ފުވައްމުލަކުން އައްޑޫ އަށް ދެވެނީ ދޮޅު ގަޑި އިރުން ކަަމަށް ވިދާޅުވެ މިނިސްޓަރ އިހުސާން ހެއްދެވީ އިތުރުފުޅެއް!
ދެކުނުގެ 4 އަތޮޅުގައި ސީޕްލޭން ޚިދުމަތް ފެށުމުގެ ރަސްމިއްޔާތުގައި ހޯމް މިނިސްޓަރ އަލީ އިހުސާން ވިދާޅުވީ ސީޕްލޭން ޚިދުމަތް ފެށުމުން ފުވައްމުލަކާއި އައްޑޫއާ ދެމެދު 20 މިނިޓުން ދަތުރުކުރެވޭނެ ކަމަށެވެ. ނަމަވެސް މިނިސްޓަރ ވިދާޅުވި ދޮޅު ގަޑި އިރުގެ ދަތުރާއި 5 ގަޑި އިރަށް ދިގުވާ ވާހަކަ ހަގީގަތާ ޚިލާފެވެ. މިހާރު އާރްޓީއެލް އާއި ލޯންޗުން އެ ދަތުރުތަކަށް ނަގަނީ ގަޑި އެއް ހާއިރެވެ.
ދެކުނުގެ 4 އަތޮޅުގައި މޯލްޑިވިއަންގެ ސީ ޕްލޭންގެ ޚިދުމަތުން ގުޅާލުން | ރައީސް އޮފީސް
ފުވައްމުލަކާއި އައްޑޫ އާއި މެދު ކަނޑު ދަތުރުކޮށްފައި ދެވެނީ ދޮޅު ގަޑި އިރުން ކަމަށް ފާހަގަކުރައްވާ ރައީސް ޑރ.މުހައްމަދު މުއިއްޒުގެ ހޯމް މިނިސްޓަރ އަލީ އިހުސާން އިތުރުފުޅު ހައްދަވައިފި އެވެ.
މިނިސްޓަރ އެފަދައިން ވިދާޅުވީ ދެކުނުގެ 4 އަތޮޅުގައި މޯލްޑިވިއަންގެ ސީ ޕްލޭންގެ ޚިދުމަތުން ގުޅުވާލުމަށް އައްޑޫ ސިޓީގައި ގަން އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރ ވަނީ ކަނޑު މަޑު އިރު ފުވައްމުލަކާއި އައްޑޫ އަށް ދެވެނީ ދޮޅު ގަނޑި އިރުން ކަމަށާއި ބައެއް ދަތުރުތައް 3 ގަޑި އިރަށް ދިގުދެމިގެންދާ ކަމަށް ވިދާޅުވެފަ އެވެ. އަދި ކަނޑު ގަދަ ނަމަ ދަތުރު ހުއްޓާލުމަށް ފަހު އަނބުރާ ދާން ޖެހޭ ފަހަރު ވެސް ދިމާވާ ކަމަށް ވަޒީރު ވިދާޅުވި އެވެ. ސީޕްލެއިންގެ ޚިދުމަތް ފެށުމުން މިހާރު 20 މިނިޓުން އެ ދަތުރު ކުރެވުމަކީ ލިބުނު ވަރަށް ބޮޑު ކުރިއެރުމެއް ކަމަށް އިހުސާން ވަނީ ވިދާޅުވެފަ އެވެ. މިނިސްޓަރ ވަނީ ސަރުކާރަށް ވަރަށް ބޮޑަށް ތައުރީފްކުރައްވާ ވާހަކަދައްކަވާފަ އެވެ.
"ޚިޔާލަށް ގެންނަވާ ކަނޑު ރަނގަޅު ދުވަހެއްގައި ފަސް ގަޑިއިރުން ދޮޅު ގަޑިއިރުން ދެން 20 މިނެޓަށް މިހާރު އައި ތަފާތުގެ ވާހަކަ. ކަނޑުގަދަ ދުވަހެއް ނަމަ ދަތުރު ނުކުރަން ނިންމާ ދަތުރު ވަކި ހިސާބަކުން އަނބުރާ ދާންޖެހުމާއި ނުވަތަ ދޮޅު ގަޑިއިރުގެ ދަތުރު 3 ގަޑިއިރަށް ދެމިގެގެންދޭ. މި ހުސް ދިމާވެފައި ހުރި ކަންތައްތައް. އެހެންވީމަ އަޅުގަނޑުމެންގެ ހަޔާތަށް ތަރައްގީއޭ މިކިޔާ އަސްލު އިހުސާސް ވާކަހަލަ ބަދަލެއް ގެނެވޭނެ ނިންމުމެއް މިއީ" އިޙްސާން ވިދާޅުވިއެވެ.
މިނިސްޓަރ މިހެން ވިދާޅުވި ނަމަވެސް މިހާރު އާރްޓީއެލްގައި ކުރާ ދަތުރުތަކާއި އެހެނިހެން ލޯންޗްދަތުރުތަކުގައި ވެސް އައްޑޫ އާއި ފުވައްމަލަކާއި ދެމެދު ކުރާ ދަތުރުތަކަށް ނަގަނީ ގަޑި އެއް ހާއިރެވެ. އެހެންކަމުން ދޮޅު ގަޑި އިރުން އެ ދަތުރު ކުރަމުން އައި ކަމަށް އަދި 5 ގަޑި އިރަށް ދަތުރު ދިގުދެމިގެންދާ ކަމަށް ވިދާޅުވެ އެ މަނިކުފާނު ދެއްކެވީ ހަގީގަތާއި ޚިލާފު ވާހަކަތަކެކެވެ.
އިހުސާން އިތުރަށް ވިދާޅުވީ ދެކުނު އަތޮޅުތައް ސީޕްލޭނުން ގުޅާލުމުން އެތަންތަނުގެ އަސްލު މަންފާ ރައްޔިތުންނަށް ލިބޭނެ ކަމަށެވެ. އިހުސާން އިތުރަށް ވިދާޅުވީ ރާއްޖޭގެ ދެކުނުގެ ޓޫރިޒަމް އަށް ބަލާ ނަމަ އެންމެ ބޮޑު ގޮންޖެހުމަކީ، ފަތުރުވެރީން ރާއްޖެ އައިސް މަޑުކުރާ މުއްދަތު އިތުރުނުވުން ކަމަށެވެެ. އެކަން ބަދަލުކުރުމަށް ދެކުނު ވައިގެ މަގުން ގުޅާލުމަކީ މުހިންމު ކަމެއް ކަމަށް އިހުސާން ވިދާޅުވި އެވެ.
