ރާއްޖޭގެ ކްރެޑިޓް ރޭޓިންގ މިއަދު އޮތީ ގޮނޑުގަ: ޣަފޫރު
ރާއްޖޭގެ އިގްތިސާދީ ހާލަތު ގޯސްވެ، ކްރެޑިޓް ރޭޓިން ދަށްވުމުގެ ސަބަބުން މި ސަރުކާރަށް ތަރައްގީ ނުގެނެވޭނެ ކަމަށް އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާ ވިދާޅުވި. އެމްޑީޕީގެ ޖަލްސާގައި ވާހަކަދައްކަވަމުން އޭނާ ވިދާޅުވީ، ކޮވިޑުގެ ދަތި ހާލަތުގައި ވެސް ރައްޔިތުންނަށް މިވަރުގެ ތަކުލީފެއް ޖައްސާފައި ނުވާނެ ކަމަށާއި، ސަރުކާރުން މަސައްކަތް ކުރަނީ ފައިސާ ޗާޕުކޮށްގެން ރައްޔިތުންނަށް އޮޅުވާލުމަށް ކަމަށް. ރާއްޖޭގެ ރޭޓިން 'ސީސީ' އަށް ދަށްވެފައިވާއިރު، ދަރަނި ނުދެއްކި ޑިފޯލްޓްވުމުގެ ބިރު ބޮޑުކަމަށް ފިޗް ރޭޓިންގްސް އިން ވެސް ވަނީ ހާމަކޮށްފަ.
އެމްޑީޕީ ގެ ވަގުތީ ޗެއާޕަރސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ | އެމްޑީޕީ ސެކްރިޓޭރިއެޓް
ގައުމުގެ އިގްތިސާދީ ހާލަތު އޮތީ އިންތިހާއަށް ދަށުގައި ކަމަށާ މިވަރުން ރައީސް ޑރ. މުހައްމަދު މުއިއްޒުގެ ސަރުކާރަށް މި ގައުމަށް ގެނެވޭނެ ތަރައްގީ އެއް ނޯންނާނެ ކަމަށް އެމްޑީޕީގެ ވަގުތީ ޗެއަރޕާސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.
އެމްޑީޕީ އިން ހޯމަ ދުވަހުގެ ރޭ މާލޭގައި ބޭއްވި ހަރުގެ ޖަލްސާގައި ވާހަކަދައްކަވަމުން ޣަފޫރު ވިދާޅުވީ އެމްޑީޕީ ސަރުކާރު ވެރިކަމުގައި އޮތް އިރު މުޅި ދުނިޔެއަށް އަށް ވެސް ކުރިމަތިވެފައިވީ ވަރަށް ދަތި ހާލެއް ކަމަށެވެ. އެގޮތުން ކޮވިޑް-19 ގެ ހާލަތާ އެކު މުޅި ދުނިޔޭގެ އިގްތިސާދު ހީނަރުވެގެން ދިއަ ކަމަށާ ދިމާވި ހުރިހާ ކަމަކާ އެކުވެސް އެ ދުވަހު ވެސް ރައްޔިތުން ތިބީ އުފަލާ އަރާމުގައި ކަމަށް ޣަފޫރު ވިދާޅުވި އެވެ.
ނަމަވެސް މިއަދުގެ ހާލަތަށް ބަލާއިރު ފެންނަނީ ރައްޔިތުން ބޮޑު ތަކުލީފެއްގައި އުޅޭ މަންޒަރު ކަމަށް ޣަފޫރު ވިދާޅުވި އެވެ. އަދި ވިދާޅުވީ ރާއްޖޭގެ އިގްތިސާދު އޮތީ ނުހަނު ބޮޑު ކާރިސާއެއްގައި ކަމަށާ ކްރެޑިޓް ރޭޓިންގް ވެސް އޮތީ ގޮނޑުގައި ކަމަށެވެ. ޣަފޫރު ވިދާޅުވީ މިވަރުން ދެން މި ސަރުކާރަށް މި ގައުމަށް ގެނެސްދެވޭނެ ތަރައްގީ އެއް ނެތް ކަމަށެވެ.
