ޖަރުމަނު ވިލާތުގެ ރައީސް ގެ ހަރުކަށި ފާޑުވިދާޅުވުން ޓްރަމްޕަށް - ފޭރޭ މީހުންގެ ހާއްޔަކަށް ދުނިޔެ ބަދަލު ވެއްޖެ!

ޖަރުމަނުގެ ރައީސް ފްރޭންކް-ވޯލްޓަރ ސްޓައިންމަޔަރ، އެމެރިކާގެ ރައީސް ޑޮނަލްޑް ޓްރަމްޕްގެ ޚާރިޖީ ސިޔާސަތަށް ވަރަށް ބޮޑަށް ފާޑުވިދާޅުވެއްޖެ އެވެ. އަދި ދުނިޔޭގެ ނިޒާމު "ފޭރޭ މީހުންގެ ހާއްޔަކަށް" ބަދަލުވެ، އެއްވެސް އުސޫލެއް ނެތް ބަޔަކު ބޭނުންހާ އެއްޗެއް ފޭރިގަންނަ ތަނަކަށް ވިޔަ ނުދިނުމަށް އެމަނިކުފާނު ވަނީ ދުނިޔެ އަށް އިލްތިމާސް ކުރައްވާފަ އެވެ.

އާދަޔާ ޚިލާފަށް ހަރުކަށި އިބާރާތުން ދެއްކެވި މި ވާހަކަފުޅުގައި، ވޭތުވެދިޔަ ހަފުތާ ބަންދުގައި ވެނެޒުއޭލާގެ ރައީސް ނިކޮލަސް މަދޫރޯ މަގާމުން ދުރުކުރުމަށް ކުރެވުނު މަސައްކަތްތަކަށް އިޝާރާތް ކުރައްވަމުން، ޖަރުމަނުގެ ކުރީގެ ޚާރިޖީ ވަޒީރުކަން ވެސް ކުރެއްވި ސްޓައިންމަޔަރ ވިދާޅުވީ، ދުނިޔޭގެ ޑިމޮކްރަސީ އަށް މިއިން ދުވަހަކު ނުވާވަރުގެ ނުރައްކަލާ ކުރިމަތިލާން ޖެހިފައިވާ ކަމަށެވެ.

ޖަރުމަނުގެ ރައީސަކީ މައިގަނޑު ގޮތެއްގައި ރަމްޒީ މަގާމެއް ފުރުއްވާ ބޭފުޅެއް ނަމަވެސް، ޖަރުމަނުގެ ސިޔާސީ މައިދާނު ގައި އެމަނިކުފާނުގެ ބަސްފުޅުތަކަކީ ބަރުދަން ހުންނަ ވާހަކަފުޅުތަކެކެވެ. އަދި ސިޔާސީ އެހެން ބޭފުޅުންނަށް ވުރެ ބޮޑަށް މިނިވަންކަމާ އެކު ޚިޔާލު ފާޅުކުރުމުގެ ފުރުސަތު އެމަނިކުފާނަށް އޮވެ އެވެ.

ރަޝިއާ އިން ކްރައިމިއާ ހިފުމާއި ޔޫކްރޭނަށް އަރައިގަތުމަކީ ދުނިޔޭގެ މަސްރަހަށް އައި ބޮޑު ބަދަލެއްގެ ގޮތުގައި ސިފަކުރައްވަމުން، ސްޓައިންމަޔަރ ވިދާޅުވީ އެމެރިކާގެ އަމަލުތަކުގެ ސަބަބުން ދުނިޔޭގެ ތާރީޚީ ނިޒާމަށް ދެވަނަ ފަހަރަށް ބޮޑު ލޮޅުމެއް އައިސްފައިވާ ކަމަށެވެ.

"މި ދުނިޔޭގެ ނިޒާމު ބިނާކުރުމަށް އެންމެ ބޮޑު އެހީތެރިކަމެއް ފޯރުކޮށްދިން އަދި އެންމެ މުހިންމު ބައިވެރިޔާ ކަމަށްވާ އެމެރިކާ އިން، މިއަދު މިވަނީ އެ ނިޒާމުގެ ހަމަތަކާއި އުސޫލުތައް މުގުރާލާފައި،" ކަމަށް ބުދަ ދުވަހުގެ ރޭ ބޭއްވި ސިމްޕޯޒިއަމެއް ގައި ވާހަކަފުޅު ދައްކަވަމުން ސްޓައިންމަޔަރ ވިދާޅުވި އެވެ.

އެމަނިކުފާނު އިތުރަށް ވިދާޅުވި ގޮތުގައި، ހިނގަމުން މިދާ ކަންކަމަކީ އެއްވެސް އުސޫލެއް ނެތި ބޭނުންހާ އެއްޗެއް ފޭރިގަނެ، އަދި ބޮޑެތި ބާރުތަކުން ގައުމުތަކަކީ އެމީހުންގެ އަމިއްލަ މިލްކެއްގެ ގޮތުގައި ދެކި "ފޭރޭ މީހުންގެ ހާއްޔަކަށް" ދުނިޔެ ބަދަލު ކުރުން ކަމުގައެވެ.

ނުރައްކާތެރި ހާލަތްތަކުގައި އަމަލީ ގޮތުން ފިޔަވަޅު އަޅަންޖެހޭ ކަމަށާއި، ދުނިޔޭގެ ނިޒާމު ހިމާޔަތްކުރުމަށްޓަކައި ބްރެޒިލް އަދި އިންޑިއާ ފަދަ ގައުމުތައް ބައިވެރިކޮށް، އެ ގައުމުތަކަކީ މި ނިޒާމުގެ ބައިވެރިންކަން ކަށަވަރުކުރަން ޖެހޭނެ ކަމަށް ވެސް އެމަނިކުފާނު ވިދާޅުވި އެވެ.