ރަން އިން އައްޑޫ ހުކުރު ދުވަހު ފަށަނީ!

ޓޯޓަލް ފިޓްނަސް ގްރޫޕް (ޓީއެފްޖީ) އިން އިންތިޒާމު ކޮށްގެން އައްޑޫ ސިޓީގައި ބާއްވާ ރަން އިން އައްޑޫ ހުކުރު ދުވަހު ބާއްވާ ގޮތަށް ހަމަޖެހިއްޖެ އެވެ.

ރަން އިން އައްޑޫ ހުކުރު ދުވަހު ފަށާއިރު، މި ރޭހުގައި ހިމެނޭ ހުރިހާ ކެޓަގަރީއެއްގައި ބައިވެރިވުމުގެ ފުރުސަތު މިހާރު ވަނީ ބަންދު ކޮށްފައެވެ. އެގޮތުން ކެޓަގަރީތަކުން ހުޅުވާލި ފުރުސަތު ތެރޭގައި ހުރިހާ ސްލޮޓެއް ވަނީ ފުރިފައެވެ.

ޖުމްލަ ހަތަރު ކެޓަގަރީއެއް ހިމެނޭ މި ދުވުމުގައި ފުރަތަމަ ކުރިޔަށްދާނީ މެރަތަން އެވެ. މެރަތަން ރޭސް ފެށުމަށް ހަމަޖެހިފައި ވަނީ ހުކުރު ދުވަހުގެ ރޭ ފަތިހު 4:45 ގައެވެ. މި ރޭސް ފެށުމަށް ހަމަޖެހިފައި ވަނީ ކަނބިހާ މަގުންނެވެ. މެރަތަން ރޭސް ނިމޭނެކަމަށް ލަފާކުރެވެނީ ފަސް ގަޑިއިރާ 20 މިނެޓުންނެވެ. އެގޮތުން ދުވުންތެރިންނަށް ރޭސް ނިންމާލެވޭނެ ކަމަށް ލަފާކުރެވެނީ 10:10 ގައެވެ. މި ރޭހުގައި 42.2 ކިލޯ މީޓަރުގެ ރާސްތާއެއް ކަޑައްތުކުރަން ޖެހޭނެއެވެ.

ދެވަނަ ރޭހަކަށް ފަށާނީ ހާފް މެރަތަން އެވެ. މި ރޭސް ފަށާނީ ގަން އިންޓަނޭޝަނަލް އެއާޕޯޓުން 06:45 ގައެވެ. މި ރޭހުގައި 21.1 ކިލޯ މީޓަރުގެ ރާސްތާއެއް ކަޑައްތު ކުރަންޖެހޭނެ އެވެ.

ތިންވަނަ ރޭހަކަށް ފަށާނީ 10 ކިލޯމީޓަރު ރޭހެވެ. މި ރޭސް ފަށާނީ ހިތަދޫ ލިންކްރޯޑުން 07:45 ގައެވެ. މި ދުވުމުގެ ފަހު ރޭހަކީ ފަސް ކިލޯ މީޓަރު ރޭހެވެ. މި ރޭސް ހިތަދޫ އެޅެދީދީ މަގުން 08:45 ގައި ފަށާނެއެވެ. މި ހުރިހާ ރޭހެއް ވެސް ނިންމާނީ ހިތަދޫގައި ހުންނަ ކޮންވެންޝަން ސެންޓަރަށެވެ.

މި ރޭސްތައް ކުރިޔަށްދާ ރޫޓުތަކުގެ ކޮންމެ ދެ ކިލޯ މީޓަރަކުން ފަސްޓްއެއިޑް ސްޓޭޝަން ވަނީ ގާއިމުކޮށްފައެވެ. ފަސްޓްއެއިޑްގެ ގޮތުން އެހީތެރިވާނީ މޯލްޑިވްސް ރެޑްކްރޮސެންޓުން ކަމަށާއި، ރޭސްތައް ކުރިޔަށްދާއިރު، އައްޑޫގެ ފުލުހުން ސަލާމަތީ ގޮތުން ހަރަކާތްތެރިވާނެ ކަމަށް މިކަންތައް އިންތިޒާމުކުރާ ފަރާތުން ބުނެއެވެ.