މި ސަރުކާރުން ރައްޔިތުންގެ ފައިސާ އިސްރާފު ކުރުން ހުއްޓާލައި، މާލީ ދާއިރާގެ ތަޖުރިބާކާރުންގެ އިރުޝާދުތަކަށް ތަބާވާން ޖެހޭ: ކުރީގެ ނައިބު ރައީސް ފައިސަލް

ރައީސް ޑރ.މުހައްމަދު މުއިއްޒުގެ ސަރުކާރުން ރައްޔިތުންގެ ފައިސާ އިސްރާފު ކުރުން ހުއްޓާލައި، މާލީ ދާއިރާގެ ތަޖުރިބާކާރުންގެ ލަފަޔާއި އިރުޝާދުތަކަށް ތަބާވުމަށް ކުރީގެ ނައިބު ރައީސް ފައިސަލް ނަސީމް ގޮވާލައްވައިފި އެވެ. 

ރާއްޖޭގެ އިގްތިސާދާ މެދު ކަންބޮޑުވުންފާޅު ކުރައްވައި ހޯމަ ދުވަހު އެކްސްގައި ފައިސަލް ވިދާޅުވީ ރާއްޖޭގެ އިގްތިސާދު ރަނގަޅު ކުރުމަށާއި ދަރަނި މެނޭޖު ކުރުމަށް މާލީ އިދާރާތަކުންނާއި މާލީ ދާއިރާގެ ތަޖުރިބާކާރުން ދޭ ލަފަޔާ މަޝްވަރާއަށް ސަރުކާރުން އަމަލު ނުކުރާ ކަމަށެވެ. ނަތީޖާއެއް ގޮތުން ރާއްޖޭގެ މާލީ ހާލަތު ގޯސްވެ ޒިންމާދާރު މަގާމުތަކުގައި ތިއްބެވި ބޭފުޅުން އިސްތިއުފާ ދެއްވައި ގެއަށް ވަޑައިގެންނެވުން ނޫންގޮތެއް ނެތި އެގޮތަށް އަމަލު ކުރެއްވުމަށް މަޖުބޫރުވުން ކަމަށް އެމަނިކުފާނު ވިދާޅުވި އެވެ. 

ފައިސަލް މިހެން ވިދާޅުވިއިރު، 1 ފެބްރުއަރީ 2026 ގައި މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑުގެ ޗެއާޕާސަންގެ މަގާމުން، ކުރިން ފިނޭންސް މިނިސްޓަރުކަން ވެސް ކުރެއްވި ޑރ. އަހުމަދު އިނާޒް ވަނީ  2.4 ބިލިއަން ރުފިޔާގެ ބޮންޑެއް މެދުވެރިކޮށް ސަރުކާރުން ފައިސާ ޗާޕު ކުރާ މައްސަލައިގައި އިސްތިއުފާ ދެއްވާފަ އެވެ. 

މީގެ އިތުރުން ފައިސަލް ވަނީ އިގްތިސާދީ ގޮތުން ރައްޔިތުންނަށް ދަތިވަމުންދާތީ އެކަން ވެސް ފާހަގަ ކުރައްވާފަ އެވެ. 

ފައިސަލް ވިދާޅުވީ ޑޮލަރުގެ އަގު މައްޗަށް ދިޔުމާއި، އިންފްލޭޝަން މަތިވުމާއި، ކުދި އަދި މެދުފަންތީގެ ވިޔަފާރިތައް ބަނގުރޫޓުވެ، ބޮޑެތި ވިޔަފާރި ތަކަށްވެސް ގޮތްހުސްވާ ހިސާބަށް ދިޔުމަކީ އާއްމު ރައްޔިތުންގެ ދިރިއުޅުން ބިކަވެ ނިކަމެތިވަމުންދާ ސަބަބު ކަމަށެވެ. 

ބަނަ ބޯވިލާގަނޑެއް ބޯމަތިވަމުން އަންނަ މަންޒަރު ފެންނަމުންދާކަން ފާހަގަކުރައްވައި ފައިސަލް ވިދާޅުވީ، ސަރުކާރުން ރައްޔިތުންގެ ފައިސާ އިސްރާފު ކުރުން ހުއްޓާލައި، އުފެއްދުންތެރިކަން އިތުރު ކުރުމަށް އާއްމު ރައްޔިތުންނާއި ވިޔަފާރިތަކަށް އެހީތެރިކަންދީ، މާލީ ދާއިރާގެ ތަޖުރިބާކާރުންގެ ލަފަޔާއި އިރުޝާދުތަކަށް ތަބާވާންޖެހޭ ކަމަށެވެ. 

މާލީ ދާއިރާއަށް ދިމާވަމުންދާ ގޮންޖެހުންތަކުން އަރައި ގަތުމަށް ސަރުކާރުން އަވަސް ފިޔަވަޅުތަކަށް ނާޅައިފިނަމަ، މިއަދު ދުނިޔެއަށް ކުރިމަރިމަތިވަމުންދާ ހަލަބޮލި ކަމުގެ ތެރެެއިން، ރާއްޖޭގެ އިގްތިސާދު ނުރައްކާތެތި ހިސާބަށް ދިއުމަކީ ވަރަށް ގާތްކަމެއް ކަމަށް އެމަނިކުފާނު ވިދާޅުވި އެވެ. އަދި މިކަމުން އަރައިގަތުމަށް ސަރުކާރުން ވީހާވެސް އަވަހަށް މަސައްކަތް ކުރުމަށް ފައިސަލް ވަނީ ގޮވާލައްވާފަ އެވެ.