އެމެރިކާ އިން އީރާނަށް ހަމަލާދީފިނަމަ ސަރަހައްދީ ހަނގުރާމައަކަށް ބަދަލުވެގެންދާނެ ކަމަށް އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ ވިދާޅުވެއްޖެ
ޓްރަމްޕް އީރާނަށް އިންޒާރުތައް ދެއްވާއިރު އެމެރިކާއިން މެދުއިރުމަތީގައި ކަނޑުގެ ސިފައިންގެ ބާރު ވަނީ ވަރުގަދަކޮށްފައި. ޚާމަނާއީ ވިދާޅުވީ އީރާނަކީ އިސްވެ ހަމަލާދޭނެ ބައެއް ނޫން ނަމަވެސް ހަމަލާދީ ގޯނާކުރާ ފަރާތަކަށް ވަރުގަދަ ރައްދު ހަމަލާއެއް ދޭނެ ކަމަށް.
އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އާއި، އެ ގައުމުގެ 1979 ވަނަ އަހަރުގެ އިސްލާމީ އިންގިލާބުގެ ބާނީ ރޫހުﷲ ޚުމައިނީގެ ކާފަދަރިކަލުން ހަސަން ޚުމައިނީ، ޚުމައިނީގެ މަގުބަރާ އަށް ޒިޔާރަތްކުރެއްވުން. | ރޮއިޓާސް
ވޮޝިންޓަނާއި ތެހެރާނާ ދެމެދު މަސްރަހު ގޯސްވެފައިވާ ދަނޑިވަޅެއްގައި، އެމެރިކާއިން އީރާނަށް ހަމަލާދީފިނަމަ އެކަން ސަރަހައްދީ ހަނގުރާމައަކަށް ބަދަލުވެގެންދާނެ ކަމަށް އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނާއީ ވިދާޅުވެއްޖެ ކަމަށް އެ ގައުމުގެ ދައުލަތުގެ މީޑިއާއިން އާދީއްތަ ދުވަހު ރިޕޯޓްކޮށްފިއެވެ.
އީރާނުން ނިއުކްލިއާ އެއްބަސްވުމަކަށް ނައިސްފިނަމަ އެ ގައުމަށް އަސްކަރީ ގޮތުން ނުފޫޒު ފޯރުވާނެ ކަމަށް ރައީސް ޑޮނަލްޑް ޓްރަމްޕް ތަކުރާރުކޮށް އިންޒާރު ދެއްވުމަށް ފަހު، އެމެރިކާއިން ވަނީ މެދުއިރުމަތީގައި އެ ގައުމުގެ ކަނޑުގެ ސިފައިންގެ ބާރު ވަރުގަދަކޮށްފައެވެ.
ޚާމަނާއީ ވިދާޅުވީ، ޑޮނަލްޑް ޓްރަމްޕް ގަވާއިދުން މަނަވަރުތައް ފޮނުވާ ވާހަކަ ދައްކަވާ ކަމަށާއި، ނަމަވެސް އެފަދަ ކަންކަމުން އީރާނުގެ ރައްޔިތުން ބިރު ނުގަންނާނެ ކަމަށާއި އެ އިންޒާރުތަކުގެ ސަބަބުން އީރާނުގެ ރައްޔިތުންގެ އަޒުމަކަށް ބަދަލެއް ނާންނާނެ ކަމަށެވެ.
އީރާނަކީ އިސްވެ ހަމަލާދޭނެ ބައެއް ނޫން ކަމަށާއި އެއްވެސް ގައުމަކަށް ހަމަލާދޭން ބޭނުންނުވާ ކަމަށް ޚާމަނާއީ ވިދާޅުވިއެވެ. ނަމަވެސް އީރާނަށް ހަމަލާދީ ގޯނާކުރާ ކޮންމެ ފަރާތަކަށް އެ ގައުމުގެ ރައްޔިތުން ވަރުގަދަ ރައްދު ހަމަލާއެއް ދޭނެ ކަމަށްވެސް އޭނާ ވިދާޅުވިއެވެ.
އީރާނުގެ ދިފާއީ ގާބިލުކަން ކުޑަނުކުރާނެ ފަދަ "އިންސާފުވެރި" މަޝްވަރާތަކަކަށް ތައްޔާރަށް އޮތް ކަމަށް ތެހެރާނުން ބުނަމުންދާއިރު، މި މައްސަލައަށް ހައްލެއް ހޯދުމަށް ޚާރިޖީ ދާއިރާއިން މަޝްވަރާކުރުމުގެ ފުރުސަތު އަދިވެސް އެބައޮތް ކަމަށް ރިޕޯޓުތައް ބުނެ އެވެ.
އެމެރިކާގެ ކަނޑުގެ ސިފައިންގެ ހަ ޑިސްޓްރޯޔަރާއި، އެއް އެއާކްރާފްޓް ކެރިއަރުގެ އިތުރުން އައްސޭރިފަށުގައި ހަރަކާތްތެރިވާ ތިން މަނަވަރު މިހާރުވެސް އެ ސަރަހައްދުގައި އެބައޮތެވެ.
އިގްތިސާދީ ދަތިތަކާ ގުޅިގެން ޑިސެމްބަރު މަހުގެ ފަހުކޮޅު ފެށުނު މުޒާހަރާތައް، 1979 ވަނަ އަހަރު އިސްލާމީ ޖުމްހޫރިއްޔާ ގާއިމުކުރި ފަހުން ކުރިމަތިވި އެންމެ ވަރުގަދަ ސިޔާސީ ގޮންޖެހުމަށް ބަދަލުވެފައިވާއިރު، އީރާނުން މިހާރު ވަނީ މުޒާހަރާތައް މައިތިރިކޮށްފައެވެ.
ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ޚާމަނާއީ ވަނީ އެ މުޒާހަރާތަކަކީ "ބަޣާވާތެއް" ފަދަ ކަމެއްގެ ގޮތުގައި ސިފަކުރައްވާފައެވެ. އަދި އެ "ފިތުނައިގެ" މަގްސަދަކީ ގައުމު ހިންގާ މުއައްސަސާ ތަކަށް ހަމަލާދިނުން ކަމަށްވެސް އޭނާ ވިދާޅުވިއެވެ.
