ނައިބު ރައީސް ވަޑައިގެން ތިމާވެށީގެ ގާނޫނާ ޚިލާފަށް ފިޔޯރީގައި މަސް ބަންދު ކާރު ޚާނާ އަޅަން ބިން ހިއްކަން ފަށައިފި
ގދ. ފިޔޯރީގައި 6.5 ހެކްޓަރުގެ ބިން ހިއްކައިގެން މަސް ބަންދުކުރާ ކާރުޚާނާއެއް އެޅުމުގެ މަޝްރޫއު ސަރުކާރުން ފަށާފައިވަނީ ތިމާވެއްޓަށް އަސަރުފޯރާނެ މިންވަރު ބަޔާންކުރާ (އީ.އައި.އޭ) ރިޕޯޓެއް ހެދުމެއް ނެތި ގާނޫނާ ހިލާފަށް. ތިމާވެށީގެ ގާނޫނަށް އެއްވެސް ބެލުމެއްނެތި މިފަދަ މަޝްރޫއުތައް ހިންގަމުންދާތީ އާންމުންގެ ކަންބޮޑުވުން ވަނީ އިތުރުވެފައި.
ގދ. ފިޔޯރީގައި ޤާއިމުކުރާ ދަޅުގައި މަސް ބަންދުކުރާ ކާރުޚާނާއަށް ބޭނުންވާ ބިން ހިއްކުމާއި ބަނދަރު ހެދުމުގެ މަޝްރޫޢުގެ ޢަމަލީ މަސައްކަތް ރައީސުލްޖުމުހޫރިއްޔާގެ ނައިބު އިފްތިތާޙުކޮށް ދެއްވަނީ - ފެބްރުއަރީ 2، 2026. | ރައީސް އޮފީސް
ރާއްޖޭގެ ތިމާވެށި ރައްކައުތެރިކޮށް ދެމެހެއްޓުމުގެ ގާނޫނާ ޚިލާފަށް ގދ. ފިޔޯރީގައި ގާއިމުކުރާ ދަޅުގައި މަސް ބަންދުކުރާ ކާރުޚާނާގެ ބިން ހިއްކުމާއި ބަނދަރު ހެދުމުގެ ޢަމަލީ މަސައްކަތް ރައީސުލްޖުމްހޫރިއްޔާގެ ނައިބް އަލްއުސްތާޛް ހުސައިން މުޙައްމަދު ލަޠީފް ފަށްޓަވައިދެއްވައިފި އެވެ.
ތިމާވެށީގެ ގާނޫނަށް އެއްވެސް ބެލުމެއް ނެތި ރައީސް މުއިއްޒުގެ ސަރުކާރުން ތަރައްގީގެ ނަމުގައި ތިމާވެއްޓަށް ބޮޑެތި ގެއްލުންތައް ލިބޭ ގޮތަށް ބިން ހިއްކުމާއި ވެލި ނެގުމުގެ މަޝްރޫއުތައް ރާއްޖޭގެ އެތައް މިތާނގައި ކުރިއަށް ގެންދާ ދަނޑިވަޅުގައި، ގދ. ފިޔޯރީ ބިންހިއްކުމާއި ބަނދަރު ހެދުމުގެ މަސައްކަތް ފެށީ ހޯމަ ދުވަހު ފިޔޯރީގައި ބޭއްވި ރަސްމިއްޔާތެއްގަ އެވެ.
ފިޔޯރީގައި ބޭއްވި ރަސްމިއްޔާތުގައި ފިޝަރީޒް މިނިސްޓަރު އަޙްމަދު ޝިޔާމްއާއި ހައުސިންގ މިނިސްޓަރު ޑރ. ޢަބްދުﷲ މުއްޠަލިބުގެ އިތުރުން ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ބައިވެރިވެފައިވެ އެވެ.
