އީރާން އިން ބުނީ، އެމެރިކާ އާއެކު މަޝްވަރާ ކުރުމަށް ބޭނުންވާ އޮނިގަނޑު ތައްޔާރު ކުރުމުގެ މަސައްކަތް ކުރިއަށްދާ ކަމަށް

އެމެރިކާ އާއެކު މަޝްވަރާ ކުރުމަށް ބޭނުންވާ އޮނިގަނޑު ތައްޔާރު ކުރުމުގެ މަސައްކަތް ކުރިއަށްދާ ކަމަށް، އީރާން އިން ހާމަ ކޮށްފި އެވެ. 

އެކަން ހާމަ ކޮށްފައި ވަނީ އީރާންގެ ސުޕްރީމް ނެޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރިޖާނީ އެވެ. ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި ލަރިޖާނީ ވިދާޅުވީ، ހަގީގަތާ ޚިލާފު މީީޑިއާ ހަނގުރާމައިގެ މާހައުލެއް އުފައްދަމުން އައި ނަމަވެސް، މަޝްވަރާ ތަކަށް ބޭނުންވާ އޮނިގަނޑު ތަރުތީބު ކުރުމުގެ މަސައްކަތް ކުރިއަށްދާ ކަމަށެވެ.

ނަމަވެސް، ލަރިޖާނީގެ ޕޯސްޓުގައި މިކަމާ ގުޅޭ އިތުރު އެހެން ތަފްސީލެއް ހިމަނާފައި ނުވެ އެވެ. އެ ޕޯސްޓުގައި ލަރިޖާނީ ވަނީ "މަޝްވަރާތައް" މި ލަފުޒާ އެކު ހޭޝް ޓެގެއް ހިމަނައިފަ އެވެ. 

އީރާން އާއި އެމެރިކާއާ ދެމެދު އޮތް ގުޅުން މިހާރު ގޯސްވެފައިވާއިރު، ދެ ޤައުމުން ވެސް އަންނަނީ ބަހުގެ ހަމަލާތައް ބަދަލު ކުރަމުންނެވެ. ދެ ޤައުމުގެ ދެ މެދުގައި މަސްރަހު ގޯސްވެފައިވާ ވަގުތެއްގައި، މަޝްވަރާ ކުރުމަށް ދެ ޤައުމުން ވެސް ތައްޔާރު ވަމުން އަންނަކަން ލަރިޖާނީގެ ޕޯސްޓުން ފާހަގަވާ ކަމަށް މާހިރުން ބުނެ އެވެ. 

އީރާންގެ ސިޔާސީ މައިދާނުގައި ލަރިޖާނީ އަކީ ވަރަށް ނުފޫޒު ގަދަ ބޭފުޅަކަށް ވާއިރު، ސަލާމަތީ އިސް އޮފިޝަލެއްގެ ހައިސިއްތުން އޭނާ ކުރެއްވި ޕޯސްޓަކީ ވަރަށް މުހިންމު މެސެޖެއް ކަމަށް ފާހަގަވެފައިވެ އެވެ. އެމެރިކާ އިން ވަނީ މި ފަހުން އީރާން އަށް ދެމުން އަންނަ އިންޒާރުތައް އިތުރު ކޮށްފަ އެވެ. 

ލަރިޖާނީގެ އެ ޕޯސްޓުގައި ފާހަގަ ކޮށްފައި ވަނީ އެކަމާ ގުޅޭ ގޮތުން މީޑިއާ ތަކުން ދައްކަމުން އަންނަ ވާހަކަ ތަކަކީ ހަގީގަތާ ޚިލާފު ވާހަކަ ތަކެއް ކަމަށެވެ. އޭގެ ބަަދަލުގައި އަސްލު މަސައްކަތް ކުރިއަށްދާ ކަމަށާއި، އެމެރިކާ އާއި އީރާންއާ ދެމެދު ވާހަކަ ދައްކައި މަޝްވަރާ ކުރުމުގެ މަގު ހުޅުވިފައިވާ ކަމުގެ އިޝާރާތެއް ކަމަށް ވެސް ބައިނަލްއަޤުވާމީ ތަޖުރިބާކާރުން ބުނެ އެވެ.