ޔޫއެސް އޯޕަން ކާމިޔާބުކޮށް ޒުވާން އަލްކަރާޒް ދުނިޔޭގެ އެއްވަނައަށް

މިއަހަރުގެ ޔޫއެސް އޯޕަން ޓެނިސް މުބާރާތުގެ ފިރިހެން ސިންގަލްސް ޗެމްޕިއަންކަން ހޯދައި ސްޕެއިންގެ ޒުވާން ކާލޯސް އަލްކަރާޒް ތާރީޚުގެ ތެރެއަށް ޖެހިލައިފިއެވެ.

ފިރިހެން ޑިވިޝަންގެ ސިންގަލްސް ފައިނަލްގައި އުމުރުން 19 އަހަރުގެ އަލްކަރާޒް ވާދަކޮށްފައިވަނީ ނޯވޭގެ ކެސްޕާ ރޫޑްއާއެވެ. ރޫޑް އަކީ މިއަހަރު އޮތް ފްރެންޗް އޯޕަންގެ ފައިނަލްގައި ވެސް ވާދަކޮށްފައިވާ ކުޅުންތެރިޔެކެވެ. ފްރެންޗް އޯޕަންގެ ފައިނަލްގައި ރޫޑް ބަލިވެފައިވަނީ ސްޕެއިނުގެ ލެޖެންޑް ރަފައެލް ނަޑާލް އަތުންނެވެ.

ފައިނަލްގައި އަލްކަރާޒް ވަނީ ތިން ސެޓު އެއް ސެޓުން ރޫޑްގެ މައްޗަށް ކުރި ހޯދާފައެވެ. ފުރަތަމަ ސެޓު 4-6 އިން އަލްކަރާޒް ހޯދި ނަމަވެސް، ރޫޑް ވަނީ 6-2 އިން ދެ ވަނަ ސެޓު ހޯދާފައެވެ. ތިން ވަނަ ސެޓުގެ ކުޅުން ފެނުނީ ވަރަށް ފޯރި ގަދަކޮށެވެ. ވާދަވެރި ކުޅުމަކަށްފަހު ތިން ވަނަ ސެޓު 6-7 އިން ކާމިޔާބުކޮށް އަލްކަރާޒް ވަނީ ލީޑު ނަގާފައެވެ. ހަތަރު ވަނަ ސެޓަށް ނިކުމެ އަލްކަރާޒް ވަނީ މޮޅު ކުޅުމެއް ދައްކާފައެވެ. މި ސެޓު އޭނާ ކާމިޔާބުކުރީ 3-6 އިންނެވެ. މިއާއެކު އަލްކަރާޒް ވަނޫ ދުނިޔޭގެ ރޭންކިންގެ އެއް ވަނަ އަށް ޖެހިލައިފައެވެ. އަދި އޭނާ އަކީ ދުނިޔޭގެ ރޭންކިންގެ އެއް ވަނަ އަށް އެރި އެންމެ ޒުވާން ކުޅުންތެރިޔާއެވެ.

ޓެނިސް ލެޖެންޑު ނަޑާލް 2005 ވަނަ އަހަރުގެ ފްރެންޗް އޯޕަން ފައިނަލުގައި ވާދަކުރި ފަހުން، ގްރޭންޑް ސްލޭމް ފައިނަލެއްގައި ވާދަކުރި އެންމެ ޒުވާން ކުޅުންތެރިޔާއަކީ އަލްކަރާޒްއެވެ. ނަޑާލް ވަނީ މިހާތަނަށް 22 ސްލޭމް ގްރޭންޑް ކާމިޔާބުކޮށްފައެވެ. އޭގެ ތެރެއިން ނަޑާލް އޭނާގެ އެންމެ ފުރަތަމަ ތަށި ހޯދީ އުމުރުން 19 އަހަރުގައެވެ. އެއީ ފްރެންޗް އޯޕަންއެވެ. މީގެ އިތުރުން އަލްކަރާޒް އަކީ 1990 ވަނަ އަހަރުގެ ފަހުން ޔޫއެސް އޯޕަންގެ ފައިނަލްގައި ވާދަކުރި ވެސް އެންމެ ޒުވާން ކުޅުންތެރިޔާއެވެ.

ފައިނަލަށްފަހު އަލްކަރާޒް ބުނީ ފާއިތުވި ދެ ހަފްތާއަކީ ވަރަށް ތަފާތު އަދި ވަރަށް ޓަފް މެޗުތަކެއް ކުޅެން ޖެހުނު ދުވަސްތަކެއް ކަމަށެވެ. އަލްކަރާޒް ބުނީ މި ކާމިޔާބީ ލިބުމުން އޭނާ ވަރަށް އުފާވާ ކަމަށާއި، އެކަމުގައި އޭނާ އަށް އެކި ގޮތް ގޮތުން އެހީތެރިކަން ދިން އެންމެހައި ފަރާތްތަަކަށް ޚާއްސަ ޝުކުރެއް އަދާ ކުރާ ކަމަށެވެ.