އެޕްސްޓީން ފައިލްސް ގައި ކުރީގެ ރައީސް ޑރ. ވަހީދު ގެ ނަން މަދުވެގެން 240 ފަހަރު، ވަހީދު އާއި އެޕްސްޓީން އަކީ ވަރަށް ގާތް ދެ މީހުން، ވަހީދުގެ އިންތިޚާބުގައި އެޕްސްޓީންގެ އެހީތެރިކަން!
އެމެރިކާގެ ޖަސްޓިސް ޑިޕާޓްމަންޓުން ޖިންސީ ކުށްވެރިޔާ ޖެފްރީ އެޕްސްޓީން އާ ގުޅުންހުރި މިލިއަން އާ ފައިލްތައް އާންމުކޮށްފައިވާއިރު، ހާމަކޮށްފައިވާ އީމެއިލް ތަކުން ހާމަވާ ގޮތުގައި އެޕްސްޓީން އާއި ޑރ. ވަހީދު އާ ދެމެދު ވަރަށް ގާތް ގުޅުމެއް އޮތް ކަމަށާއި، ވަހީދުގެ ދަރިކަލުން ޖެފްރީ ސާލިމް ވެސް އެޕްސްޓީން އަށް ތައާރުފް ކޮށްދެއްވާފައިވާކަން ފާހަގަކުރެވޭ.
ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު، ރައީސުލްޖުމްހޫރިއްޔާގެ ޚާއްޞަ މަންދޫބުގެ މަޤާމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އައްޔަންކުރައްވާފައި. | ރައީސް އޮފީސް
އެމެރިކާގެ ޖަސްޓިސް ޑިޕާޓްމަންޓުން، ޖިންސީ ކުށްވެރިޔާ ޖެފްރީ އެޕްސްޓީން އާ ގުޅުންހުރި އެތައް މިލިއަން އާ ފައިލްތަކެއް އާންމުކުރި އިރު އޭގެ އެތައް ތަނެއް ގައި ރާއްޖޭގެ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ނަން އައިސްފައިވާކަން ފާހަގަ ކުރެވިއްޖެ އެވެ.
މިއީ މިދިޔަ އަހަރު ފާސްކުރި ގާނޫނެއްގެ ދަށުން، އެމެރިކާ ސަރުކާރުން މިހާތަނަށް އާންމުކުރި އެޕްސްޓީން އާ ގުޅޭ އެންމެ ގިނަ އަދަދެއްގެ ލިޔެކިޔުންތަކެވެ.
މިދިޔަ ހުކުރު ދުވަހު އާންމުކުރި މި މައުލޫމާތުތަކުގެ ތެރޭގައި ތިން މިލިއަން ސަފުހާގެ ލިޔެކިޔުމާއި، 180،000 ފޮޓޯ އަދި 2،000 ވީޑިއޯ ހިމެނެ އެވެ. މި ތަކެތި އާންމުކޮށްފައި ވަނީ، އެޕްސްޓީން އާ ގުޅުންހުރި ހުރިހާ ލިޔެކިޔުންތަކެއް ހާމަކުރުމަށް އެމެރިކާގެ ރައީސް ޑޮނަލްޑް ޓްރަމްޕް ސޮއިކުރެއްވި ގާނޫނުގައި ބަޔާންކޮށްފައިވާ ސުންގަޑި ހަމަވިތާ ހަ ހަފުތާ ފަހުންނެވެ.
އެމެރިކާ ސަރުކާރުން ހާމަ ކުރި ލިޔުންތަކަށް ބަލާއިރު ރައީސް ޑރ. މުއިއްޒުގެ ޚާއްޞަ މަންދޫބުގެ މަޤާމު ދެއްވާފައިވާ، ކުރީގެ ރައީސް ޑރ. ވަހީދު އާ އެޕްސްޓީން އާ ވަރަށް ގާތް ގުޅުމެއް އޮތް ކަން ހާމަވާ އެތައް އީމެއިލް އެއް ދެފަރާތުގެ ދެމެދުގައި ބަދަލުކޮށްފައިވެ އެވެ.
އެޕްސްޓީން އާ ޑރ. ވަހީދު އާ ދެމެދު އުފެދިފައިވާ ގާތް ކަމުގެ ތެރެއިން ވަހީދުގެ ދަރިކަލުން ޖެފްރީ ސާލިމް ވެސް އެޕްސްޓީން އަށް ތައާރުފް ކޮށްދެއްވާ މުއާމަލާތްތައް ތިން ފަރާތުގެ މެދުގައި ހިނގާފައިވާ ކަން ވެސް ފާހަގަ ކުރެވެ އެވެ.
ޑރ. ވަހީދު އެޕްސްޓީން އަށް ފޮނުއްވާފައިވާ މެއިލް ތަކަކީ މީހަކު މެދުވެރި ކުރުމެއް ނެތި ވެރިކަމުގައި ހުންނަވައިގެން އަމިއްލަ އަށް ފޮނުއްވާފައިވާ މެއިލްތަކެއްކަން ފާހަގަ ކުރެވެ އެވެ.
ވަހީދު ވެރިކަމަށް ވަޑައިގަތީ ބަޣާވަތެއްގެ ތެރެއިން ކަމަށް ކުރެވިފައި އޮތް ތުހުމަތާ އެކު އެކަން އެނޫން ގޮތަކަށް ދެއްކުމަށް ވަހީދުގެ ސަރުކާރުން އެކުލަވާލި މަޝްހޫރު ކޯނީ ރިޕޯޓު ވެސް އެޕްސްޓީން އަށް ފޮނުވިކަން އެއް މެއިލުން ހާމަވެ އެވެ. އަދި އެ ރިޕޯޓު ފޮނުވުމުން އެޕްސްޓީންގެ ރަހުމަތްތެރިއަކަށް އެ ރިޕޯޓު ދިރާސާ ކުރުމަށް ފޮނުވި އެވެ.
