ޕީއެންސީގެ ފުލް މެޖޯރިޓީ އޮތް މާލެ ސިޓީ ކައުންސިލްގެ ޖަލްސާ މިއަދުވެސް ކޯރަމް ހަމަ ނުވެގެން ނުބޭއްވުނު
މާލޭ ސިޓީ ކައުންސިލްގެ ބުދަ ދުވަހުގެ ޖަލްސާ ކޯރަމް ހަމަނުވެގެން ވަނީ ކެންސަލް ކޮށްލާފަ. 19 މެންބަރުންގެ ތެރެއިން 8 މެންބަރުން ހާޒިރުވި އިރު، ކޯރަމް ހަމަވާން 10 މެންބަރުން ބޭނުންވޭ. އެޖެންޑާގައި ބޯހިޔާވަހިކަމުގެ ސްކީމާ ގުޅޭ ކަންކަން ހިމެނުނު އިރު، ރައީސް މުއިއްޒުގެ މޭޔަރުކަމުގައި ހިނގި ކަންކަން ބެލުން ކުރިއަށް ގެންދިޔަ ނުދިނުމަށް ޕީއެންސީ މެންބަރުން ހާޒިރު ނުވާ ކަމަށް އިދިކޮޅު ފަރާތްތަކުން ތުހުމަތު ކުރޭ.
މީގެ ކުރިން ބޭއްވި މާލޭ ސިޓީ ކައުންސިލްގެ ބައްދަލުވުމެއް | މާލެ ސިޓީ ކައުންސިލް
ސަރުކާރު ހިންގާ ޕީއެންސީގެ ފުލް މެޖޯރިޓީ އޮތް މާލޭ ސިޓީ ކައުންސިލްގެ ބުދަ ދުވަހުގެ ބައްދަލުވުން ކޯރަމް ހަމަ ނުވެގެން ނުބޭއްވި، އެންމެފަހުން ނިންމާލައިފި އެވެ.
ގަލޮޅު އުތުރު ދާއިރާގެ ކައުންސިލަރު ސައިފް ފާތިހު ވަނީ ބުދަ ދުވަހުގެ ޖަލްސާ ކޯރަމް ހަމަނުވެގެން ނުބޭއްވުނު ކަން ހާމަ ކޮށް، ޖަލްސާ ފެށި ވަގުތު ތިބި މެންބަރުން ފެންނަ ވީޑިއޯ އެއް 'އެކްސް' ގައި ހިއްސާ ކޮށްފަ އެވެ.
އެ ވީޑިއޯ އިން ފެންނަނީ ގޮތުގައި އެވަގުތު ޖަލްސާގައ ިތިއްބެވީ މޭޔަރު އާދަމް އާޒިމް އާއި ގަލޮޅު ހުޅަނގު ކައުންސިލަރު މަރިޔަމް ނާޒިމާ، ގަލޮޅު ދެކުނު ކައުންސިލަރު މަރިޔަމް ރީހާން ނާޒިމް، ހުޅުމާލެ ކައުންސިލަރު އަލީ އައިމަން، މައްޗަންގޮޅި އުތުރު ކައުންސިލަރު ސައީދާ ރަޝާދު އަދި ހެންވޭރު ހުޅަނގު ކައުންސިލަރު ޝައުފާ ސަލީމް ގެ އިތުރުން ސައިފް އެވެ.
ބުދަ ދުވަހުގެ އެޖެންޑާ ވެސް ސައިފް ވަނީ ހިއްސާ ކުރައްވާފަ އެވެ. އެގޮތުން އެޖެންޑާ ގައި ވަނީ މި ސަރުކާރުން ހުޅުވާލާފައިވާ ބޯހިޔާވަހިކަމާ ގުޅޭ ސްކީމުގެ ޝަރުތުތައް ކަނޑައެޅިއިރު އެ ކައުންސިލްގެ އެއްވެސް މަޝްވަރާ އެއް ހޯދާފައި ނުވާތީ އެ ޝަރުތުތަކުގައި ކަންބޮޑުވުންތަކެއް ހުރިއިރު އެ ކަމަށް ބަދަލު ގެނައުމަށް ސަރުކާރަށް ލަފާ ދިނުމާއި ފެންނަ ގޮތެއް އަންގަން މަޝްވަރާ ކުރުމަށެވެ.
ކައުންސިލް ގެ ކޯރަމް ގެއްލުވާލަނީ މުއިއްޒު އާ ގުޅުން ހުރި މައްސަލަތައް އެޖެންޑާ ކުރާތީ އެކަންކަން ކުރިއަށް ގެންދިޔަ ނުދިނުމަށް ކަމަށް އިދިކޮޅު ފަރާތްތަކުން ދަނީ ބުނަމުންނެވެ. އެގޮތުން މުއިއްޒު ގެ މޭޔަރ ކަމުގައި ކޮށްފައިވާ ވައްކަންތައް ބެލުން ކުރިއަށް ގެންދިއުމަށް ޕީއެންސީ ގެ ކައުންސިލް މެމްބަރުން ފުރުސަތު ނުދެނީ ރައްޔިތުންނަށް އެކަންކަން ހިނގައި ދިޔަ ގޮތް ސާފު ވެދާނެތީ ބިރުން ކަމަށް ވެސް ގިނަ ބަޔަކު ބުނަމުން ދެ އެވެ.
މާލެ ސިޓީ ކައުންސިލުގައި މާލޭގެ 18 ދާއިރާގެ ކައުންސިލަރުންނާއި މޭޔަރު ހިމެނޭހެން ތިއްބަވަނީ 19 ބޭފުޅުންނެވެ. އޭގެތެރެއިން 14 ކައުންސިލަރުންނަކީ ވެރިކަން ކުރާ ޕީއެންސީއަށް ނިސްބަތްވެވަޑައިގަންނަވާ ބޭފުޅުންނެވެ. މާލެ ސިޓީ ކައުންސިލުގެ ކޯރަމް އަކީ 10 ކައުންސިލަރުންނެވެ. ބުދަ ދުވަހުގެ ޖަލްސާއަށް ހާޒިރުވީ, 8 ކައުންސިލަރުންނެވެ.
މާލޭ ސިޓީ ކައުންސިލުގެ ސަރުކާރު ހިންގާ ޕީއެންސީ އަށް ނިސްބަތްވާ ގިނަ ކައުންސިލަރުން ޖަލްސާ އަށް ހާޒިރުނުވުމުގެ ސަބަބުން މީގެ ކުރިން ވެސް އެކި ފަހަރުމަތިން ޖަލްސާ ނުބޭއްވިގެން ވަނީ ކެންސަލް ކޮށްފަ އެވެ.
