ޖަރުމަނު ބޭންކެއްގެ ތިޖޫރީ ތޮރުފާލައިގެން އެތައް ހާސް މިލިއަން ޔޫރޯ ވަގަށް ނަގައިފި

ޖަރުމަނުގެ ބޭންކެއްގެ ތިޖުރީ ތޮރުފާލައިގެން އެތައް ހާސް މިލިއަން ޔޫރޯގެ ވަގަށް ނަގައިފި އެވެ.

ޖަރުމަނުގެ ބޭންކެއްގެ ތިޖޫރީން ބަޔަކު އެތައް ހާސް މިލިއަން ޔޫރޯ ވަގަށް ނަގައިފިކަން ހާމަ ކުރީ ޖަރުމަނުގެ ފުލުހުންނެވެ. މިކަން ހިނގާފައި ވަނީ ބަންދުގެ ތެރޭގައި ހޮނިހިރު ދުވަހުގެ ވަގުތެއްގައެވެ.

މިވައްކަމުގެ ސަބަބުން ޖެލްޒެންކީރްޝެން ސިޓީގައި ހުންނަ ޝްޕާކަސެން ބޭންކުގެ 2,700 ކަސްޓަމަރުންނަށް އަސަރުކޮށްފައިވާކަމަށް ފުލުންނާއި ބޭންކުން މަޢުލޫމާތު ދީފައިވެއެވެ. ބޭންކުގައި ހުރި ތިން ހާހެއްހާ ސޭފްޓީ ޑިޕޮސިޓް ފޮށިތައް ފަޅާލައިވާ ކަމަށް ބުނެފައިވެއެވެ. މިއީ ބޭންކުގައި ހުރި ސޭފްޓީ ފޮށިތަކުގެ 95 އިންސައްތަ އަށް ވުރެ ގިނަ އަދަދެކެވެ.

ފުލުހުންގެ ތަރުޖަމާނު ތޯމަސް ނޮވަސްޒިކް ވިދާޅުވިގޮތުގައި ތަޙްޤީޤުކުރާ ފަރާތްތަކުން ލަފާކުރާގޮތުން މިވައްކަމުގެ އަގު 10 މިލިއަން އާއި 90 މިލިއަން ޔޫރޯ އާ ދެމެދުގެ އަދަދަކަށް އަރާނެ އެވެ.

ޖަރުމަނުގެ ނިއުސް އޭޖެންސީ ޑީޕީއޭއިން ރިޕޯޓުކޮށްފައިވާ ގޮތުގައި މިވައްކަމަކީ ޖަރުމަނުގައި ހިނގާފައިވާ އެންމެ ބޮޑެތި ވައްކަންތަކުގެ ތެރޭގައި ހިމެނޭނެ ވައްކަމެކެވެ.

ކޮންމެ ސޭފްޓީ ޑިޕޮސިޓް ބޮކްސްއެއް 10,300 ޔޫރޯ ($12,088) އަށް އިންޝުއަރ ކޮށްފައިވާ ކަމަށާއި، ބޭންކުގެ ކަސްޓަމަރުން އިތުރަށް އަމިއްލަ އަށް އިންޝުއަރ ނުކުރާނަމަ މިއަދަދަށް ވުރެ އިތުރަށް ބަދަލު ނުލިބޭނެ ކަމަށް ބޭންކުގެ ވެބްސައިޓުގައި ބަޔާންކޮށްފައިވެއެވެ.

ހޯމަ ދުވަހު ހެނދުނު 4 ގަޑިއިރު ކުރިން ބޭންކުން ފަޔާ އެލާމް އެޅުމާ ގުޅިގެން ޕޮލިސް އޮފިސަރުންނާއި ފަޔަރ ފައިޓަރުން އެތަނަށް ގޮސްފައިވެއެވެ. އެމީހުން އެތަނަށް ދިޔައިރު ފާރުގައި ލޯވަޅެއް އަޅާފައިވަނިކޮށް ފެނި، ތިޖޫރީ ހަލާކުކޮށްލާފައި ކަން ފާހަގަ ކުރެވުނެވެ. ފުލުހުންނަށް ފާހަގަވި ގޮތުގައި ތިޖޫރީގެ ބޭސްމަންޓް ފާރު ފޫދުއްވާލުމަށް ބޮޑު ބުރުމާއެއް ބޭނުންކޮށްފައިވާ ކަމަށް ލަފާކުރެވެއެވެ.

މަންޒަރު ދުށް މީހުން ތަހުގީގު ކުރާ ފަރާތްތަކަށް ކިޔައިދިން ގޮތުގައި މާސްކް އަޅައިގެން ތިބި ފިރިހެނުންތަކެއް ޕާކިންގ ގަރާޖެއްގައި ބޮޑެތި ދަބަސްތަކެއް އުފުލަމުން ދަނިކޮށް ފެނިފައިވެ އެވެ.

ޖެލްޒެންކީރްޝެން ސިޓީއަކީ ފްރޭންކްފަރޓުން 192 ކިލޯމީޓަރު (119 މޭލު) އުތުރު-ހުޅަނގުގައި އޮންނަ ސިޓީއެކެވެ.