"ތިޔަ ފޮނުވި ކޯނީ ރިޕޯޓް ބަލައި ދިރާސާކޮށް މިހާރު ވަނީ ނިންމާލެވިފަ އެވެ. މީގެ އިތުރުން ބޮސްޓަންގައި ހުރެގެން، ދިވެހިރާއްޖޭގެ މިހާރުގެ ޙާލަތާ ގުޅޭގޮތުން ކުރަންޖެހޭ ބައެއް އިތުރު ދިރާސާތައްވެސް އަހަރެން ވަނީ ކޮށްފައެވެ." އެޕްސްޓީން އަށް މެގީ ކިޔާ ފަރާތަކުން ފޮނުވި މެއިލެއް ގައިވެ އެވެ.
"ސާފުކޮށް އެނގެން އޮތް ކަމަކީ، ތިބާގެ ރަޙުމަތްތެރިޔާ، ރައީސް ވަޙީދު މިހާރު ރިޔާސީ އިންތިޚާބަށް ކުރިމަތިލައްވައިގެން މި އުޅުއްވަނީ ސިޔާސީ ގޮތުންނާއި އެހެނިހެން ގޮތްގޮތުން ވެސް ނުހަނު ނާޒުކު އަދި އޮޅުންބޮޅުން ބޮޑު ދަނޑިވަޅެއްގައި ކަމެވެ. ހަރުކަށި އިސްލާމީ ފިކުރު ފެތުރެމުންދާ ކަމަށް ބުނެ އުފެދިފައިވާ ކަންބޮޑުވުންތަކާއި، ރާއްޖޭގެ ޑިމޮކްރަސީގެ ދަތުރު ކުރިއަށްދާނެ ގޮތަކާމެދު އުފެދިފައިވާ ސުވާލުތައް މީގެ ތެރޭގައި ހިމެނެއެވެ،" މެގީ އެޕްސްޓީން އަށް ލިޔެފައިވެ އެވެ.
މެގީ ގެ މެއިލް ގައި ރިޔާސީ އިންތިޚާބުގެ ކެމްޕޭން ގައި ރައީސް ވަހީދަށް އެހީތެރިކަން ދިނުމަށް ހުރީ ތައްޔާރަށް ކަމަށް ބުނެފައިވެ އެވެ.
"ކެމްޕޭނާ ގުޅޭގޮތުން އަހަންނަށް ފެންނަ ފުރަތަމަ ޚިޔާލުތައް އިތުރަށް ޙިއްޞާކޮށް، މަޝްވަރާކުރުމަށް އަހަރެން މިހުރީ އުފަލުންނެވެ." އޭނާ ބުނެފައިވެ އެވެ.
މިއީ، ޖޭމްސް ޕީ. މެގީ އަށް އެޕްސްޓީން ފޮނުވި އީމެއިލަކަށް އޭނާ ދީފައިވާ ޖަވާބު ކަމަށްވާއިރު، ޑރ. ވަހީދާ ބެހޭ ގޮތުން އެޕްސްޓީން ފޮނުވި މެއިލް ގައި ވަހީދަކީ އޭނާގެ "ގާތް އެކުވެރިއެއް" ކަމަށް ލިޔެފައިވެ އެވެ.
އެ މެއިލް ގައި ވަހީދު ކުރިއަށް އޮތް އަހަރު ރިޔާސީ އިންތިޚާބުގައި ވާދަ ކުރާ ކަމަށާއި އެކަމަށް ވަހީދަށް އެހީތެރިކަން ބޭނުންވާ ކަމަށް ލިޔެފައިވެ އެވެ.
އެމެރިކާގެ ޖަސްޓިސް ޑިޕާޓްމަންޓުން ހާމަ ކޮށްފައިވާ ލިޔުން ތަކުގެ ތެރޭގައި އެޕްސްޓީން އާއި ވަހީދު އަދި ވަހީދު ގެ ދަރިކަލުން ޖެފްރީ ބައްދަލު ކޮށްފައިވާ ކަން ވެސް ހާމަވެ އެވެ.
އޭޕްރީލް 22، 2014 ގައި އެޕްސްޓީންގެ ފަރާތުން ޑރ. ވަހީދަށް ފޮނުވާފައިވަ އީމެއިލެއް ގައި "މެއި މަހުގެ 19 ވާ ހޯމަ ދުވަހުގެ ރޭގަނޑު 7:00 ގައި ޖެފްރީގެ ގޭގައި އޮންނަ ރޭގަނޑުގެ ކެއުމަކަށް ވަހީދާއި ދަރިފުޅު ޖެފް އަށް ވަޑައިގެންނެވިދާނެތޯ،" އަހާފައިވެ އެވެ.
އެ މެއިލް އަށް ޖާވާބު ދެއްވަމުން ޑރ. ވަހީދު ޙަސަން ލިޔުއްވާފައިވަނީ ދާނެ ކަމަށާއި، "ކުއްލި ބަދަލެއް އަތުވެއްޖެނަމަ، އަޅުގަނޑު އެކަން އަންގާލާނަން،" ކަމަށެވެ.
