ކުރީ ސަރުކާރުގައި ރަސްދޫގައި އައިސްޕްލާންޓް މަޝްރޫއު ކުރިއަށް ގެންދިއުމަށް ސާމާނު ގެންދިޔަ، މިވެރިކަމުގައި މަޝްރޫއު ހުއްޓި ބައެއް ސާމާނު މިހާރު ވަނީ ވަގަށް ނަގާފައި: މެންބަރު ސަމީރު
މެންބަރު ސަމީރު ވިދާޅުވީ، ރައީސް މުއިއްޒުގެ ސަރުކާރުގައި އއ.އަތޮޅުގެ ތަރައްގީ އެއްކޮށް ހުއްޓިފައިވާ ކަމަށް. އއ.ރަސްދޫއަށް އިޝާރާތް ކުރައްވައި މެންބަރު ސަމީރު ވިދާޅުވީ އެއީ އަތޮޅުގައި ވެރިކަން ކުރާ ރަށް ކަމަށާއި، ނަމަވެސް މިހާރު އެންމެ ނިކަމެތި ހާލަތުގައި އޮތް ރަށް ކަމަށް.
އއ.ރަސްދޫ - ރަސްދޫއަކީ މެދުރާއްޖެތެރޭގެ ރަށަކަށް ބަލާއިރު، ގިނަ އަދަދެއްގެ ލޯންޗާއި، ދޯނި ފަހަރު އޮތް ރަށެއް | ސޯޝަލް މީޑިއާ
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އއ.ރަސްދޫގައި އައިސްޕްލާންޓް މަޝްރޫއު ކުރިއަށް ގެންދިއުމަށް ސާމާނު ގެންދިޔަ ކަމަށާއި، ވެރިކަން ބަދަލުވުމާއެކު، މަޝްރޫއު ހުއްޓި، މިހާރު ބައެއް ސާމާނު ވަގަށް ނަގާފައިވާ ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެ އެވެ.
ރާއްޖެޓީވީގެ ވައުދުނަމާ ޕްރޮގްރާމްގައި މެންބަރު ސަމީރު ވިދާޅުވީ، ރައީސް ޑރ.މުހައްމަދު މުއިއްޒުގެ ސަރުކާރުގައި އއ.އަތޮޅުގެ ތަރައްގީ އެއްކޮށް ހުއްޓިފައިވާ ކަމަށާއި، އެއްވެސް މަޝްރޫއެއް ކުރިއަށް ނުދާ ކަމަށެވެ.
އއ.ރަސްދޫއަށް އިޝާރާތް ކުރައްވައި މެންބަރު ސަމީރު ވިދާޅުވީ އެއީ އަތޮޅުގައި ވެރިކަން ކުރާ ރަށް ކަމަށާއި، ނަމަވެސް މިހާރު އެންމެ ނިކަމެތި ހާލަތުގައި އޮތް ރަށް ކަމަށެވެ. ކުރީ ސަރުކާރުގައި ރަސްދޫގެ މަސްވެރިންނަށް ބޭނުންވާ އައިސްޕްލާންޓް ގާއިމް ކުރުމަށް ސާމާނު ގެންދިޔަ ކަމަށާއި، ބަނދަރުގައި ގިނަ އެއްޗެހި ބަހައްޓާފައިހުރި ކަމަށެވެ.
ނަމަވެސް ވެރިކަން ބަދަލުވެގެން ދިއުމާއެކު، މަސައްކަތް ކުރިއަށް ނުދާ ކަމަށާއި، މިހާރު ބައެއް ސާމާނު ވަގަށް ނަގާފައިވާ ކަމަށް އޭނާ ވިދާޅުވި އެވެ.
