އެމެރިކާ އާ އެކު ވެދާނެ ނިއުކްލިއާ އެއްބަސްވުމެއްގެ ދަށުން، އީރާނުން މުއްސަނދިކޮށްފައިވާ ޔުރޭނިއަމް އެހެން ގައުމަކަށް ބަދަލުކުރަން އުޅޭކަމަށް ދެކެވޭ ވާހަކަތައް އެ ގައުމުން ދޮގުކޮށްފި

އެމެރިކާ އާ އެކު ވެދާނެ ނިއުކްލިއާ އެއްބަސްވުމެއްގެ ދަށުން، އީރާނުން މުއްސަނދިކޮށްފައިވާ ޔުރޭނިއަމް އެހެން ގައުމަކަށް ބަދަލުކުރަން އުޅޭކަމަށް ދެކެވޭ ވާހަކަތައް އެ ގައުމުން ދޮގުކޮށްފި އެވެ.

އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ފޮރިން ޕޮލިސީ ހެޑް އަލީ ބަޣޭރީ ހޯމަ ދުވަހު ވިދާޅުވީ، އެ ގައުމުން މުއްސަނދިކޮށްފައިވާ ޔުރޭނިއަމްގެ ރައްކާކުރެވިފައިވާ މިންވަރާ ގުޅޭގޮތުން އެއްވެސް މަޝްވަރާ އެއް ނުކުރާނެ ކަމަށެވެ.

"މުއްސަނދިކޮށްފައިވާ ނިއުކްލިއާ މާއްދާތައް އެހެން އެއްވެސް ގައުމަކަށް ބަދަލުކުރުމުގެ އެއްވެސް ގަސްދެއް އީރާނުގެ އޮފިޝަލުންގެ ނެތް. އަދި ކުރިއަށްދާ މަޝްވަރާތަކަކީ އެފަދަ ކަންކަމާ ގުޅޭގޮތުން ކުރެވޭ މަޝްވަރާތަކެއް ނޫން،" ބަޣޭރީ ވިދާޅުވި އެވެ.

ބަޣޭރީ ވަނީ 2024 ވަނަ އަހަރުގެ މެއި މަހާ ހަމައަށް ތިން އަހަރު ދުވަހު އީރާނުގެ ޑެޕިއުޓީ ފޮރިން މިނިސްޓަރުކަން ކުރައްވާފައެވެ. އަދި އޭގެ ފަހުން ތިން މަސް ދުވަހުގެ މުއްދަތަކަށް އޭނާ ވަނީ އެ ގައުމުގެ ކެއާޓޭކަރ ފޮރިން މިނިސްޓަރުގެ މަގާމު ވެސް ފުރުއްވާފަ އެވެ.

އޭނާ މިހެން ވިދާޅުވީ، އީރާނާއި އެމެރިކާ އާ ދެމެދު އުފެދިފައިވާ އަސްކަރީ ނުތަނަވަސްކަން ކުޑަކުރުމަށްޓަކައި، ނިއުކްލިއާ އެއްބަސްވުމަކަށް މަގުފަހިވާނެ ފަދަ ހުށަހެޅުންތަކެއް މެދުވެރިކޮށް އެހީތެރިވުމަށް މޮސްކޯ ތައްޔާރަށް އޮތް ކަމަށް ރަޝިޔާގެ އިސް އޮފިޝަލަކު ވިދާޅުވުމާ ގުޅިގެންނެވެ.

ކްރެމްލިންގެ ތަރުޖަމާނު ޑިމިޓްރީ ޕެސްކޯވް ހޯމަ ދުވަހު ވިދާޅުވީ، އީރާނުގެ މުއްސަނދިކޮށްފައިވާ ޔުރޭނިއަމް ޕްރޮސެސްކުރުމުގައި ނުވަތަ ރައްކާކުރުމުގައި އެހީތެރިވުމުގެ ފުރުސަތު ރަޝިޔާ އިން ހުޅުވާލާފައިވާތާ ގިނަ ދުވަސްތަކެއް ވެފައިވާ ކަމަށެވެ.

ރޮއިޓާސް އިން ރިޕޯޓްކޮށްފައިވާ ގޮތުގައި ޕެސްކޯވް ވިދާޅުވީ، މިހާރުވެސް ރަޝިޔާ އިން ދަނީ މިކަމާ ގުޅުންހުރި ހުރިހާ ފަރާތްތަކާއެކު މަސައްކަތް ކުރަމުން ކަމަށާއި، އީރާނާ ގުޅިގެން އުފެދިފައިވާ ނުތަނަވަސްކަން ކުޑަކުރުމަށް ކުރެވެން ހުރި ހުރިހާ މަސައްކަތެއް ކުރުމަށް ތައްޔާރަށް އޮތް ކަމަށެވެ.

އެސް.އެން.އެސް.ސީގެ ވެރިޔާ އަލީ ލަރީޖާނީ ހޮނިހިރު ދުވަހު ވިދާޅުވީ، އީރާނާއި އެމެރިކާއާ ދެމެދު ކުރިއަށްދާ ނިއުކްލިއާ މަޝްވަރާތަކުގެ ފްރޭމްވޯކަށް ކުރިއެރުންތަކެއް ލިބެމުންދާ ކަމަށެވެ.

ލަރީޖާނީ މިހެން ވިދާޅުވީ މޮސްކޯއަށް ކުރެއްވި ދަތުރުފުޅަށްފަހު ދެ ދުވަސް ފަހުންނެވެ. މިއީ އެމެރިކާ އިން ސަރަހައްދީ ކަނޑުގެ ސަރަހައްދަށް މަނަވަރުތަކެއް ފޮނުވައި، އަސްކަރީ ހަމަލާއެއް ދީފާނެ ކަމުގެ އިންޒާރުތައް އާވެފައިވާ ދަނޑިވަޅެއްގައި އީރާނުން މިފަދަ މޭރުމަކުން ވާހަކަދެއްކި ފުރަތަމަ ފަހަރެވެ.

އީރާނުގެ ކަމާބެހޭ ފަރާތްތަކުން ވަނީ އަސްކަރީ ބިރުދެއްކުންތަކުގެ ދަށުން އެމެރިކާ އާ އެކު މަޝްވަރާކުރުމުގެ ފުރުސަތު ނެތްކަމަށް ބުނެފަ އެވެ. އަދި އެ ގައުމަށް ދޭ ކޮންމެ ހަމަލާއަކަށް ވަރުގަދަ ރައްދެއް ދޭނެ ކަމުގެ އިންޒާރުވެސް އީރާނުން ވަނީ ދީފަ އެވެ.