އީރާނަށް ހަމަލާތައް ދިނުމުގެ އެއްވެސް މައުލޫމާތެއް އެ ސަރަހައްދުގެ އެމެރިކާގެ އެކުވެރިންނާ ހިއްސާ ނުކުރެވޭނެ: ޓްރަމްޕް

އީރާނަށް ހަމަލާތައް ދިނުމުގެ އެއްވެސް މައުލޫމާތެއް އެ ސަރަހައްދުގެ އެމެރިކާގެ އެކުވެރިންނާ ހިއްސާ ނުކުރެވޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެއާއެކު އޭނާ އިތުރަށް ވިދާޅުވީ އީރާން އިން އަންނަނީ އެމެރިކާ އާއެކު ވާހަކަ ދައްކައި މަޝްވަރާ ކުރަމުން ކަމަށާއި، އެކަމުގައި ގޮތެއް ހެދޭތޯ ބައްލަވާނެ ކަމަށެވެ.

އީރާން އަށް އަމާޒުކޮށް ޓްރަމްޕް ގިނަ އިންޒާރު ތަކެއް ދެމުން އަންނައިރު، އޭނާ ގޮވާލައްވާފައި ވަނީ އީރާން އިން އެމެރިކާ އާއެކު މަޝްވަރާކޮށް، އެއްބަސްވުމަކަށް އައުމަށެވެ. 

ފޮކްސް ނިއުސްއާ ވާހަކަ ދައްކަވަމުން ޓްރަމްޕް ވިދާޅުވީ އީރާން އިން މިހާރު މަޝްވަރާ ކުރަމުން އަންނަ ކަމަށެވެ. 

މީގެ އިތުރުން ޓްރަމްޕް ވިދާޅުވީ ސަލާމަތީ ބައެއް ސަބަބުތަކާ ހުރެ، ހަމަލާތައް ދިނުމުގެ އެއްވެސް މައުލޫމާތެއް އެ ސަރަހައްދުގައި ހުރި އެމެރިކާގެ އެކުވެރިންނާ ހިއްސާ ނުކުރެވޭނެ ކަމަށެވެ. 

ޓްރަމްޕް ވިދާޅުވީ އެކުވެރި ޤައުމު ތަކަށް ޕްލޭން ހިއްސާ ނުކުރެވޭނެ ކަމަށާއި، އެެއީ ނޫސްވެރިންނަށް އެ ޕްލޭންގެ މައުލޫމާތު ހިއްސާ ކުރުން ކަހަލަ ކަމަކަށް ވާނެ ކަމަށެވެ. އަދި ބައެއް ޙާލަތްތަކުގައި ނޫސްވެރިންނަށް ޕްލޭންގެ މައުލޫމާތު ދިނުމަށް ވުރެ ވެސް ގޯސް ކަމެއް ކަމަށް ޓްރަމްޕް ވިދާޅުވި އެވެ. އެމެރިކާ އިން ވަނީ، ޔޫއެސްއެސް އަބްރަހަލް ލިންކަން އެއާ ކްރާފްޓް އީރާންއާ ދިމާލަށް ފޮނުވައިފަ އެވެ. 

އާދިއްތަ ދުވަހު ރޮއިޓާސް އިން ރިޕޯޓު ކޮށްފައިވާ ގޮތުގައި، ޓްރަމްޕް ވިދާޅުވެފައި ވަނީ އީރާން އާއެކު ކުރާ މަޝްވަރާ ތަކުން ޤަބޫލު ކުރެވޭ ކަމެއް ހާސިލުވުމަށް އުންމީދު ކުރައްވާ ކަމަށެވެ. އަދި އީރާން އިން އެމެރިކާ އާއެކު ސީރިއަސް ގޮތެއްގައި ވާހަކަ ދައްކަމުން އަންނަ ކަމަށް ވެސް ވަނީ ވިދާޅުވެފަ އެވެ. މިދިޔަ ހަފުތާގެ ތެރޭގައި ޓްރަމްޕް ވިދާޅުވެފައި ވަނީ، އީރާން އިން ޑީލެއް ހަދަން ބޭނުންވާ ކަމަށެވެ.