ހަމައެގޮތަށް އަޅުގަނޑުމެން ވެރިކަން ނިމުނުއިރުގައި އަޅުގަނޑުމެން ވާނެ އައިސްޕްލާންޓެއް ހެދުމަށްޓަކައި ރަސްދޫގެ ބަނދަރަށް ވާނެ ސާމާނު ގެންގޮސް ބަހައްޓާފައި. ގާތްގަނޑަކަށް ދޮޅު އަހަރު ވަންދެން ހިލައާއި ސިމެންތި އެތާގައި ހުރެހުރެ ހަލާކުވެ ބައެއް އެއްޗެހި ވަގަށް ނަގައި އަނެއް ކަމެއްވެ އަޅުގަނޑުމެންނަށް މިހާރު އޭގެ ޒައްރެއްގެ މިންވަރު ވެސް ފެންނަން ނެތް. އަޅުގަނޑު ހިތާމަ ކުރަން.ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
މެންބަރު ސަމީރު ވިދާޅުވީ ރަސްދޫއަކީ މެދުރާއްޖެތެރޭގެ ރަށަކަށް ބަލާއިރު، ގިނަ އަދަދެއްގެ ލޯންޗާއި، ދޯނި ފަހަރު އޮތް ރަށެއް ކަަމަށެވެ. ނަމަވެސް ބަނދަރު ތަރައްގީ ނުކުރެވި، ދަތުރުފަތުރަށް ވެސް ވަރަށް ބޮޑަށް ބުރޫއަރާ ކަމަށް އޭނާ ވިދާޅުވި އެވެ.
21 އޯގަސްޓް 2025 ގައި ރައީސް މުއިއްޒު އއ. ރަސްދޫ އަށް ވަޑައިގަތުމުގެ 2 ގަޑި އިރެއްހާއިރު ކުރިން، ރަސްދޫ އަށް ހިލަ ބާޖަކާއި ހައިމާކެއް ގެންގޮސް ބަނދަރުގެ އަމަލީ މަސައްކަތް ފަށާފައިވެ އެވެ.
ދައުލަތުގެ ބަޖެޓުން 86.8 މިލިޔަން ރުފިޔާ ހަރަދުކުރާ ގޮތަށް، ރަސްދޫގެ ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން، 106,552 ކިއުބިކް މީޓަރުގެ ސަރަހައްދެއްގައި ބިން ހިއްކުމާއި، 106 މީޓަރުގެ ސަރަހައްދެއްގައި ބޭރުތޮށި ލުމާއި، 1,656 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 177 މީޓަރުގެ ސަރަހައްދެއްގައި އެއްގަމު ތޮށި ލުމާއި، 244 މީޓަރުގެ ސަރަހައްދެއްގައި ގްރޮއިން ޖެހުމާއި، 11 މީޓަރު ދިގު 11 މީޓަރު ފުޅާ ރޭމްޕެއް ހެދުމާއި، 43 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމަށް، ރައީސް ސޯލިހުގެ ސަރުކާރުން ވަނީ އެމްޓީސީސީ އާ ހަވާލު ކޮށްފަ އެވެ.
މީގެ އިތުރުން މެންބަރު ސަމީރު ވަނީ އއ.އަތޮޅުގެ ފަތުރުވެރިކަމަށް އިޝާރާތް ކުރްވައި ވާހަކަ ދައްކަވާފަ އެވެ.
މެންބަރު ސަމީރު ވިދާޅުވީ ގެސްޓްހައުސް ވިޔަފާރި ވަރަށް ބޮޑަށް ފުޅާ ވަމުންދާ ކަމަށާއި، މިވިޔަފާރި އިތުރަށް ކުރިއެރުވުމަށް ސަރުކާރުގެ ފަރާތުން އެއްބާރުލުން ނުލިބޭ ކަމަށެވެ. އަދި ތަރައްގީގެ މަޝްރޫއުތައް ހުއްޓުވާފައިވާއިރު، އއ.އަތޮޅުގެ ކޮންމެ ރަށަކުން ދައުލަތަށް ބޮޑު އާމްދަނީއެއް ލިބޭ ކަމަށް މެންބަރު ސަމީރު ވިދާޅުވި އެވެ.
