ފައިސާ ބެހުމާއި ނަފްސު ވިއްކާލުމަކީ އެމްޑީޕީގެ މެމްބަރުން ކުރާނެ ކަމެއް ނޫން: ކުޑޫ
ލާމަރުކަޒީ ނިޒާމުގެ ބާރުތައް ކަނޑުވާލައި، ހުރިހާ ބާރެއް މައި ސަރުކާރަށް ޖަމާކުރަން މި ސަރުކާރުން މަސައްކަތް ކުރަމުންދާ ކަމަށް އެމްޑީޕީގެ ކެމްޕެއިން މެނޭޖަރު މުހައްމަދު އިބްރާހިމް (ކުޑޫ) ވިދާޅުވި. އެމްޑީޕީގެ "ހޭވައްލާ ތައްޔާރު" ކެމްޕެއިން އިފްތިތާހު ކުރުމަށް ބޭއްވި ޖަލްސާގައި އޭނާ ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބަށް އެ ޕާޓީން ނުކުންނާނީ ރަށުގެ ތަރައްގީއާއި ރައްޔިތުންގެ ބާރުވެރިކަން ކަށަވަރުކޮށްދޭނެ ވަރުގަދަ މެނިފެސްޓޯއަކާ އެކުގަ ކަމަށް.
އެމްޑީޕީގެ ކެމްޕެއިން މެނޭޖަރ، ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެމްޑީޕީގެ ޖަލްސާގައި ވާހަކަދައްކަވަނީ | ރާއްޖެ އެމްވީ
ފައިސާ ބެހުމާއި ނަފްސު ވިއްކާލުމަކީ އެމްޑީޕީގެ މެމްބަރުން ކުރާނެ ކަމެއް ނޫން ކަމަށް އެމްޑީޕީގެ ކެމްޕެއިން މެނޭޖަރ، ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވިދާޅުވެއްޖެ އެވެ.
އޭނާ އެފަދައިން ވިދާޅުވީ ހޯމަ ދުވަހުގެ ރޭ އެމްޑީޕީ އިން ބޭއްވި ހޭވައްލާ ތައްޔާރު ޖަލްސާގައި ވާހަކަދައްކަވަމުންނެވެ.
އެ ޖަލްސާގައި ވާހަކަދައްކަވަމުން ކުޑޫ ފާހަގަކުރެއްވި ގޮތުގައި، ވެރިކަމުގެ އަސްލު ބާރަކީ ރައްޔިތުންކަން ސާބިތުކޮށްދިން ސިޔާސީ ޕާޓީއަކީ އެމްޑީޕީ އެވެ. 20 ވަނަ ރައްޔިތުންގެ މަޖިލިސް ބޭނުންކޮށްގެން، މި ސަރުކާރުން ލާމަރުކަޒީ ނިޒާމުގެ ބާރުތައް ނިގުޅައިގަންނަމުންދާ ކަމަށް ކުޑޫ ވިދާޅުވި އެވެ. މީގެ އިތުރުން، ކައުންސިލްތަކުގެ މަސައްކަތްތަކަކީ ބޭކާރު ކަންތައްތަކެއްގެ ގޮތުގައި ދެއްކުމަށް ސަރުކާރުން މަސައްކަތް ކުރަމުންދާ ކަމަށާއި، ވެރިކަމުގެ ހުރިހާ ބާރެއް މައި ސަރުކާރަށް ނަގައިވާ ކަމަށް ވެސް އޭނާ ވިދާޅުވި އެވެ.
ކައުންސިލްތަކަކީ ރައްޔިތުންގެ އެއްބާރުލުމާއެކު، ރައްޔިތުންގެ މުހުތާދުތައް ފުއްދައިދިނުމަށް މަސައްކަތްކުރާ ތަނަކަށް ހެދުމުގެ ވިސްނުން ގެންގުޅޭ ޕާޓީއަކީ އެމްޑީޕީކަން އޭނާ ފާހަގަކުރެއްވި އެވެ. މީގެ އިތުރުން، އެމްޑީޕީގެ މިއަހަރުގެ މެނިފެސްޓޯ އެކުލަވާލުމުގައިވެސް އެންމެ ބޮޑު އިސްކަމެއް ދީފައިވަނީ އެ ކަންކަމަށް ކަމަށް ކުޑޫ ވިދާޅުވި އެވެ.
"ރައްޔިތުންނަށް ފައިދާ ވާނެ ރަށަށް ކުރިއެރުން ގެނެސްދޭނެ މެނިފެސްޓޯ އެއް. ކައުންސިލަރުންނާއި އަންހެނުންގެ ތަރައްޤީ އަށް މަސައްކަތް ކުރާ މީހުން މި ދަނީ އަހުލުވެރިކުރުވަމުން މެނިފެސްޓޯ އަށް. އަޅުގަނޑުމެންގެ މި ފަހަރުގެ ޝިއާރަކީ ހޭވައްލާ ތައްޔާރު." ކުޑޫ ވިދާޅުވި އެވެ.
ހޭވައްލާ ތައްޔާރު، މި ޝިއާރުގެ ދަށުން އެމްޑީޕީ އިން ލޯކަލް ކައުންސިލް އަދި ޑަބްލިއުޑީސީ އިންތިޚާބަށް މިފަހަރު ނުކުންނަ އިރު 3 ތަނބެއް މި އިންތިޚާބަށް ތައްޔާރު ވުމަށް އެމްޑީޕީ އިން ކަނޑައަޅާފައިވެ އެވެ. އެއީ ރައްޔިތުންނަށް ބާރު، ވިޔަފާރި އަށް ފަހި އަދި ފަހި ދިރިއުޅުން މި ތިން ތަނބެވެ. އޭގެ ތެރެއިން ހޯމަ ދުވަހުގެ ރޭ ގެ ޖަލްސާގައި ދެކުނުގައި ލޯންޗްކުރީ ރައްޔިތުންނަށް ބާރު މި ތަނބެވެ.
