމާ ހަވާލުވި ހިސާބުން މިމައްސަލަ ވަރަށް ބޮޑަށް ދިރާސާ ކުރުމަށްފަހު މިކަމަށް އަޅުގަނޑުމެންގެ ސަރުކާރުގައި ހަމަ އަޅަންޖެހޭ ފިޔަވަޅުތައް އެޅުމަށްޓަކައި މިމައްސަލަ ކުރިއަށް ގެންދިއުމަށްޓަކައި މިހާރު ވެސް މަސައްކަތްތަކެއް ކުރެވެމުން އެބަދޭ. އަޅުގަނޑަށް ގަބޫލެއް ނުކުރެވޭ މިދިޔަ ސަރުކާރުގެ ބަންޑާރަ ނައިބު ބަޔަކަށް ލިޔެކިއުންތަކެއް ދީފައި ހުރި ކަމަކަށް.ބަންޑާރަނައިބު އަހުމަދު އުޝާމް
ޗާގޯސްގެ މައްސަލާގައި މިސަރުކާރުގެ ރައްޔިތުން މަޖިލީހުގެ މެންބަރުންނާއި، ސިޔާސީ ބޭފުޅުން ގެންދަވަނީ ހަގީގަތާ ހިލާފު ދޮގު ވާހަކަތައް ފަތުރަމުން ކަން ބަންޑާރަ ނައިބު އުޝާމުގެ ޖަވާބުން ސާފުކޮށް އެނގިގެން ދިޔަކަން ފާހަގަ ކުރެވެއެވެ. އަދި ކުރީ ސަރުކާރުގެ ވެރިން ކަނޑުވިއްކާލާ ފައިސާ ނެގި ކަމަށް ވެސް ބުނަމުން ގެންދިޔައެވެ.
ރާއްޖޭގެ ކަނޑުގެ ބައެއް ވިއްކާލާފައިވާ ކަމަށް ތުހުމަތު ކުރަމުންދާއިރު، މި ސަރުކާރުގެ ފުރަތަމަ 100 ދުވަހުގެ ތެރޭގައި އިޓްލޮސްގެ ނިންމުން އިސްތިއުނާފުކުރާނެ ކަމަށް ރައީސް މުއިއްޒު ވައުދުވެވަޑައިގެންނެވިއެވެ. ނަމަވެސް މިއަދާ ހަމައަށް އަދިވެސް އެކަން ވެފައެއް ނެތެވެ.
އިނގިރޭސިވިލާތުން ޗާގޯސް މޮރިޝަސް އަށް ދީފައިވަނީ 22 މެއި 2025 ގައެވެ.
ޗާގޯސްގެ ސިޔާދަތީ ބާރު މޮރިޝަސް އަށް ލިބޭ ކަމަށް ބައިނަލްއަގުވާމީ ކޯޓުން ނިންމި ނިންމުމާއެކު، ޗާގޯސް އާއި ރާއްޖެއާ ދެމެދު އޮތް ކަނޑުގެ އިން ވަކިކުރުމަށް އިޓްލޮސް އަށް މޮރިޝަސް އިން ހުށަހެޅި މައްސަލާގައި އެ ކޯޓުން ވެސް ވަނީ އެ އިންޓަނޭޝަނަލް ކޯޓު އޮފް ޖަސްޓިސް ނިންމުން ވެސް ދަމަހައްޓާފައެވެ.
