ފުރަތަމަ ފަހަރަށް އޮސްޓްރޭލިއަން އޯޕަން ކާމިޔާބުކޮށް، އަލްކަރާޒް އަށް ރެކޯޑު ކާމިޔާބެއް

އޮސްޓްރޭލިއަން އޯޕަންގެ ފައިނަލްގައި ނޮވަކް ޖޮކޮވިޗް ބަލި ކުރުމަށް ފަހު، ޒުވާން ކުޅުންތެރިޔާ ކާލޯސް އަލްކަރާޒް ފުރަތަމަ ފަހަރަށް އެ މުބާރާތް ކާމިޔާބު ކުރުމާ އެކު، ރެކޯޑު ކާމިޔާބީއެއް ހޯދައިފި އެވެ.

އާދީއްތަ ދުވަހު އޮތް ފައިނަލްގައި އަލްކަރާޒް ވަނީ ތިން ސެޓު އެއް ސެޓުން ޖޮކޮވިޗްގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ސެޓު ޖޮކޮވިޗް ކާމިޔާބު ކުރީ 6-2 އިންނެވެ. ނަމަވެސް އަލްކަރާޒް ވަނީ ފަހަތުން އަރައި ދެން ކުޅުނު ތިން ސެޓު ވެސް ކާމިޔާބުކޮށް، އޮސްޓްރޭލިއަން އޯޕަން ކާމިޔާބު ކޮށްފަ އެވެ. އެ ސެޓުތައް އަލްކަރާޒް ކާމިޔާބު ކުރީ 6-2، 6-3 އަދި 6-5 އިންނެވެ.

އޮސްޓްރޭލިއަން އޯޕަން ކާމިޔާބުކޮށް، އަލްކަރާޒް ވަނީ ހަތަރު ގްރޭންޑް ސްލޭމް ޓެނިސް މުބާރާތް ކާމިޔާބު ކޮށްފަ އެވެ. މީގެ ކުރިން އޭނާ ވަނީ ޔޫއެސް އޯޕަން، ފްރެންޗް އޯޕަން އަދި ވިމްބަލްޑަން ކާމިޔާބު ކޮށްފަ އެވެ. މި ކާމިޔާބާ އެކު، އުމުރުން 22 އަހަރުގެ އަލްކަރާޒް ވެގެން ގޮސްފައި ވަނީ އެންމެ ޒުވާން އުމުރުގައި ހަތަރު ގްރޭންޑް ސްލޭމް މުބާރާތް ކާމިޔާބު ކުރި ކުޅުންތެރިޔާ އަށެވެ.

އެއާ އެކު އަލްކަރާޒް މި ވަނީ 87 އަހަރުވެފައިވާ ރެކޯޑު މުގުރާލައިފަ އެވެ.