އަޅުގަނޑުމެންގެ ވެރިކަމެއްގައި 3 އަހަރު ދުވަހު ކޮވިޑް ގެ ހާލަތުގައި ވަރަށް ދަތި ހާލުގައި އުޅެމުންވެސް ރައްޔިތުންނަށް މިވަރު ތަކުލީފެއް ނުޖައްސަން. މިއަދު ރާއްޖޭގެ ކްރެޑިޓް ރޭޓިންގް އޮތީ ގޮނޑުގަ. ގޮނޑުގަ. ދެން ކޮން ކުރިއެރުމަކާ ތަރައްގީއެއް ތޯ ތި ހޯދަދެވުނީ. ނޫން. ނު ހޯދަ ދެވޭނެ. ނުވެސް ވާނެ. ފައިސާ ޗާޕު ކޮށްގެން އަނެއްކާ ވެސް ރައްޔިތުން މުނާފިގު ކޮށްގެން ވަކިކަމަކަށް ތި ތައްޔާރު ވަނީ. ތިކަމަކަށް ރައްޔިތުން ފުރުސަތު ދީގެން ނުވާނެ. މި އިންތިހާބު ބޮޑުކޮށް މި ސަރުކާރު ބަލިކުރަން އެބަޖެހޭ.އެމްޑީޕީގެ ވަގުތީ ޗެއަރޕާސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
ޣަފޫރު ވިދާޅުވީ ގައުމުގެ ހާލަތަށް ބެލުމެއް ނެތި މި ސަރުކާރުން އަދިވެސް އުޅެނީ ރައްޔިތުންނަށް އޮޅުވާލަން ކަމަށެވެ. މިއީ ހީލަތްތެރި ސަރުކާރެއް ކަމަށާ ހަމައެކަނި ކުރާހާ ވެސް ކަމަކީ ދޮގު ހެދުން ކަމަށް ޣަފޫރު ވިދާޅުވި އެވެ.
މިއަދު މި ސަރުކާރުން ރައްޔިތުންނަށް އޮޅުވާލައިގެން އެކި ނަންނަމުގައި ކުރަން އުޅޭ ކަމަކީ ފައިސާ ޗާޕު ކުރުން ކަމަށާ ފައިސާ ޗާޕު ކޮށްގެން ވައްކަން ކުރަން އުޅޭ ކަމަށް ވެސް ޣަފޫރު ވިދާޅުވި އެވެ. އެހެންކަމުން މިކަމަށް ރައްޔިތުން ވިސްނާ، ޕީއެންސީ އަށް މި ފުރުސަތު ދީގެން ނުވާނެ ކަމަށް ވެސް ޣަފޫރު ވިދާޅުވި އެވެ.
ރާއްޖޭގެ އިގްތިސާދީ ހާލަތާ ގުޅިގެން ގިނަ ބަޔަކު ކަންބޮޑުވުން ފާޅުކުރަމުންދާއިރު ރާއްޖެ ދަރަނިވެރިވުމުގެ ފުުރުސަތު ބޮޑު ކަމަށް ރޭޓިން އޭޖެންސީ ފިޗުން ބުނެ ޖަންކް ދަރަޖައިގައި ރާއްޖޭގެ ކްރެޑިޓް ރޭޓިން ރިޕޯޓު ގައި މިފަހުން ވަނީ ކަނޑައަޅާފަ އެވެ.
އެ އޭޖެންސީން ރާއްޖޭގެ ކްރެޑިޓް ރޭޓިން އަކީ 'ސީސީ' ކަމަށް ކަނޑައަޅާފައިވާ އިރު، ބުނެފައިވަނީ ރޭޓިންގ އިން ދައްކާ ގޮތުގައި، ބޭރުގެ ފަރާތްތަކުން ކުރިމަތިވާ މާލީ ގޮންޖެހުންތަކާއި، ދައުލަތުގެ މާލީ ނާޒުކުކަން ބޮޑުވުމުގެ ސަބަބުން، މި ރޭޓިންގ ގެ މުއްދަތުގެ ތެރޭގައި ވެސް ރާއްޖެ ޑިފޯލްޓް ވުމުގެ ފުރުސަތު ބޮޑު ކަމަށެވެ.
