ފަހަތުން އަރައި މޮޅުވެ، ފުޓްސަލްގެ ފުރަތަމަ ތައްޓާ އެކު ރާއްޖެ ތާރީޚުގެ ތެރެއަށް

މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަންގައި ބޫޓާންއާ ދެކޮޅަށް ކުޅުނު މެޗުން މޮޅުވެ، ރާއްޖެ އިން ފުޓްސަލްގެ ބައިނަލްއަަޤުވާމީ ފުރަތަމަ ތަށި ކާމިޔާބު ކޮށްފި އެވެ.

ތައިލެންޑުގައި ކުރިއަށްދާ މުބާރާތުގައި ރާއްޖޭގެ ފަސް ވަނަ މެޗުގައި ހޮނިހިރު ދުވަހު ބޫޓާންއާ ދެކޮޅަށް ނިކުތްއިރު، މެޗުން މޮޅުވެ ރާއްޖެ އަށް މުބާރާތުގެ ޗެމްޕިއަންކަން ހޯދުމުގެ ފުރުސަތު އޮތެވެ. މެޗުގައި ބޫޓާން އިން ލަނޑު ޖަހައި ކުރި ހޯދާފައި ވަނިކޮށް، ރާއްޖެ އިން ވަނީ ފަހަތުން އަރައި 3-1 އިން މޮޅުވެ ޗެމްޕިއަންކަން ހޯދައިފަ އެވެ.

މެޗު ފަށައިގެން ރާއްޖެ އިން ރަނގަޅަށް ކުޅެމުން ދިޔައިރު، ރާއްޖެ އަށް ވަނީ ލަނޑު ޖަހަން ވެސް ފުރުސަތު ލިބިފަ އެވެ. ނަމަވެސް ރާއްޖެ އަށް ލިބުނު ފުރުސަތުގެ ބޭނުން ނުކުރެވި އުޅެނިކޮށް، ބޫޓާން އިން ވަނީ ލަނޑު ޖަހައި ލީޑު ނަަގައިފަ އެވެ. އެ ލަނޑު ބޫޓާން އަށް ޖަހައިދިނީ ޖިގްމޭ ސުލްތުރިމް އެވެ. 

ބޫޓާންގެ އިން ލީޑު ނެގި ފަހުން ވެސް ރާއްޖެ އިން ވަނީ ކުރިއަށް ޖެހިގެން ރަނގަޅަށް ކުޅެފަ އެވެ. އެގޮތުން މެޗުގެ ފުރަތަމަ ހާފު ނިމެން ކުޑަ ވަގުތު ކޮޅަކަށް ވެފައި ވަނިކޮށް، ރާއްޖެ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ރާއްޖެ އަށް ޖަހައިދިނީ ޢަބްދުﷲ ޖުނެއިދު އެވެ. 

މެޗުގެ ދެ ވަނަ ހާފު ފަށައިގެން ރާއްޖެ އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. ރާއްޖެ އަށް ލިބުނު ހިލޭ ޖެހުމެއްގައި ބޯޅަ ގޯލަށް ވައްދާލައިގެން ރާއްޖެ އަށް ލީޑު ނަގައިދިނީ އަޙުމަދު ހަމީދު އެވެ. ލީޑު ނެގި ފަހުން ވެސް ރާއްޖެ އިން ވަނީ ރަނގަޅަށް ކުޅެ، އިތުރު ލަނޑު ޖަހަން ފުރުސަތު ތަނަވަސްކޮށްފަ އެވެ. ނަތީޖާއެއްގެ ގޮތުން، މެޗު ނިމެން ހަތަރު މިނެޓަށް ވެފައި ވަނިކޮށް ކެޕްޓަން މުޙައްމަދު އިމްރާމް ވަނީ ރާއްޖޭގެ ތިން ވަނަ ލަނޑު ޖަހައިފަ އެވެ. 

މުބާރާތުގައި ރާއްޖެ އިން މިހާތަނަށް ފަސް މެޗު ކުޅެފައިވާއިރު، ފަސް މެޗުން ވެސް މޮޅުވެ ޗެމްޕިއަންކަން މި ވަނީ ކަށަވަރު ކޮށްފަ އެވެ. މުބާރާތުގެ ފުރަތަމަ މެޗުގައި ރާއްޖެ އިން ޕާކިސްތާން ބަލި ކުރިއިރު، ދެ ވަނަ މެޗުގައި ބަންގްލަދޭޝް ބަލި ކުރި އެވެ. ތިން ވަނަ މެޗުގައި އިންޑިއާ ބަލިކުރިއިރު، ހަތަރު ވަނަ މެޗުގައި ނޭޕާލް ބަލިކޮށް، ފަސް ވަނަ މިނެޓުގައި މި ވަނީ ބޫޓާން ވެސް ބަލިކޮށްފަ އެވެ. ފަސް މެޗުން މޮޅުވެ ރާއްޖެ އިން ޗެމްޕިއަންކަން ކަށަވަރު ކުރީ 15 ޕޮއިންޓާ އެކު އެވެ. 

މުބާރާތުގެ ޗެމްޕިއަންކަން ރާއްޖެ އިން ކަށަވަރު ކޮށްފައިވާއިރު. މުބާރާތުގައި ރާއްޖެ އަށް ބާކީ އެއް މެޗު އެބަ އޮތެވެ. އެއީ ހޯމަ ދުވަހު ސްރީ ލަންކާއާ ދެކޮޅަށް ކުޅޭ މެޗެވެ. މުބާރާތުގައި ރާއްޖެ އިން ވަރުގަދަ ކުޅުމެއް ދައްކާފައިވާއިރު، ރާއްޖެ އިން ފުޓްސަލްގެ ބައިނަލްއަޤުވާމީ ފުރަތަމަ ތަށި މި ކާމިޔާބު ކުރީ އިންޑޯ ފުޓްސަލް ދަނޑެއް ރާއްޖޭގައި ނެތި، އެތައް އުނދަގޫ އަދި ދަތި ތަކެއްގެ ތެރެއިން ފަރިތަ ކުރުންތައް ކުރިއަށް ގެންދިޔުމަށް ފަހު އެވެ. 

މިއީ ރާއްޖެ އިން ފުޓްސަލްގެ ބައިނަލްއަޤުވާމީ ތައްޓެއް ކާމިޔާބު ކުރި ފުރަތަމަ ފަހަރެވެ.