ސަރުކާރުގެ މީޑިއާ - ޕީއެސްއެމް ނިއުސް އިން ވަގުތުން ދެއްކި މި ރަސްމިއްޔާތުގައި ލޮރީ އާއި ހައިމާކު ބޭނުން ކޮށްގެން ގޮނޑުދޮށާއި މޫދަށް ވެލިއަޅާފައިވެ އެވެ. ސަރުކާރުން ހާމަ ކޮށްފައިވާ ގޮތުގައި ފިޔޯރީގައި 6.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި މަސައްކަތް ހަވާލުކޮށްފައިވަނީ ސޭން ޕްރައިވެޓު ލިމިޓް ކިޔާ ކުންފުންޏަކާ އެކެވެ.
މި މަޝްރޫޢުގެ އަމަލީ މަސައްކަތް ފެށިއިރު ދިވެހިރާއްޖޭގެ ތިމާވެށި ހިމާޔަތްކޮށް ދެމެހެއްޓުމާ ބެހޭ ގާނޫނުގެ ދަށުން ހަދަން ޖެހޭ އެންވަޔަރަންމަންޓަލް އިމްޕެކްޓް އެސެސްމަންޓް (އީއައިއޭ) ހަދާފައެއް ނުވެ އެވެ. އަދި އެފަދަ ރިޕޯޓެއް އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރުއޭ) ގެ ވެބްސައިޓްގައި ނެތްކަން ވެސް ވަނީ ކަށަވަރު ކުރެވިފަ އެވެ.
ސަރުކާރުން މަޝްރޫއު ފެށިކަމަށް ބުނެފައިވާ އިރު، ދިވެހިރާއްޖޭގެ ތިމާވެށި ރައްކައުތެރިކޮށް ދެމެހެއްޓުމާ ބެހޭ ގާނޫނުގައި ބުނެފައި ވަނީ ރާއްޖޭގެ ތިމާވެއްޓަށް ފާހަގަ ކުރެވޭ ފަދަ ބަދަލެއް އަތުވެދާނެ އެއްވެސް ޕްރޮޖެކްޓެއް ހިންގުމުގެ ކުރިން އެކަމުން ތިމާވެއްޓަށް އަސަރު ފޯރާނެ މިންވަރު ބަޔާން ކުރާ ރިޕޯޓެއް ހަދާ ހުށަހަޅަން ވާނެ ކަމަށެވެ.
"ހުވަދުއަތޮޅު ދެކުނުބުރީ ފިޔޯރީގައި ގާއިމުކުރުމަށް ހަމަޖެހިފައިވާ، ދަޅުގައި މަސް ބަންދުކުރާ ކާރުޚާނާގެ ބިން ހިއްކުމާއި ބަނދަރު ހެދުމުގެ ޢަމަލީ މަސައްކަތް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް މިއަދު އިފްތިތާހުކޮށް ދެއްވައިފި،" ކަމަށް ބުނެ ރައީސް އޮފީހުން ހާމަ ކޮށްފައިވާ ޚަބަރުގައި ބުނެފައި ވަނީ، މި މަޝްރޫޢުގެ ދަށުން ކުރިން 1500 މެޓްރިކް ޓަނުގެ ކޯލްޑް ސްޓޯރޭޖްގެ ބަދަލުގައި 3000 މެޓްރިކް ޓަނުގެ ކޯލްޑް ސްޓޯރޭޖެއް ޤާއިމްކުރުމަށް ހަމަޖެހިފައިވާ ކަމަށެވެ. މީގެ އިތުރުން ދުވާލަކު 100 ޓަނުގެދަޅުގައި މަސް ބަންދުކުކުރެވޭ ކާރުޚާނާއަކާއި ދުވާލަކު 100 ޓަނުގެ މަސްކުނޑި އުފެއްދޭނެ ފިޝްމީލް ޕްލާންޓެއް ވެސް މި މަޝްރޫޢުގެ ދަށުން ޤާއިމްކުރުމަށް ހަމަޖެހިފައިވާ ކަމަށެވެ.
ފިޝަރީޒް މިނިސްޓްރީން ބުނެފައިވަނީ މި މަޝްރޫޢުގެ ފުރަތަމަ ފިޔަވަހީގައި ހިމެނޭ ބިން ހިއްކުމާއި ބަނދަރު ތަރައްޤީކުރުމުގެ މަސައްކަތް 420 ދުވަހުގެ ތެރޭގައި ނިންމާލުމަށް ހަމަޖެހިފައިވާކަމަށެވެ.
