ފިޔޯރީ ސްކޫލުގައި ރޯވި އަލިފާންގަނޑު ނިއްވާލައިފި
އަލިފާންގަނޑު ނިއްވާލާފައިވަނީ ފުލުހުންނާއި، ކައުންސިލް އަދި އާންމުން ގުޅިގެން
އަލިފާން ރޯވި އިމާރާތުގެ ފުރާޅާއި ފާރުތައް ވެއްޓިފައި
ގދ. ފިޔޯރީ ސްކޫލުގެ ހޯލުގައި ރޯވި އަލިފާންގަނޑު ނިއްވާލައިފިއެވެ.
މިއަދު ހަވީރު 5:20 އެހާއިރު ހިނގި މި އަލިފާނުގެ ހާދިސާގައި ރޯވެފައިވަނީ އެ ސްކޫލުގެ ހޯލު ހުންނަ އިމާރާތުގައެވެ. އަލިފާނުގެ ހާދިސާ ހިނގި ވަގުތުން ފެށިގެން ފުލުހުންނާއި، ކައުންސިލް އަދި އާންމުން ވަނީ އަލިފާން ނިއްވުމުގެ މަސައްކަތް ފަށާފައެވެ. އަދި ހާދިސާ ހިނގުމާއެކު ގދ. ތިނަދޫ ފަޔަރ ސްޓޭޝަނުން އެރަށަށް ދިއުމަށް ވަނީ ދަތުރު ފަށާފައެވެ.
އެމްއެންޑީއެފަށް އެ ރަށަށް ދެވުނީ މިރޭ 18:54 އެހާއިރުއެވެ. އެމްއެންޑީއެފަށް އެރަށަށް ދެވުނުއިރު، ފުލުހުންނާއި، ކައުންސިލާއި، އާންމުން ގުޅިގެން ވަނީ އަލިފާންގަނޑު ކޮންޓްރޯލްކޮށްފައެވެ.
އެމްއެންޑީއެފުން ހިއްސާކޮށްފައިވާ ފޮޓޯތަކުން ފެންނަގޮތުގައި އެ އިމާރާތުގެ ފުރާޅުވެސް ވަނީ އެއްކޮށް ވެއްޓިފައެވެ. އެ އިމާރާތުގައި ކިޔަވައިދިނުމަށް 5 ކްލާސްރޫމް ހަދާފައިވާއިރު އެ ކްލާސްރޫމްތަކަކީ ޕާޓިޝަން ޖަހައިގެން ހަދާފައިވާ ކްލާސްރޫމްތަކެއް ކަމަށް އެމްއެންޑީއެފުން ބުނެފައިވެއެވެ.
އެމްއެންޑީއެފުން ބުނީ މި ކުލާސްރޫމުތައް ވަނީ ބޭނުން ނުކުރެވޭ ވަރަށް އަނދާފައި ކަމަށެވެ. އިމާރާތުގެ ފާރުން ބަޔަކާއި ފުރާޅުން ބައެއް ވެއްޓި އިމާރާތް ހުރީ ބަންދުވެފައި ކަމަށް އެމްއެންޑީއެފުން ބުނެއެވެ.
އަލިފާން ރޯވާން މެދުވެރިވި ސަބަބު އަދި ދެނެގަނެވިފަ ނުވާކަމަށް އެމްއެންޑީއެފުން ބުނެއެވެ. އެ ސްކޫލުން ބުނެފައިވަނީ އަލިފާން ރޯވެފައިވަނީ އެތަނުގައި ހުރި ކަރަންޓު ޑިސްޓްރިބިޔުޝަން ބޯޑެއްގައި ކަމަށެވެ.
